1Logapulute ago, mndewa Nahashi wa Waamoni nakabagama. Mwanage, yachemigwe Hanuni nayali mndewa kota mhaza wa heye.
2Mndewa Daudi nakalonga, “Ndomditila Hanuni igano lya kwimilila, mwana wa Nahashi kota mhaza wa heye vyoyanditile.” Lelo Daudi nakalajiza wasenga kumhilichila ulamso wa kumhembuliza munhu yafililwe. Wasenga wa Daudi lowafichile isi ya Waamoni,
3wakulu wa Waamoni nawamuuza mkulu wa hewo Hanuni, “Ndaze, kwangijesa kota Daudi kuwalajiza wanhu wa kukuhembuliza kangumtogola mhaza wa hegwe? Ndaze, Daudi hawalajize wanhu wano kwa hegwe leka yaupugajize muji uno leka hamba yauhole?”
4Lelo Hanuni nakawahola wasenga wala wa Daudi na kuwatema lulevu chila yumwe nusu ya lulevu lwa heye, nakajidumula mivalo ja hewo hagati ha madako, hamba nakawaleka walute.
5Wasenga awo nawona soni lukami kuhiluka kaye. Mndewa Daudi loyalonjelwe mbuli azo nakalajiza wanhu kiting'hana nawo. Mndewa nakawalonjela, “Mikale kuli muji wa Yeliko mbaka lulevu lwa hemwe lwote, hamba mohiluka kaye.”
6Waamoni lowawene kota nawamzudiza Daudi, nawalanda wamizi Washami elufu makumi meli walingujenda kwa magulu kulawa Beti-lehobu na Soba na wamizi elufu kumi na mbili kulawa Tobu na mndewa Maaka yawele na wamizi elufu imwe.
7Daudi loyahuliche mbuli azo, nakamlajiza Yoabu yalute na wamizi weng'ha wa kitowa ngondo.
8Waamoni nawalawa wemile goya kitowa ngondo kuli lwizi lwa muji wa Laba, muji ukulu wa hewo. Washami kulawa Soba na Lehobu na wanhu kulawa Tobu na Maaka nawali waliyeka hali honhu hazelu.
9Yoabu loyawene kota wang'honyo wa heye wangugana kitowa na heye kumwando na kumbele, nakawahagula wamizi wa Waisilaeli wazidahe ng'hatu kitowa ngondo nakawawika wetowe na Washami.
10Wala wamizi wanji waponile nakawawika kuli ulongozi wa mng'holoze Abishayi, naye Abishayi nakawawika wala wamizi wetowe na Waamoni.
11Yoabu nakamlonjela Abishayi, “Wone Washami wowa na mong'ho lukami konhanza, ila wone Waamoni wawe na mong'ho lukami nani ndokuya kukutanza.
12Ila wikangaze nhumbula gwegwe baho. Titowe kwa nhumbula ikangale kwa chiwalo cha wanhu wa hetwe na kwa chiwalo cha miji ja Nguluwi wa hetwe. Mkulu Nguluwi wa hetwe kotuditila lila linojile kwa heye.”
13Lelo Yoabu na wanhu wa heye nawaluta habehi kitowa na Washami mbaka Washami nawabilima.
14Waamoni lowawene kota Washami nawabilima, nawo kahi nawambilima Abishayi na kwinjila kuli muji. Yoabu nakaleka kitowa na Waamoni, nakahiluka Yelusalemu.
15Hamba Washami lowawene kota nawasumigwa na Waisilaeli, nawekungajiza hamwe.
16Hadadeseli nakalajiza Washami wawele kumwambu mwa lwanda lwa Eyufulate wegaligwe, wahilikwe ako Helamu leka walongozwe na Shobaki, mkulu wa wamizi wa Hadadeseli.
17Daudi loyapegwe mbuli ayo, nakawakungajiza hamwe Waisilaeli weng'ha, nakaloka lwanda lwa Yolodani na kuluta mbaka Helamu. Nawo Washami nawewika goya kitowa na Daudi. Nawaluka kitowa na heye,
18ila Washami nawawabilima Waisilaeli. Daudi nakawakopola Washami miya saba walingwendesa mituka ja ngondo na wakwina falasi elufu makumi gane. Shobaki, mkulu wa chilundo cha wamizi cha hewo, nakalumizwa na kubagama bahala.
19Hamba wandewa weng'ha wawele womkolela mijito Hadadeseli lowawene kota nawasumigwa na Waisilaeli, nawadita ilagano lya kikala goya na Waisilaeli, nawo nawawa vitumagwa wa isi ya Isilaeli. Lelo Washami nawadumba kuwatanza kahi Waamoni.