1Adɛiti de-zɛbɛi wɔɔlɔai kidaaleʋei zu, de maanɛɛʋɛ de yiilɔɔ naati ta-zɛbɛsulalai wu, niiti ti la ga de ɠɛʋele, de mina ʋilɛ de ɓɔɠɔyiimai nɔ ʋolu.
2Kɛni de ɠilagilagi pɛ de ɠaaɓa de de-zeiɲɔɠɔi yiima vai ɠɛ, é ɠɛ ga faa ʋagɔ bɛ, ga é li luɠɔma kidaaleʋei zu.
3Mazɔlɔɔ anɛɛ Kilista ɓɔɠɔi la ɠɛni ɓɔɠɔyiima vaa ɠɛɛni. Kɛlɛ sɛʋɛʋɛ mu GALA Sɛʋɛi zu ga:
4Tama fai niiti kpein ti zɛʋɛai mɔungi, naati sɛʋɛʋɛ de ɠala fai ma, naa ɠa a kɛ ade kitogi zɔlɔɔ ziilɔɔi maaʋele ma ta gaanɛɛnɛi, GALA Sɛʋɛi ti veezu de ya.
5GALA nii é ziilɔɔi veezu, é gaanɛɛnɛi wo, naa ma zobogi ve wo ya, wo ɠɛ ga koozu ɠisiɛ ɠila bo nu, eɠɛʋelei Yesu Kilista ɠɛʋelei la,
6naa ɠa a kɛ, wo zoloo faa ɠila ma, woo ɠilagi zu, wo ɗa GALA dɛbi, nii é ga de-Maliɠii Yesu Kilista Kɛɛɠɛ.
7À yeezei ɓɔɠɔ wu wo ɠilagilagi pɛ, eɠɛʋelei Kilista yeezeiɗai la wo wu, GALA ná-lɛbiyai vaa ma.
8Mazɔlɔɔ nà bosu wo ma ga: Kilista ɠɛni ga Zuifuiti ta-wotiɠɛ nui, ga é ʋa GALA ná-minazeɠegiti daazeeli, é ti ɠɛɛni ti-mɛmɛwolani bɛ, ta é GALA ná-gaamai ɠula kɛlɛma ga pagɔ.
9É ʋaani ɓalaa, nii a kɛ zii ɠiligiti ti GALA dɛbi ná-gaazumaawɔinɠai ma vaa zu, eɠɛʋelei sɛʋɛai la GALA Sɛʋɛi zu, é ɠɛ ma:
10Sɛʋɛʋɛ mɔnɔ, é ɠɛ ma:
11É ɠɛ ma naa ʋolu:
12Ezayi ɓalaagi ɠɛni ma:
13Kito GALAGI ɓɔɠɔi wo laave ga koozunɛɛi, ta ná-ziilɛigi pɛ kidaaleʋei zu. Naazu wo-yii laa ɠa ve ga kitogi, é ʋooʋa ma Zɛnvu Ɲadegai zɛbɛi zu.
14Kɛ̀ɛleaiti, nà ɓɔɠɔgoi, kìsuɠalagɛ wa-vaa zu, ga wo laavegɛ ga kɛʋele ʋagɔi pɛ, ta faaɠwɛgi pɛ, wa zoosu ɓalaagi wo ɗa ɓɔɠɔ lɛnɛ wo ɠilagilagi pɛ.
15Anɛɛ naa ʋe, kɛʋelei tanigaani su, gè sɛʋɛi ɠɛɛni wo ma ga ziilɔɔi, gè wo ɠitoo naama vaiti su wo ti ɠwɛɛ, zaalai maaʋele ma nii GALA ge daai mà,
16ga gè ɠɛ ga Yesu Kilista ná-botiɠɛ nui zii ɠiligiti bɛ, nà zalaɠa ɠula wotii ɠɛɛzu ga gè ɗa GALA ná-Woo Niinɛ Ʋagɔi laazeeli, naa ɠa a kɛ zii ɠiligiti ti ɠɛ ga zalaɠai nɛai GALA bɛ, ɲadegai Zɛnvu Ɲadegai ya.
17Gá-ɠilibalai maaʋele ma gá Yesu Kilista, nà zoo gè ɓɔɠɔ maamusɛ GALA ná-botii zu.
