1Izilayɛle nuiti pɛ daaseigi zɛʋɛni ga pɛlɛyeɠe ʋelei, daasei sɛʋɛ zɛʋɛ wolai zu, nii é ɠɛni masagiti zea. Zuda nuɓusɛiti ti liini Ɓaɓilɔne duɔlai zu, tɔɔzei ta-wooʋaladai ʋa.
2Niiti ti ɠɛni ga nu mɔun ti ɠale ma ʋolu ta-yooiti su, ti zei ta-laaiti su, naati ti ɠɛni ga Izilayɛle nuiti, zalaɠa ɠula nuiti, Levi mavofodaiti, ta niiti ti ɠɛni botii ɠɛɛzu GALA sei ʋɛlɛi wu.
3Naa ʋoluma, Zuda, Ɓɛnzamɛn, Efelayime ta Manasé wolodamaiti su nuiti ti ʋaani, ti zei Zeluzalɛme.
4Zuda wolodamaiti su, zɔiti ti ʋaani, naati ti ɠɛni ga: Utayi, nii é ɠɛni ga Amiyude ná-doun zunui, Amiyude naa ɠɛni ga Womeli ná-doun zunui, é ɠɛ ga Imili ná-dounloin, Imili naa ɓalaa kɛɛɠɛ ɠɛni ga Ɓani, nii é ɠɛni ga Pelɛze ná-bolodai zu nui ta.
5Silo nuiti su, niiti ti ʋaani, ti zei, ti ɠɛni ga: ná-doun zunu mɔungi Azaya ta ná-doun zunuiti.
6Zela mavofodaiti su, zɔi é ʋaani, é zei, naa ɠɛni ga: Yeyuwɛle. Zuda wolodamaiti su nuiti niiti ti zeini Zeluzalɛme ti ɠɛni ga nu undɔzita nu ʋuutaaʋuugɔ (690).
7Ɓɛnzamɛn wolodai zu niiti ti ʋaani, ti zei, naati ti ɠɛni ga: Salu, Mesulame ná-doun zunui, é ɠɛ ga Wodavia ná-dounloin, é ɓalaa ga Ɠasenua ná-dounloun loin.
8Naa ʋolumai ɠɛni ga Yiɓeneya, Yeloɠame ná-doun zunui, Ela, Uzi ná-doun zunui, é ɠɛ ga Mikili ná-dounloin, Mesulame, Sefatia ná-doun zunui, é ɠɛ ga Leyuwɛle ná-dounloin, é ɓalaa ga Yiɓiniya ná-dounloun loin.
9Ɓɛnzamɛn wolodai zu niiti ti ʋaani, ti zei, naati ti ɠɛni ga nu untaaʋuugɔ puulɔɔlugɔ maazu lɔzita (956), naama nuiti pɛ ti ɠɛni ga pɛlɛyeɠe lotuɠɔiti.
10Zɔiti ti ʋaani zalaɠa ɠula nuiti saama, naati kaa, é zo lointi ma, é li ɠɛɛɠɛiti pɔ: Yedaya, Yeɠoyaliɓe, Yakin,
11Azalia, Yilikiya, Mesulame, Sadɔke, Melayɔte, Ayituɓe, naa ɠa é ɠɛni ga GALA sei ʋɛlɛi ma lotuɠɔi.
12Adaya ɓalaa ge ɠɛni ná, Yeloɠame ná-doun zunui, nii mɛmɛwolani ti ɠɛni ga: Pasuul ta Malikiya. Mayesayi ɓalaa ʋaani, Adiyɛle ná-doun zunui, nii mɛmɛwolani ti ɠɛni ga: Yazela, Mesulame, Mesilemite, naa ʋɛɛ Imɛɛl ʋa.
13Naati ti ʋɛɛ zɔɔma zalaɠa ɠula nuiti ba, ti ga pɛlɛyeɠe lotuɠɔiti, ti pɛ kpɔga ɠɛni ga nu waagila undɔfela puulɔzita (1.760), ti ɠɛni ga zɛbɛsu nuiti ta nu ɓiigiti, ti ɗa botii ɠɛ GALA sei ʋɛlɛi wu.
