1Wafilisti nawetowa ngondo na Waisilaeli, wanhu wa Isilaeli nawabilima, wenji nawabagama kuli chidunda cha Gilibowa.
2Wafilisti nawawawinza lukami Sauli na wanage walume, hamba Wafilisti nawawakopola wana walume wa Sauli, Yonatani na Abinadabu na Malikishua.
3Ngondo nayali ng'hulu ng'hatu kumzunguluta Sauli. Watowa misale nawamfika Sauli na kumhoma ng'hatu kwa misale.
4Sauli nakamlonjela yula mpapa vinhu vya heye vya ngondo, “Uhole ipanga lya hegwe, ung'hopole leka wala wanhu wawele hambe wenjile ikumbi waleche kumbeza na kunyhoma.” Ila yula mpapa vinhu vya heye vya ngondo nakalema kwa vila nakadumba lukami. Lelo Sauli nakahola ipanga lya heye yuye, nakagwila mli lila ipanga lya heye.
5Hamba yula mpapa vinhu vya Sauli loyamuwene Sauli nakabagama, heye kahi nakabagama kwa kugwila mli lila ipanga lya heye, hamwe na Sauli.
6Ahi ndo Sauli na wanage wadatu na mpapa vinhu vya heye hamwe na wamizi wa heye weng'ha vyowabagame zuwa lilyo limwe.
7Hamba wanhu wa Isilaeli wawele ubanzi wa kumwambu mwa ibindi lila na kumwambu mwa lwanda lwa Yolodani, lowawene kota wanhu wa Isilaeli nawabilima na Sauli na wanage kahi nawabagama, nawajileka miji ja hewo nawabilima. Wafilisti nawaluta na kikala kuli miji ajo.
8Zuwa lya keli wala Wafilisti lowalutile kuvihola vinhu vya wanhu wabagame, nawajifika mitufi ja Sauli na wanage wadatu mchanya mwa chidunda cha Gilibowa.
9Nawadumula mutwi wa heye na kuhola vinhu vya heye vya ngondo, hamba nawawahilika wasenga wa hewo kuli isi ya Wafilisti banzi zeng'ha kuwikula mbuli kuli ng'handa ya jimalukolo ja hewo na hali wanhu wa hewo.
10Vinhu vya heye vya ngondo nawaviwika kuli ng'handa ya milungu ja Maashitaloti, hamba nawaluniniza lukuli lwa heye kuli lukanzi lwa muji wa Beti-shani.
11Wanhu wa muji wa Yabeshi-gileadi lowahuliche Wafilisti vyowamditile Sauli,
12wanhu wazidahe kitowa ngondo nawoka, nawajenda nechilo yeng'ha, nawajihola jila mitufi ja Sauli na wanage kulawa kuli lukanzi lwa muji wa Beti-shani. Nawaluta najo mbaka Yabeshi na kujilakaza kuko.
13Hamba nawahola mizeje ja hewo na kujitila hasi ha igodi lya ikwaju ako Yabeshi, hamba nawesela kulya kwa mazuwa saba.