1Zuwa limwe Daudi nakauza, “Ndaze, hana munhu yoneche yaponile hali ivyazi lya Sauli? Wone kabaho, ndangugana kumditila igano lya kwimilila kwa chiwalo cha Yonatani.”
2Nakwali na chitumagwa wa ivyazi lya Sauli yachemigwe Siba. Siba nakachemigwa yalute kwa Daudi. Mndewa Daudi nakamuuza, “Ndaze, hegwe ndo Siba?” Naye nakamwidichila, “Nda baha chitumagwa wa hegwe.”
3Mndewa nakamuuza, “Ndaze, haduhu munhu yoneche yaponile hali ivyazi lya Sauli? Wone kabaho, ndangugana kumditila igano lya kwimilila lyondilagane hali Nguluwi kota ndolidita.” Siba nakamwidichila, “Kabaha mwana wa Yonatani, ila nakazilika magulu.”
4Mndewa nakamuuza, “Kakohi?” Siba nakamwidichila, “Ka haluga ha Makili, mwana wa Amieli ako Lo-debali.”
5Lelo mndewa Daudi nakalajiza wanhu kumigala, nawo nawamigala kulawa haluga ha Makili, mwana wa Amieli ako Lo-debali.
6Lelo Mefibosheti, mwana wa Yonatani na mzukulu wa Sauli nakaluta kwa mndewa Daudi, naketoza chifunama kumwando kwa mndewa Daudi, nakamfugamila. Daudi nakamchema, “Mefibosheti.” Naye nakedichila, “Ulole, nda baha chitumagwa wa hegwe.”
7Daudi nakamlonjela, “Uleche kudumba. Heni ndokuditila igano lya kwimilila kwa chiwalo cha mhaza wa hegwe Yonatani. Isi yeng'ha ya sekulu wa hegwe Sauli, ndokuhilusila. Nagwe kolya kuli chisaga cha heni mazuwa geng'ha.”
8Mefibosheti nakafugama na kulonga, “Heni nda kota libwa lifile, lekachoni unditile ahyo?”
9Hamba, mndewa Daudi nakamchema Siba, chitumagwa wa Sauli, nakamlonjela, “Lula lufufu lweng'ha loluwele lwa Sauli na ivyazi lya heye ndimha Mefibosheti, mzukulu wa mkulu wa hegwe.
10Hegwe na wanago na vitumagwa wa hegwe mowa mumlimila Mefibosheti na momhilichila mbena leka mzukulu wa mkulu wa hegwe yawe na chilyo mhela weng'ha. Ila heye kolya kuli chisaga cha heni.” Mhela awo, Siba nayali na wana walume kumi na wahano na vitumagwa makumi meli.
11Aho ndo Siba nakamlonjela mndewa, “Heni chitumagwa wa hegwe ndodita geng'ha kota vyoundonjele.” Lelo Mefibosheti nayali yolya chilyo kuli chisaga cha Daudi, kota yumwe wa wana wa mndewa.
12Mefibosheti nayali na mwana mlume mdodo yumwe yachemigwe Mika. Wanhu weng'ha wa Siba nawali vitumagwa wa Mefibosheti.
13Lelo Mefibosheti nayali yochikala mujini Yelusalemu. Nayali yolya kuli chisaga cha mndewa Daudi mazuwa gose. Nayali yaziliche magulu ga heye geng'ha.