1Naboti, mwenyeng'haye wa Yesileeli, nayali na mgunda wa mizabibu ako Yesileeli habehi na ng'handa ya chiundewa ya Ahabu, mndewa wa Samaliya.
2Zuwa limwe Ahabu nakamlonjela Naboti, “Umhe heni mgunda wa hegwe umwe ndiudite uwe mgunda wa mboga, kwa vila wa habehi na ng'handa ya heni. Ndokupa mgunda wunji unojile kusinda awo, ama wone ugane, ndougula kwa sendi nyinji.”
3Naboti nakamwidichila Ahabu, “Mkulu Nguluwi yaiwiche kutali mbuli ayi ya kukupa uhalizi wa wasekulu wa heni.”
4Ahyo Ahabu nakaluta haluga yawele na usungu na ng'halazi, kwa vila Naboti, mwenyeng'haye wa Yesileeli, nakamlonjela kota homha chila choyahalile kulawa kwa wasekulu wa heye. Lelo nakawasa mchinhanda nakavisa kumeho kwa heye na kuviluka chilyo.
5Yesebeli, mche wake nakenjila na kumuuza, “Lekachoni kuna masinzo mnhumbula na hambe ulye?”
6Naye nakamwidichila, “Kwa vila nandimlonjela Naboti, mwenyeng'haye wa Yesileeli, ‘Nguzile mgunda wa hegwe wa mizabibu ama wone kogana ndokupa mgunda wunji wa mizabibu honhu ha awo,’ ila nakandonjela, ‘Hambe ndikupe mgunda wa heni wa mizabibu.’ ”
7Aho ndo Yesebeli, mche wake nakamlonjela, “Ahi ndo vyoulingudita hegwe mndewa wa Isilaeli yeng'ha? Winuche ulye na usangalale. Ndokupa mgunda wa mizabibu wa Naboti, Myesileeli.”
8Ahyo Yesebeli nakandika baluwa kwa itagwa lya Ahabu na kuwika mhuli wa mndewa kuli baluwa azo. Nakahilika baluwa azo kwa wasekulu na kwa wanhu wawele kuli ulongozi walingikala kuli muji hamwe na Naboti.
9Baluwa azo nazandichigwa hino, “Muwikule zuwa lya wanhu kulanda na kuleka kulya, mlute kumuwika Naboti honhu ha lutogo hali wanhu.
10Hamba mpale wanhu weli wehile habehi na heye leka walavye ulolezi hali wanhu kota heye nakampanjila Nguluwi na mndewa. Hamba mumlavye mgati na kumtowa kwa maganga mbaka yabagame.”
11Ahyo wasekulu na wanhu wawele kuli ulongozi walingikala kuli muji wa Naboti, nawadita kota Yesebeli vyoyawalonjele kuli baluwa yoyawandichile.
12Nawawikula kuwala wanhu kuleka kulya na kumuwika Naboti hali honhu ha lutogo hali wanhu.
13Hamba wala wanhu wehile nawoya na kikalisa habehi na heye na kumlonjeleza Naboti hali wanhu, wolonga, “Naboti nakampanjila Nguluwi na mndewa.” Lelo nawamlavya Naboti mgati mwa muji, nawamtowa kwa maganga mbaka nakabagama.
14Hamba nawalajiza usenga kwa Yesebeli kwa kulonga, “Naboti nakatowigwa kwa maganga mbaka nakabagama.”
15Baho du Yesebeli loyahuliche kota Naboti nakabagama kwa kutowigwa kwa maganga, nakamlonjela Ahabu, “Winuche, ulute ukaudite wula mgunda wa mizabibu wa Naboti uwe wa hegwe uwele nakalema kukuguzila. Naboti hawele mkomu, nakabagama.”
16Ahabu loyahuliche kota Naboti nakabagama, nakaluta kuudita mgunda wa mizabibu wa Naboti uwe wa heye.
17Hamba ulonzi wa Mkulu Nguluwi naumuyila mloli Eliya wa Tishibe,
18“Winuche, ulute kiting'hana na Ahabu, mndewa wa Isilaeli, yula yalongoze ako Samaliya. Komfika kuli mgunda wa mizabibu wa Naboti, uwele heye nakaudita uwe wa heye.
19Mlonjele Mkulu Nguluwi kangulonga hino, ‘Ndaze, humkopole munhu na kuhola isi ya heye?’ Hamba mlonjele Mkulu Nguluwi kangulonga hino, ‘Honhu hawele mibwa najimyanga danda ya Naboti, mibwa jomyanga danda ya hegwe, ena, danda ya hegwe.’ ”
20Ahabu loyamuwene Eliya, nakalonga, “Lelo nakumhata, hegwe mng'honyo wa heni?” Eliya nakedichila, “Ena, nandikupata, kwa vila nakunuwila ng'hatu kudita gehile hali Mkulu Nguluwi.
21Mkulu Nguluwi kangulonga hino, ‘Ndokugalila kubagama. Ndolidumya ivyazi lya hegwe Ahabu na kumkopola chila mlelwa mlume kulawa lulelo lwa hegwe kuli Isilaeli, yawe mpogozi ama yelejehe.
22Ndolidita ivyazi lya hegwe liwe kota lya Yeloboamu, mwana wa Nebati na kota ivyazi lya Baasha, mwana wa Ahiya, kwa vila nakunzudiza kwa kuwambuza wanhu wa Isilaeli wadite gehile.’
23“Mkulu Nguluwi kahi kangulonga ahi kuwala Yesebeli, ‘Mibwa jolya lukuli lwa Yesebeli habehi na lukanzi lwa muji wa Yesileeli.
24Mibwa jowalya wala wa ivyazi lya Ahabu wawele wobagama kuli muji na wala wawele wobagama kuli migunda, videje vyowalya.’ ”
25Haduhu munhu yaganile kudita gehile hali Mkulu Nguluwi kota Ahabu, yawele nakeguza yuye kudita wihe hali Mkulu Nguluwi kwa kwambuzwa na Yesebeli, mche wake.
26Nakadita izudizo kwa kufugamila jimalukolo ja milungu kota vyowaditile Waamoli, wawele aho hamwande Mkulu Nguluwi nakawawinga hali wanhu wa Isilaeli.
27Ila Ahabu loyahuliche mbuli ayo kulawa kwa Eliya nakadadula mivalo ja heye, nakavala ivalo lya igunila na kuleka kulya. Nayali yowasa na kigubika mivalo ja igunila na kujenda kwa kunyenyetela.
28Aho ndo ulonzi wa Mkulu Nguluwi naumuyila Eliya wa Tishibe na kulonga,
29“Nakumona Ahabu vyoyenyenyeteze hali heni? Kwa vila nakedulisa heye yuye, sikugala kudumya kuno yawele yang'hali mkomu, ila ndoligalila kubagama ivyazi lya heye kuli mazuwa ga ukomu wa mwanage.”