14Levi mavofodaiti saama, zɔiti ti ʋaani, ti zei, naati kaa é zo lointi ma, é li ɠɛɛɠɛiti pɔ: Semaya, Ɠasuɓe, Azilikame, ta Ɠasaɓiya, niiti ti ɠɛni ga Melali ná-pɛlɛyeɠei wu nuiti.
15Ɓakeɓakaal ɓalaa ɠɛni ná, naa ʋɛɛ Ɠelɛse ʋa, ta Galale, naa ʋɛɛ Matania ʋa, nii é ɠɛni ga Misé ná-doun zunui, é ɠɛ ga Zikili ná-dounloin ta Azafe mavofodai.
16Aɓediyase ɠɛni ná, Semaya ná-doun zunui, Galale ta Yedutun ti-mavofodai. Ɓelekia ɠɛni ná ɓalaa, Aza ná-doun zunui, é ga Ɛlɛkana ná-dounloin, nii é ɠɛni ɲii wosu Netofa nuiti ta-laaiti su.
17Siɠida makɛ nuiti ɓalaa ti ɠɛni ná: Salume, Akuɓe, Talamɔn, Ayiman, ta ti-ɠɛɛlointi. Salume ɠa é ɠɛni ga ta-lotuɠɔi.
18Zaaɠaza mavofodaiti ka dɛ ti botii ɠɛɛzu GALA sei ʋɛlɛi laaʋɛ folo ɠulazu ʋelei, ʋɛ ná laaseigi ʋɛai ga masagi ná-siɠidaʋɛ. Siɠida makɛ nuiti ka ti ɠɛni Levi mavofodaiti saama.
19Salume, Kolé ná-doun zunui, Eɓiyasafe ta Kolé ti-mavofodai, ta Kolé ʋɛlɛyeɠei zɔiti pɛ bu nuiti, ti ɠɛni ga GALA daaɠomi seɠe ʋɛlɛi laaʋɛ makɛ nuiti, eɠɛʋelei ti-mɛmɛwolani ti ɠɛni Ɠɔoɠɔ GALAGI ná-seɠe ʋɛlɛi laaʋɛ makɛsu la.
20Mɔungi Eleazaal ná-doun zunui Fineyase ɠa é ɠɛni ga ta-lotuɠɔi, tɔɔzei Ɠɔoɠɔ GALAGI ɠɛni ba.
21Meselemia ná-doun zunui Zakali ɓalaa ɠɛni ga GALA daaɠomi seɠe ʋɛlɛi laaʋɛ makɛ nui ta.
22Niiti kpein ti yeeloni ti ʋa ga ti ɠɛ ga siɠida makɛ nuiti, ti ɠɛni ga nu unfelegɔ nu puu maazu felegɔ (212). Ti-laaseigiti ti zɛʋɛni ga taa ʋelei. Davide ta GALA goo wo nui Samiyɛle ti naama losuʋɛ veeni ti ya eyɛsu ɠɔ.
23Tiya-o, ti-mavofodaiti-yo, ta-wotii ɠa ga ti ɗa Ɠɔoɠɔ GALAGI zei ʋɛlɛi laaʋɛ makɛ, seɠe ʋɛlɛi laaʋɛ.
24Siɠida makɛ nuiti ti ɠɛni ʋepema naanigɔiti pɛ su: folo ɠulazu ʋelei, folo liizu ʋelei, lɛkpɛmaʋɛ nu ɠɔʋɛzu ʋelei ta lɛkpɛmaʋɛ nu yeezazu ʋelei.
25Siɠida makɛ nui zɔi niiti ti ɠɛni ti ɓɔɠɔ laaiti su, naati ti ɓena ʋa, ti ɗa dɔɔɠɔ ɠilagilagi ɠɛ ti ɠoba.
26Kɛlɛ siɠida makɛ nu ɓii naanigɔi niiti ti ɠɛni ná nɔ ɠɔ, Levi mavofodaiti ge ɠɛni ga tiye, tiya ɠa ti ɠɛni wɛlɛzu ɲii wosuʋɛti ma, ta GALA sei ʋɛlɛi ma naavolo makɛsuʋɛ ma.
