1ⲉⲡϫⲱⲕ ⲉⲃⲟⲗ ⲙⲡⲉⲯⲁⲗⲙⲟⲥ ⲛⲇⲁⲩⲉⲓⲇ ⲛⲧⲉⲡⲡⲱϣⲥ</ab>
2ⲁⲓⲕⲁϩⲧⲏⲓ ⲉⲣⲟⲕ ⲡϫⲟⲉⲓⲥ ⲙⲡⲣⲧⲣⲁϫⲓϣⲓⲡⲉ ϣⲁ ⲉⲛⲉϩ ⲛⲁϩⲙⲉⲧ ⲛⲅⲧⲟⲩϫⲟⲓ ϩⲛ ⲧⲉⲕⲇⲓⲕⲁⲓⲟⲥⲩⲛⲏ</ab>
3ⲣⲓⲕⲉ ⲙⲡⲉⲕⲙⲁⲁϫⲉ ⲉⲣⲟⲓ ⲛⲅϭⲉⲡⲏ ⲉⲧⲟⲩϫⲟⲓ ϣⲱⲡⲉ ⲛⲁⲓ ⲉⲩⲛⲟⲩⲧⲉ ⲛⲛⲁϣⲧⲉ ⲁⲩⲱ ⲟⲩⲏⲓ ⲉⲙⲁⲙⲡⲱⲧ ⲉⲧⲟⲩϫⲟⲓ</ab>
4ϫⲉ ⲛⲧⲟⲕ ⲡⲉ ⲡⲁⲧⲁϫⲣⲟ ⲁⲩⲱ ⲡⲁⲙⲁ ⲙⲡⲱⲧ ⲉⲧⲃⲉ ⲡⲉⲕⲣⲁⲛ ⲕⲛⲁϫⲓⲙⲟⲉⲓⲧ ϩⲏⲧ ⲁⲩⲱ ⲛⲅⲥⲁⲛⲟⲩϣⲧ</ab>
5ⲕⲛⲁⲛⲧ ⲉⲃⲟⲗ ϩⲛ ⲧⲉⲓϭⲟⲣϭⲥ ⲉⲛⲧⲁⲩϩⲟⲡⲥ ⲉⲣⲟⲓ ϫⲉ ⲛⲧⲟⲕ ⲡⲉ ⲧⲁⲛⲁϣⲧⲉ</ab>
6ϯⲛⲁϭⲟⲓⲗⲉ ⲙⲡⲁⲡ︤ⲛ︦ⲁ︥ ⲉⲛⲉⲕϭⲓϫ ⲁⲕⲥⲱⲧⲉ ⲙⲙⲟⲓ ⲡϫⲟⲉⲓⲥ ⲡⲛⲟⲩⲧⲉ ⲛⲧⲙⲉ</ab>
7ⲁⲕⲙⲉⲥⲧⲉⲛⲉⲧϩⲁⲣⲉϩ ⲉⲙⲡⲉⲧϣⲟⲩⲉⲓⲧ ⲉⲡϫⲓⲛϫⲏ ⲁⲛⲟⲕ ⲇⲉ ⲁⲓⲕⲁϩⲧⲏⲓ ⲉⲡϫⲟⲉⲓⲥ</ab>
8ϯⲛⲁⲧⲉⲗⲏⲗ ⲧⲁⲉⲩⲫⲣⲁⲛⲉ ⲉϫⲙ ⲡⲉⲕⲛⲁ ϫⲉ ⲛⲧⲟⲕ ⲁⲕϭⲱϣⲧ ⲉϫⲙ ⲡⲁⲑⲃⲃⲓⲟ ⲁⲩⲱ ⲁⲕⲧⲟⲩϫⲉⲧⲁⲯⲩⲭⲏ ⲉⲃⲟⲗ ϩⲛ ⲛⲁⲁⲛⲁⲅⲕⲏ</ab>
9ⲁⲩⲱ ⲙⲡⲕⲧⲁⲁⲧⲉ ⲉⲧⲟⲟⲧϥ ⲙⲡϫⲁϫⲉ ⲁⲕⲧⲁϩⲉⲛⲁⲟⲩⲉⲣⲏⲧⲉ ⲉⲣⲁⲧⲟⲩ ϩⲛ ⲟⲩⲟⲩⲟⲥⲧⲛ</ab>
