1Filisiti nuiti ti kɔɔi ʋɛɛni Izilayɛle nuiti ba. Izilayɛle nuiti ti ʋelani ti ʋa, ti-ma mɔinmɔin ge zaani ti zaama, Gileɓoa gizei ma.
2Filisiti nuiti ti ɠaaʋoteni ga ɠiteɠite Sayile ma, ta ná-doun zunuiti. Ti ná-doun zunuiti paani: Zonatan, Aɓinadaɓe, naa ʋɛɛ Malekisua ʋa.
3Kɔɔi ɠaaʋoteni Sayile nɔ ma niina. Mɛɛn ʋili nuiti ti kaani, é wola lua.
4Sayile ɠɛni ná-kɔɔɠɔ zɔɔla zeɠe nui ma: «Ɗa-woɠa zɔkpɔi ɠula ma laɠagi zu, è pàa, nii a kɛ tatipɛlɛʋolulala nui niiti ti mina ʋa pàazu, ti ʋa ɓaaɠula mà.» Kɛlɛ naa la ɠɛni kɛɛni, tɔɔzei é ɠɛni ɓalizu ga dualuagi. Sayile ɓɔɠɔi ɗa ná-boɠa zɔkpɔi zeɠe, é lɔ ga.
5Ná-kɔɔɠɔ zɔɔla zeɠe nui kaai ma ga é zaa, tɔ ɓalaa é lɔɔni nɔnɔ ma woɠa zɔkpɔi ɠa, é za.
6Ʋele ɠana Sayile ta ná-doun zunu saʋagɔiti pɛ ti zaani la ʋɔɔma, naa ʋɛɛ ná-pɛlɛyeɠei pɛ ba.
7Izilayɛle nui niiti pɛ ti ɠɛni pɛtugi zu, ti kaai ma ga Izilayɛle ɠɔɔʋɛbɛi ʋela, ta Sayile naa ʋɛɛ ná-doun zunuiti ba ti za, tiya ɓalaa ti ɠulani ta-laaiti su, ti ʋela. Filisiti nuiti ti ʋaani, ti zei naama laaiti su.
8Poluma voloi Filisiti nuiti ti ʋaani kɔɔ lɔɓɔi zu, nii a kɛ ti poomaiti kɔligiti seɠe. Ti Sayile ta ná-doun zunuiti ma ʋoomaiti kaani Gileɓoa gizei ma.
9Ti Sayile ná-kɔɔɠɔ zɔɔlaiti seɠe, ti nɔungi leʋe ba, ti li ga ná-kɔɔɠɔ zɔɔlaiti ta nɔungi. Naa ʋolu ti ta-vɔnifaamai ma wooi laazeeli Filisiti yooi ná pɛ su, daazeeli nuɓusɛiti ta ta-ɠɔɔɠɔ ganigiti ma.
10Ti Sayile ná-kɔɔɠɔ zɔɔlaiti daani ta-ɠalagiti ta-ʋɛlɛi wu, ti Sayile nɔungi zɛlɛ ta-ɠalagi Dagon ná-pɛlɛi wu.
11Siɛgi zu Galaade yooi zu Yaɓese nuiti ti naa pɛ mɛnini da, nii Filisiti nuiti ti kɛai ga Sayile,
12kɔɔɠɔ nu ɠɛzɛɠɛzɛgiti ti ʋilɛni pelei ma, ti Sayile ta ná-doun zunuiti ma ʋoomaiti seɠe, ti ʋa ga tiye Yaɓese. Ti naati ma ɠaeiti maaɠulu, sɛne gului wu Yaɓese, naa ʋoluma ti zugi zoni folo lɔfela laawu.
13Sayile saai zɔlɔɔni, tɔɔzei kololalai ʋa, nii é kɛɛni ga Ɠɔoɠɔ GALAGI. É la ɠɛni kɛɛni, é ʋa ɠolo Ɠɔoɠɔ GALAGI wooi ʋɛ, naa ʋoluma é liini gɔvɛ laawooleʋe nui ta ʋɔ, é ɠɛ naa gɔvɛi ta ɠaazaɠa bɛ,
14aisa tɔun é ʋa Ɠɔoɠɔ GALAGI ɠaazaɠa. Ɠɔoɠɔ GALAGI vaani bu é za, tama é masadai zeɠe, é fe Izayi ná-doun zunui Davide ya.