27Ti ɠɛni ɲiizu piin GALA sei ʋɛlɛ maaɠoolii zu, tɔɔzei tiya ɠa ti ɠɛni wɛlɛzu ma, naa ʋoluma, kɛni sobu-o-sobu ti ma ʋɛlɛlaʋɛti daalao.
28Tanigaa ta-wotii ɠɛni ga ti ɗa wɛlɛ GALA sei ʋɛlɛi wu zɔɔlaiti ma, siɛgi zu ta la ɠɛna ɠulaa la ga tiye, ta la ɠɛna ɓalaa ti lɛa pɛlɛi wu, ti ɓena ti ɠaalu.
29Taɠiligaa tɔnɔi ɠɛni ga ti ɗa wɛlɛ aniɲakai mɔtaiti ma ta zalaɠa ɠula zɔɔlaiti, naa ʋɛɛ ɓulu vukɔ ʋagɔi, dɔɔi, gulɔi, ansansegi, ta tufa maku nɛɛnɛgiti ba.
30Kɛlɛ zalaɠa ɠula nuiti ɓɔɠɔgo ti ɓena tufa maku nɛɛnɛgi naati kpɛtɛ.
31Levi nu ɠila ge ɠɛni ná, é ga Kolé mavofodai Salume ná-doun zunu mɔungi, daaseigi ɠɛni ga Matitia, naa ná-botii ɠɛni ga é ɗa ɓului ɓɛtɛ, nii é ɠɛni ɠɛɛzu ga vebɛ zalaɠai.
32Levi mavofodai taɠiligaa niiti ti ɠɛni ga Keɠate ʋaalobaiti ta, naati ta-wotii ɠɛni ga ti ɗa ɓului ɓɛtɛ, nii é ɠɛni ɠɛɛzu ga zalaɠai Ɠɔoɠɔ GALAGI ʋɛ dooɠo folo ɠilagila.
33Levi ʋɛlɛyeɠe lotuɠɔi niiti ti ɠɛni guye loo vai unda, naati ti ɲii ʋɛlɛiti ti ɠɛni ná, ti-ʋɔ ge la ɠɛni zɔɔma wotii tanɔpɛ ba, tɔɔzei kpidi ʋɛɛ folo ʋa botii ɠɛni nɔ ti ya.
34Levi ʋɛlɛyeɠe lotuɠɔiti kana, eɠɛʋelei ti-mavofodaiti ti la. Ti ɠɛni zeini Zeluzalɛme.
35Gaɓaɠɔn kɛɛɠɛ Yeiyɛle ɠɛni zeini Gaɓaɠɔn taazuʋɛ, ta anzai nii daaseigi ɠɛni ga Maaka.
36Ná-doun zunu mɔungi laaseigi ɠɛni ga Aɓadon, naa ʋolu Suul, Kise, Ɓaale, Nɛɛl, Nadaɓe,
37Gedɔɔl, Ayiyo, Zakali, ta Mikelɔte.
38Mikelɔte ná-doun zunui ɠɛni ga Simeyame. Niima nuiti ɓalaa ti zeini Zeluzalɛme, ti-ɠɛɛlointi koba.
39Nɛɛl Kise zɔlɔɔni, Kise Sayile zɔlɔɔ. Sayile ná-doun zunuiti ti ɠɛni ga: Zonatan, Malekisua, Aɓinadaɓe, naa ʋɛɛ Eseɓaale ʋa.
40Zonatan Meliɓe-Ɓaale zɔlɔɔni, Meliɓe-Ɓaale Misé zɔlɔɔ.
41Misé ná-doun zunuiti ti ɠɛni ga: Piton, Melɛke, ta Taalea.
42Aɠaze Yayela zɔlɔɔni, Yayela ná-doun zunuiti ti ɠɛni ga: Alemɛte, Azamavɛte, ta Zimili. Zimili Mosa zɔlɔɔni,
43Mosa Ɓineya zɔlɔɔ, Ɓineya Lefaya zɔlɔɔ, Lefaya Eleyasa zɔlɔɔ, Asɛle zɔlɔɔ.
44Doun zunu lɔzita ɠa Asɛle sɔlɔɔni, ti laaseigiti kaa: Azilikame, Ɓokelu, Isemayɛle, Sealia, Aɓediyase naa ʋɛɛ Ɠanan ʋa. Asɛle ná-doun zunuiti kana.