1 Dɔlɔ Sɛʋɛi 17 — GALA Daawoo Zɛʋɛi | Bíblia online

¹Tɛi masagi Davide zeini ná-pɛlɛi wu, é ɠɛni GALA goo wo nui Natan ma: «Wɛlɛ! Nà ɲiizu masa pɛlɛi wu, nii togai ga sɛdele gului, Ɠɔoɠɔ GALAGI ná-minazeɠe kesui ma ge ɗa ɲi seɠe ʋɛlɛi wu.»

²Natan Davide wooɠaaʋoteni, é ɠɛ ma: «Nii nɔpɛ é è yiima, è kɛ, mazɔlɔɔ GALA ka è ʋa.»

³Kɛlɛ naama ɓidii, Ɠɔoɠɔ GALAGI ɓɔɛni Natan ʋɔ ɠani:

⁴«Li, è ɠɛ nà-botiɠɛ nui Davide ma: ‹Ɠɔoɠɔ GALAGI wooi ɠaa: Ɗa laade è ʋa ɠɛ pɛlɛ losu bɛ̀, ʋɛ nà zei ná.

⁵É lɔɔzei Izilayɛle nuiti kula yee ma bɛ̀ Ezipete yooi zu, é zeeli za ma, kaipa sèizu la ɠɛni ga pɛlɛ wu. Kɛlɛ gè ɠɛni ti ʋa ʋɛ nɔpɛ ta la ɠɛ ná, tama gè ɠɛni seɠe ʋɛlɛi wu, GALA daaɠomi seɠe ʋɛlɛi wu.

⁶Yeeɠɛɠalai nii pɛ gè kɛɛni Izilayɛle nuiti polu, gè ɠɛni totuɠɔiti seizu ga ti lo ná-nuɓusɛiti Izilayɛle nuiti tuɠɔ, kɛlɛ ti zaama ɓɛ ɠa gè ɠɛni ma: Lee vaa zu wo la pɛlɛ losu bɛ̀ ga sɛdele gului?

⁷« ‹Pɛtɛ, nii ɠa è liizu niina, è bo nà-botiɠɛ nui Davide ma: Ɠɔoɠɔ GALAGI, Fai-Pɛ-Maliɠii wooi ɠaa: Nà ɠa gè è zeɠeni baala makɛsuʋɛ tufa lɛnugiti su, gè è ɠɛ ga nà-nuɓusɛiti Izilayɛle nuiti ta-lotuɠɔi.

⁸Nii pɛ è yeeʋua bu, zɛ̀gɛ è ʋa naati pɛ su, gè è zili nuiti pɛ suwuɠaaleʋe. Nà lɛbiya laasei feezu è ya, ga etea nu wolaiti tɔnɔi ɠɛʋele.

⁹Nà seizu veezu nà-nuɓusɛi Izilayɛle nuiti zea, ʋɛ ta zei ná, ti la luaa ani nɔpɛ ba, telebotala nuiti ti la mɔ tɔɔzeiɗa ga ti ʋa ɗa ti zopele ɲɔu ga ma mɔungi zu ɠɛʋele,

¹⁰eɠɛʋelei tukpɔɠaaleʋe nuiti ta-ziɛgi ɠɛni la, niiti gè ti zeini nà-nuɓusɛi Izilayɛle nuiti unda. Nà è zili nuiti dɔ è yeezu. Naa ʋoluma, nɔ̀un nà, Ɠɔoɠɔ GALAGI, nà dɛɛzu ga ɗe ga ɗa-ʋɛlɛyeɠei ɠa ɠɛɛzu ga masa pɛlɛyeɠei.

¹¹« ‹Siɛgi zu è lii voloi zeelizu la è-mɛmɛwolani pɔ, nà è-mavofodai ta ɓɔɠɔɓɔɠɔ sei ga è-ʋotogi masadai zu, gè ná-masadai zei.

¹²Tɔ ɠa é ʋaazu pɛlɛ losu bɛ̀, nà ɓaa ná-masa kpɔkpɔgi maazu eyɛsu ɠɔ.

¹³Nà ɓɔɠɔi nà ɠɛ bɛ ga ɠɛɛɠɛi, tɔun ge ɠɛ bɛ̀ ga doun zunu. Kɛlɛ gè la nà-nuɓɔɠɔlai maaɠoozaa ba pɛ, eɠɛʋelei gè maaɠoozani la naama nui ʋa, nii é ɠɛni ná è luɠɔ.

¹⁴Nà sei nà-pɛlɛyeɠei ta nà-masadai zu eyɛsu ɠɔ, ná-masa kpɔkpɔgi la ɲiikpiga eyɛsu ɠɔ.› »

¹⁵Natan liini, é niima ɓɔɛiti pɛ ta ma ɠulakɛlɛmaiti pɛ daazeeli ga pagɔ Davide ma.

