1Davide salaʋusu ɠundiɠiiti pɛ gaalɛɛni ba, niiti ti ɠɛni nu waagilagilagiti ta nu ungilagilagiti unda, naa ʋɛɛ seizumaanɛgi zɔiti ba.
2Naa ʋoluma, é ɓɔɛni Izilayɛle ʋɛbɛi pɛ pɔ, é ɠɛ ti ma: «Ni wa kaana ga faa ʋagɔ ʋe, ni toɠa ɓalaa ada-ƓALAGI, Ɠɔoɠɔ GALAGI ná-faazeikpasui zu, ade keelaiti teʋena ade-ɠɛɛlointi pɛ ma, niiti ti yɛgai ʋoluzu Izilayɛle you zɛʋɛi ɠilagilagiti pɛ su, naa ʋɛɛ zalaɠa ɠula nuiti ta Levi mavofodaiti ba ti ta-laaiti su ta ná ɠoba yooi zu, nii a kɛ ti pɛ ti ɠaalɛ ba ade zaama.
3Naa ʋoluma, ada ʋa niina ga ada-ƓALAGI ná-minazeɠe kesui ade ɠoba. Tɔɔzei siɛgi zu Sayile ɠɛa la masadai zu ade unda, ade la yiizoolɛni ga ade ʋa li kalama.»
4Bɛbɛi pɛ ge zolooni naama ɠigi ma, ti deveni ga ti naa ɠɛ.
5Davide Izilayɛle nuiti pɛ gaalɛɛni ba, é zo Ezipete ɠɔtuɗɛi ma, é zeeli Leɓo-Ɠamate, nii a kɛ ti GALA ná-minazeɠe kesui zeɠe Kiliyate-Yeyalime, ti ʋaa la Zeluzalɛme.
6Davide ta Izilayɛle nuiti pɛ ti liini Ɓaala, nii é Kiliyate-Yeyalime, Zuda yooi zu, ga ti ʋa ga GALA ná-minazeɠe kesui, nii Ɠɔoɠɔ GALAGI laaseigi maalolisu ma, nii é zeini seeluɓɛinti unda.
7Ti GALA ná-minazeɠe kesui ɠulani Aɓinadaɓe ná-pɛlɛi wu, ti da wotolo niinɛi zu. Uza ta Ayiyo ɠa ti ɠɛni ziɛzu wotoloi luɠɔ.
8Davide ta Izilayɛle nuiti pɛ ti ɠɛni ɠoozunɛɛzu GALA gaazu, ti ɗa guyeiti too ga zɛbɛi pɛ, ti ɗa gɛingɛin ganigiti gɛin: kɔnigiti, papaiti, tamadegiti, kɔtɛgiti, ta puʋugiti.
9Ti zeeliai ma Kidon ná-molo loɠazuʋɛ, nikɛiti ti ɓunɛni, ti ɠɛni ɠɛɛzu ti minazeɠe kesui loo. Uza yeemaaleni, é so.
10Ɠɔoɠɔ GALAGI yiiɠaawanani Uza ma, é doɠa, tɔɔzei é yeevɔɔɠuni minazeɠe kesui ʋa. Uza zaani miná, Ɠɔoɠɔ GALAGI ɠaazu.
11Davide yiiɠaawanani, mazɔlɔɔ Ɠɔoɠɔ GALAGI nii ɠɛɠala loɠai woni ga Uza. Ná laasei ge ʋɛɛni ga Pelɛze-Uza (nii poluʋɛ ga «é ɠulaʋɛ Uza ma»), naama laaseigi ɠa dɛ é ba zaaɠaza.
12Naama voloi Davide wola luani GALA ba, é ɗa ɓɔɠɔ ɠaazaɠa ga: «Nà zoo ɠale gè lɛ ga GALA ná-minazeɠe kesui pɔ̀ bɛ?»
13Davide la ɠɛni liini ga minazeɠe kesui pɔ bɛ, Davide ná-taa wolai zu. Ti liini la Gate nui Woɓɛde-Edɔme ná-pɛlɛi wu.
14GALA ná-minazeɠe kesui yɛni ná alu saʋagɔ laawu. Ɠɔoɠɔ GALAGI tuya looni Woɓɛde-Edɔme ʋɛ ta nɔnɔiti pɛ.