18Mazɔlɔɔ gè la zooga gè ʋa faa nɔpɛ bo, kɛni nii Kilista kɛai ga nɔ̀un maaʋele, ga zii ɠiligiti ti ʋa, ti ɠolo GALA bɛ. É naa ɠɛɛni ga nà-kpɔɛzuɠulaiti ta nà-kɛɛwotiiti maaʋele,
19ta laavɔɔ vai ma zɛbɛiti ta maaɓɛlɛ vaiti maaʋele, ta GALA Zɛnvui ná-zɛbɛi maaʋele. Ʋele ɠana gè Woo Niinɛ Ʋagɔi laazeelini la mɛtu, é ʋilɛ Kilista ʋa, é zo Zeluzalɛme ma, eyɛsu é zeeli Iliili yooi zu.
20Kɛlɛ gè ɠaaɓaani, ʋɛ nɔpɛ Kilista laaseigi la ɠɛni dɛ woni ná, gè Woo Niinɛ Ʋagɔi laazeeli miná, naa ɠa a kɛ gè mina pɛlɛi lo taɠili ná-seɓasemai maazu.
21Gè kɛɛni, eɠɛʋelei sɛʋɛai la GALA Sɛʋɛi zu, é ɠɛ ma:
22Naa ɠa é pele leʋeni tùɠɔ siɛ mɔinmɔin su, gè ʋa li wo ʋɔ bɛ.
23Kɛlɛ niizu niina, gè nà-botii ɓega niima yooi zu. Tɔɔzei kona mɔinmɔin daawu wɔin ɠɛni mà, ga gè ʋa, gè laali wo ma,
24nà ɠisiɛzu ga gè naa ɠɛ, siɛgi zu gè liizu la Ɛsepaɲɛ yooi zu. Toɠa kìsu ga gè wo ɠa nà ɠɛna leʋega, gè wa-ɓɔbai zɔlɔɔ, gè lii la naama yooi zu, ada ɓɔɠɔ lago wɔinɠulana.
25Niizuʋɛ, nà liizu Zeluzalɛme, kidaaleʋe nuiti maavaa ɠɛɛ vai ma.
26Mazɔlɔɔ Masedoane ta Akayi Egilisiiti ti deveʋɛ ga ti ani ɠaalɛ ba, ti ɓɔ da kidaaleʋe nuiti ba, ti ga bala nuiti Zeluzalɛme.
27Ti deveni tiya ɓɔɠɔi, kɛlɛ gaamazu, ti maanɛɛni ti naa ɠɛ, bala nui naati bɛ. Mazɔlɔɔ ni zii ɠiligiti ti tɔnɔ zɔlɔɔga zɛnvu zu vaiti su ga Zuifu ɠidaaleʋe nuiti maaʋele, tiya ɓalaa, ti maanɛɛʋɛ, ti ɓɔ naati ba ga ti-yeaɠɔligiti.
28Nà ɓena feya ga niima vaiti gaaɓela, gè naama vebɛaniiti fe ti ya, nà ɠɛna lia Ɛsepaɲɛ, nà leʋe niina ga wo ʋɔ pelei.
29Gè kwɛɛ gè ɠɛ, siɛgi zu gè ʋaazu la wo ʋɔ bɛ, nà ʋaazu ná ga Kilista ná-tuyai, nii daazeeliai mɛtu.
30Kɛ̀ɛleaiti, nà wo maanɛɛnɛzu ade-Maliɠii Yesu Kilista maaʋele ma, ta Zɛnvu Ɲadegai ná-nɛɛbɛi maaʋele ma, ga wo ɓɔ bà, ade ɲɛpii ɠɔ bɛ̀ ga GALA faliiti.
31À GALA fali ga gè ɠizo Zudé ɠidaaleʋelala nuiti ma, vebɛaniiti gè liizu ga tiye Zeluzalɛme, kidaaleʋe nuiti ti yeezei ti wu ná ga pagɔ,
32naa ɠa a kɛ, gè zeeli wo ʋɔ bɛ koozunɛɛi zu, GALA ga laana ga, nà lago looɠo wo zaama.
33Ziilɛi fee ƓALAGI ɠɛ wo pɛ wo ʋa! Amina!