10ⲛⲁ ⲛⲁⲓ ⲡϫⲟⲉⲓⲥ ϫⲉ ϯⲑⲗⲓⲃⲉ ⲁⲡⲁⲃⲁⲗ ϣⲧⲟⲣⲧⲣ ϩⲙ ⲡⲉⲕϭⲱⲛⲧ ⲁⲩⲱ ⲧⲁⲯⲩⲭⲏ ⲙⲛ ϩⲏⲧⲧ</ab>
11ⲁⲡⲁⲁϩⲉ ⲱϫⲛ ϩⲛ ⲟⲩⲙⲕⲁϩ ⲛϩⲏⲧ ⲁⲩⲱ ⲛⲁⲣⲙⲡⲟⲟⲩⲉ ϩⲛ ϩⲉⲛⲁϣⲁϩⲟⲙ ⲁⲧⲁϭⲟⲙ ϭⲃⲃⲉ ϩⲛ ⲟⲩⲙⲛⲧϩⲏⲕⲉ ⲁⲩⲱ ⲁⲩϣⲧⲟⲣⲧⲣ ⲛϭⲓ ⲛⲁⲕⲉⲉⲥ</ab>
12ⲁⲓϣⲱⲡⲉ ⲛⲛⲟϭⲛⲉϭ ⲡⲁⲣⲁ ⲛⲁϫⲁϫⲉ ⲧⲏⲣⲟⲩ ⲁⲩⲱ ⲛⲛⲉⲧϩⲓⲧⲟⲩⲱⲓ ⲉⲙⲁⲧⲉ ⲁⲩⲱ ⲛϩⲟⲧⲉ ⲛⲛⲉⲧⲥⲟⲟⲩⲛ ⲙⲙⲟⲓ ⲛⲉⲧⲛⲁⲩ ⲉⲣⲟⲓ ⲁⲩⲟⲩⲉ ⲛⲥⲁⲃⲟⲗ ⲙⲙⲟⲓ</ab>
13ϫⲉ ⲁⲩⲣⲡⲱⲃϣ ϩⲛ ⲛⲉⲩϩⲏⲧ ⲛⲑⲉ ⲛⲛⲓⲕⲱⲱⲥ ⲁⲓⲣⲑⲉ ⲛⲟⲩϩⲛⲁⲁⲩ ⲉⲁϥⲥⲱⲣⲙ</ab>
14ϫⲉ ⲁⲓⲥⲱⲧⲙ ⲉⲡⲥⲱϣϥ ⲛϩⲁϩ ⲉⲩⲟⲩⲏϩ ϩⲙ ⲡⲁⲕⲱⲧⲉ ϩⲙ ⲡⲧⲣⲉⲩⲥⲱⲟⲩϩ ϩⲓ ⲟⲩⲥⲟⲡ ⲉⲣⲟⲓ ⲁⲩϣⲟϫⲛⲉ ⲉϫⲓ ⲛⲧⲁⲯⲩⲭⲏ</ab>
15ⲁⲛⲟⲕ ⲇⲉ ⲁⲓⲕⲁϩⲧⲏⲓ ⲉⲣⲟⲕ ⲡϫⲟⲉⲓⲥ ⲁⲓϫⲟⲟⲥ ϫⲉ ⲛⲧⲟⲕ ⲡⲉ ⲡⲁⲛⲟⲩⲧⲉ</ab>
16ⲉⲣⲉⲛⲁⲕⲗⲏⲣⲟⲥ ϩⲛ ⲛⲉⲕϭⲓϫ ⲙⲁⲧⲟⲩϫⲟⲓ ⲉⲧϭⲓϫ ⲛⲛⲁϫⲁϫⲉ ⲙⲛ ⲛⲉⲡⲏⲧ ⲛⲥⲱⲓ</ab>
17ⲟⲩⲉⲛϩⲡⲉⲕϩⲟ ⲉⲃⲟⲗ ⲉϫⲙ ⲡⲉⲕϩⲙϩⲁⲗ ⲙⲁⲧⲟⲩϫⲟⲓ ϩⲙ ⲡⲉⲕⲛⲁ</ab>
18ⲡϫⲟⲉⲓⲥ ⲙⲡⲣⲧⲣⲁϫⲓϣⲓⲡⲉ ϫⲉ ⲁⲓⲱϣ ⲉϩⲣⲁⲓ ⲉⲣⲟⲕ ⲉⲩⲉϫⲓϣⲓⲡⲉ ⲛϭⲓ ⲛⲁⲥⲉⲃⲏⲥ ⲁⲩⲱ ⲛⲥⲉϫⲓⲧⲟⲩ ⲉⲁⲙⲛⲧⲉ</ab>