¹⁶Naa ɠɛai ma, Davide liini, é zei Ɠɔoɠɔ GALAGI ɠaazu, é GALA fali ɠani: «Màliɠii, Ɠɔoɠɔ GALAGI, nà ga leeni, nà-pɛlɛyeɠei ɓalaa ka ga leeni, è liizu dàazeelizu ʋɛ gè ná?

¹⁷È la mɔ naa ɠaani ga faa wola, ee, GALAGI. È minazeɠea ʋolu bɛ̀, nɛ̀i gè ga ɗa-wotiɠɛ nui, ga ʋelela ʋele vaiti ti maaɠoozaai, é ʋilɛ nà-masa pɛlɛyeɠei ʋa. Ɠɔoɠɔ GALAGI, ɗɔun ɗa sòsu eɠɛ nà ɠɛ ga nu ɓii.

¹⁸Lee ɠili ka nà bo è ma é ʋilɛ niima lɛbiyai ʋa, nii é feezu ɗa-wotiɠɛ nui ʋɛ? Ɗa ɓɔɠɔi è kwɛ̀ɛ, nɛ̀i gè ga ɗa-wotiɠɛ nui.

¹⁹Ɠɔoɠɔ GALAGI, tɛi ɗa-wotiɠɛ nui nɛai è ʋɛ, ta è devea ga è kɛ ɠani, naa ɠa è niima vaa wolaiti kɛa, è lati, è ti ɠula kɛlɛma.

²⁰«Ee, Ɠɔoɠɔ GALAGI, nu nɔpɛ ge la ga è ɠɛʋele, gala kili nɔpɛ ge la ná, é ɠula è ʋolu, eɠɛʋelei nɔ gi mɛnigai la ga gi-woiyeɠeiti.

²¹Eteai zu, zii ɓɛgele ɠa é ga ɗa-nuiti Izilayɛle nuiti kɛʋele, nii è liai, è ti unmɔɔ, ti ɠɛ ga ɗa-nuɓusɛiti? È lɔɠɔɠula faa ɠɛa, tɔɔzei faa wolaiti ta faa maayiki golaiti ba, è ti ɠɛai Izilayɛle ʋɛ, è zii ɠiligiti kpɛɛʋɛ ɗa-nuɓusɛiti tuɠɔ, è ti unmɔɔni, è ti ɠula Ezipete yooi ʋa.

²²È ɗa-nuɓusɛi Izilayɛle nuiti kɛa ga ɗa-nuɓusɛiti eyɛsu ɠɔ. Ɗa ma, Ɠɔoɠɔ GALAGI, è ɠɛa ga ta-ƓALAGI.

²³«Niizu niina, ee, Ɠɔoɠɔ GALAGI, soma kae yeenɔpɛ su, è ɓaa ɗa-minazeɠegi maazu, nii kɛa bɛ̀, nɛ̀i gè ga ɗa-wotiɠɛ nui, ta nà-masa pɛlɛyeɠei ʋɛ. Kɛ eɠɛʋelei è boga la.

²⁴Naama minazeɠegi laazeeli kae. Naazu ɗa lɛbiyai zɔlɔɔ eyɛsu ɠɔ, ta nuiti ti ɠɛ ma: ‹Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI ɠa ga GALA kiteɠite Izilayɛle ʋɛ!› Nɛ̀i gè ga ɗa-wotiɠɛ nui Davide, nà-masa pɛlɛyeɠei mina ɲiikpi pɛ è ɠaazu.

²⁵Mazɔlɔɔ, ee, nà-GALAGI, ɗa ɓɔɠɔi ɠa è dɛa ga ze, nɛ̀i gè ga ɗa-wotiɠɛ nui, ga ɗa masa pɛlɛyeɠei losu bɛ̀, naa ɠa é kɛa gè gaaɓaa zɔlɔɔga, gè niima maanɛɛnɛ wooi laazeeli è ma.

²⁶«Niizu niina, Ɠɔoɠɔ GALAGI, ɗa ɠa è ga GALA, ɗa ma ka, è minazeɠea bɛ̀ ga undaanɛɛi nii, nɛ̀i gè ga ɗa-wotiɠɛ nui.

²⁷Soma mu niina, è tuya loo nà-masa pɛlɛyeɠei ma, nii a kɛ é yɛ ná ɠɔ è ɠaazu. Mazɔlɔɔ, nii nɔpɛ ɗa tuya loo bɛ, ee, Ɠɔoɠɔ GALAGI, tuyai ɠa naa ma eyɛsu ɠɔ.»