1Nà ade-ʋaazeelai Feɓé ɠalivaazu wo ma, anzanui nii é boti ɠɛɛzu Sankelé Egilisii zu.
2À yeezei bu ga pagɔ de-Maliɠii laaseigi zu, ʋelei soloogai la GALA ná-nuiti ma. À ɠɛ zeema fai pɛ su, nii a ɓɛdɛ ma, é lo wo ʋa. Tɔ ɓɔɠɔi ɓɔga nu mɔinmɔin ba, nà ɓɔɠɔi ɓalaagi.
3À Pilisile ta Akilaseni tuʋɔ, gá niiti gi botii ɠɛɛzu ʋɔɔma Yesu Kilista ná-fai zu.
4Ti ɠikulani ti-yɛnvui zu, ti ʋa nɔ̀nɔi ɠizo. Nà ɠila nɔ laade, gè ʋa ɠɛ ga naa wuuɠwɛɛ nui ti ʋɛ, kɛlɛ zii ɠiligiti ta-Egilisiiti ɓalaa.
5À Egilisii luʋɔ, é gaalɛbai wosu ta-ʋɛlɛi wu. À nɛ̀ɛɲɔɠɔi Epayinɛte luʋɔ. Tɔ ɠa é ɠɛni ga nu mɔungi é ɠidaaleʋeni Kilista ma, Azi yooi zu.
6À Mali luʋɔ, nii é ɓɔlɔni gola wo ʋɛ.
7À nà-nuiti tuʋɔ Andelonikuseni ta Zuniase, gá tiyani ka gi ɠɛni kasoi ɠa ʋɔɔma. Ta ga nu wolaa keelaiti saama. Ti ɠidaaleʋeni Kilista ma nɔ̀un tuɠɔ.
8À Amapiliatuse luʋɔ. Toɠa ga nɛ̀ɛɲɔɠɔi Maliɠii ná-fai zu.
9À Wuulebɛn luʋɔ, gá niiti gi boti ɠɛɛzu ʋɔɔma Kilista ná-fai zu, ta nɛ̀ɛɲɔɠɔi Setakise.
10À Apɛlɛse luʋɔ, nii é ná-wooɠɛɠiladai ɠulani kɛlɛma Kilista ná-fai zu. À Alisitobule ná-pɛlɛwu nuiti tuʋɔ.
11À ná-nui Elɔdiɔn luʋɔ. À Naalesise ná-pɛlɛwu nuiti tuʋɔ, niiti ti ga Maliɠii nɔnɔiti.
12À Maliɠii ná-botiɠɛ anzanui niiti tuʋɔ bɛ̀, ti ga Tilifɛne ta Tilifɔze. À Pɛɛleside luʋɔ, nɛ̀ɛɲɔɠɔi, tɔ ɓalaa ka ga anzanu nii é boti mɔinmɔin kɛa Maliɠii ʋɛ.
13À Lufuse luʋɔ, nii Maliɠii yiimazeɠeai la, ta dee, nii é ga nà ɓalaagi dèe.
14À Asinkeliteni tuʋɔ, ta Felegɔn, ta Ɠɛɛlemɛse, ta Patɔlɔbase, ta Ɠɛɛlemase, ta de-ɠɛɛleaiti ti ada ɠila.
15À Filolɔgeni tuʋɔ, ta Zuli, ta Nelé, ta baazeelai, ta Wolimepase, ta kidaaleʋe nuiti pɛ ti ti ʋɔ bɛ.
16À ɓɔɠɔ luʋɔ ga nɛɛnɛi. Kilista ná-Egilisii pɛ ka wo luʋɔsu.
17Kɛ̀ɛleaiti, nà wo maanɛɛnɛzu, à dama ga naati ta-vai, niiti ti gaaɠwɛɛ vai ɠɛɛzu, ti kidaaleʋe nuiti kakasu, ti ti wuzeɠezu kalagi laalɔɠɔma, nii wo sɔlɔɔgai. À maaɠooza ti ʋa.
18Mazɔlɔɔ naama nu ziiti ti la boti ɠɛɛzu Kilista ʋɛ, de-Maliɠii, kɛni ti-ɠogi nɔ. Ta-ɓɔɛ ʋagɔiti ta nu lɛsu ɓɔɛiti maaʋele ma, ta kaka fai lɔɔzu nuiti ziimaʋɛ, niiti ti la ɠidaazu faa wu.
19Ɛsɛ pɛ ge wa-ɠoloi ɠwɛɛ Maliɠii ʋɛ. Kòozunɛɛʋɛ deɠɛmu wa-vaa zu, kɛlɛ wɔ̀inʋɛ ga wo ɠɛ ga ɠima nuiti faa ʋagɔi ɠɛɛ vai zu, ta wo ɠɛ ga sɔbalala nuiti faa ɲɔi letemazu.
20Ná tago ʋe niina, ziilɛi fee ƓALAGI ʋa é Setana ɠoloɠolo wo-ɠɔɠɔi wu. Ade-Maliɠii Yesu ná-zaalai yɛ wo ʋa!
21Timɔte ɠa wo luʋɔsu, gá tɔ ɠa gi botii ɠɛɛzu ʋɔɔma, Lusiyuse ɓalaagi, ta Zazɔn, ta Sozipatɛɛl, nà-nuiti.
22Nɛ̀i gè ga Tɛɛlɛsiyuse, gè niima zɛʋɛi ɠɛai Pɔle ʋɛ, nà wo luʋɔsu de-Maliɠii laaseigi zu.
23Nà-wɛɛn kɛɛɠɛi Gaiyuse ɠa wo luʋɔsu, ná-pɛlɛi wu ɠa Egilisii pɛ ge ɠaalɛɛzu ba ná. Elasete, é ga taai ná-wali makɛ nui, ta ade-ɠɛɛloin Kaalatuse, naati ta wo luʋɔsu.
24[Ade-Maliɠii Yesu Kilista ná-zaalai yɛ wo pɛ wo ʋa. Amina!]16:24 Wooi niiti ti [ ] kpaku felegɔiti zɔɠɔzu, naati ti la sɛʋɛ wɔlɔmai tanigaa zu.
25Lɛbiyai ɠɛ GALA bɛ! Zobogi ɠa bɛ, é wo zɛbɛlɔ kidaaleʋei zu, é zoloo Woo Niinɛ Ʋagɔi ma, nii gè daazeelizu, ta tɛnɛgi gè bosu Yesu Kilista ná-fai zu, eɠɛʋelei naama vaaɠwɛgi la gi sɔlɔɔni, GALA ná-faazeikpasui ma lɔɔɠuzu vai, nii dɔɔɠua ɠɛni de kaite wɔlɔwɔlɔ,
26kɛlɛ niizu é ɠulaa kɛlɛma GALA goo wo nuiti ta-zɛʋɛiti su, eɠɛʋelei Ɠɔoɠɔ GALAGI ná-devei la, ziiti pɛ ti faa ɠwɛɛga su, nii a kɛ ti ɠidaaleʋe, ti ɠolo bɛ.
27Lɛbiyai ɠɛ ɠima ƓALA gila kpegi ʋɛ ga Yesu Kilista maaʋele, eyɛsu ɠɔ! Amina!