19ⲙⲁⲣⲟⲩⲣⲙⲡⲟ ⲛϭⲓ ⲛⲉⲥⲡⲟⲧⲟⲩ ⲛⲕⲣⲟϥ ⲛⲉⲧϫⲱ ⲛⲟⲩⲁⲛⲟⲙⲓⲁ ⲉϩⲟⲩⲛ ⲉⲡⲇⲓⲕⲁⲓⲟⲥ ϩⲛ ⲟⲩⲙⲛⲧϫⲁⲥⲓϩⲏⲧ ⲙⲛ ⲟⲩⲥⲱϣϥ</ab>
20ϫⲉ ⲛⲁϣⲉⲡⲁϣⲁⲓ ⲛⲧⲉⲕⲙⲛⲧⲭⲣⲏⲥⲧⲟⲥ ⲡϫⲟⲉⲓⲥ ⲧⲁⲓ ⲉⲛⲧⲁⲕϩⲟⲡⲥ ⲛⲛⲉⲧⲣϩⲟⲧⲉ ϩⲏⲧⲕ ⲁⲕⲧⲟϣⲥ ⲛⲛⲉⲧϩⲉⲗⲡⲓⲍⲉ ⲉⲣⲟⲕ ⲙⲡⲉⲙⲧⲟ ⲉⲃⲟⲗ ⲛⲛϣⲏⲣⲉ ⲛⲛⲣⲱⲙⲉ</ab>
21ⲕⲛⲁϩⲟⲡⲟⲩ ϩⲙ ⲡⲡⲉⲑⲏⲡ ⲙⲡⲉⲕϩⲟ ⲉⲡⲉϣⲧⲟⲣⲧⲣ ⲛⲛⲣⲱⲙⲉ ⲕⲛⲁⲣϩⲁⲓⲃⲉⲥ ⲉⲣⲟⲟⲩ ϩⲛ ⲟⲩϩⲁⲓⲃⲉⲥ ⲉⲡⲟⲩⲱϩⲙ ⲛϩⲉⲛⲗⲁⲥ</ab>
22ⲡϫⲟⲉⲓⲥ ⲥⲙⲁⲙⲁⲁⲧ ϫⲉ ⲁϥϯⲉⲟⲟⲩ ⲙⲡⲉϥⲛⲁ ⲉϩⲣⲁⲓ ⲉϫⲱⲓ ϩⲛ ⲟⲩⲡⲟⲗⲓⲥ ⲉⲥⲧⲁϫⲣⲏⲩ</ab>
23ⲁⲛⲟⲕ ⲇⲉ ⲁⲓϫⲟⲟⲥ ϩⲛ ⲧⲁⲉⲕⲥⲧⲁⲥⲓⲥ ϫⲉ ⲙⲉ ϣⲁⲕⲁⲓϩⲉ ⲉⲃⲟⲗ ⲛⲛⲁϩⲣⲛ ⲛⲉⲕⲃⲁⲗ ⲉⲧⲃⲉ ⲡⲁⲓ ⲁⲕⲥⲱⲧⲙ ⲉⲡⲉⲥϩⲣⲟⲟⲩ ⲙⲡⲁⲥⲟⲡⲥ ϩⲙ ⲡⲧⲣⲁⲱϣ ⲉϩⲣⲁⲓ ⲟⲩⲃⲏⲕ</ab>
24ⲙⲉⲣⲉⲡϫⲟⲉⲓⲥ ⲛⲉϥⲡⲉⲧⲟⲩⲁⲁⲃ ⲧⲏⲣⲟⲩ ϫⲉ ⲉⲣⲉⲡϫⲟⲉⲓⲥ ϣⲓⲛⲉ ⲛⲥⲁ ⲙⲙⲛⲧⲙⲉ ⲁⲩⲱ ϥⲛⲁⲧⲟⲩⲉⲓⲟ ⲛⲛⲉⲧϫⲟⲥⲉ ⲛϩⲏⲧ ⲉⲙⲁⲧⲉ</ab>
25ϫⲣⲟ ⲛⲧⲉⲡⲉⲧⲛϩⲏⲧ ϭⲙϭⲟⲙ ⲟⲩⲟⲛ ⲛⲓⲙ ⲉⲧϩⲉⲗⲡⲓⲍⲉ ⲉⲡⲁϫⲟⲉⲓⲥ</ab>