1Siɛgi zu Davide ɠɛni lɔɔɠuzu la Sikilage, nii a kɛ é maaɠooza Kise ná-doun zunui Sayile ʋa, kɔɔɠɔ nui tanigaa ti ʋaani pɔ bɛ. Naati ti ɠɛni ga kɔɔɠuluɓa wolaiti ti ɠɛni yeeveezu bɛ kɔɔɠɔzuʋɛ.
2Mɛɛinti ti ɠɛni ti ya, ti zooni kɔɔi ɠɔɔzu ga ti-yeezaiti ta ti-ɠɔʋɛiti kɔtu ʋili fai zu ɓaa mɛɛn ɠae ʋili fai zu. Ti pɛ ti ɠɛni boloda ɠilagi nɔ zu ta Sayileni, Ɓɛnzamɛn ná-bolodai.
3Ti laaseigiti kaa: ta-ɠundiɠii Ayiyezɛɛl ta kɛɛɠɛloin Zoase, Giɓea nui Sema ná-doun zunuiti, Azamavɛte ná-doun zunu felegɔiti, Yeziyɛle ta Pelɛte, Ɓelaka, Anatɔte nui Zewu,
4Gaɓaɠɔn nui Yisemaya, naa ɠɛni kɔɔɠɔ nu ʋuusaʋagɔiti (30) saama, tɔ ɠa é ɠɛni ga ta-ɠundiɠii.
5Zelemi, Yaɠaziyɛle, Yoɠanan, Gedeela nui Yozaɓade,
6Eluzayi, Yelimɔte, Ɓealiya, Semalia, Ɠalɔfe nui Sefatia,
7Ɛlɛkana, Yisiya, Azalɛle, Yowezɛɛl, Yasoɓeyame, niiti pɛ ti ɠɛni ga Kolé mavofodaiti,
8Gedɔɔl nui Yeloɠame ná-doun zunuiti Yowela ta Zeɓadia.
9Gade wolodamaiti ti ɠɛni zeɠezu Sayile ʋa, ti ɗa ʋilɛ Davide ʋolu teʋebai zu. Ti ɠɛni ga kɔɔɠuluɓa wolaiti, ti ga salaʋusuiti ti ɠalagai ga kɔɔɠɔ vai, ti zoogai ɠɔɔzu ga kɔɔɠɔ zɛpɛgi ta kpɛɛin. Ti maayikini eɠɛ zalai, ti zuvilɛ eɠɛ goegiti ti ɓizɛzu gizei ma.
10Ezɛɛl ɠa é ɠɛni ga ta-lotuɠɔi, naa ʋoluma Aɓediyase ɠa é ɠɛni ga felesiɛi, Eliyaɓe ɠɛ ga saʋasiɛi,
11Misamana ɠɛ ga naanisiɛi, Zelemi ɠɛ ga dɔɔlusiɛi,
12Atayi ɠɛ ga dɔzitasiɛi, Eliyɛle ɠɛ ga dɔfelasiɛi,
13Yoɠanan ɠɛ ga dɔsaʋasiɛi, Ɛlɛzaɓade ɠɛ ga taaʋuusiɛi,
14Zelemi ɠɛ ga puusiɛi, Makeɓanayi ɠɛ ga puugɔ maazu ɠilasiɛi (11).
15Gade wolodamai zu nui naati pɛ ti ɠɛni ga salaʋusu lotuɠɔiti, zɔi zeemaalɔiɗai ti zaama, naa ɠila kpe a la zoo vɔnisu nu ungila (100) ma, zɔi zeeɠaaɓaai ti zaama, naa a la zoo vɔnisu nu waagila (1.000) ma.
16Tiya ɠa ti Zuludɛn ɓudɛni konagi ma alu mɔungi ma ziɛve siɛgi zu, ti ziɛɠoba nuiti pɛ kpɛ, niiti ti ɠɛni folo ɠulazu ʋelei ta niiti ti ɠɛni folo liizu ʋelei.
17Ɓɛnzamɛn wolodamaiti ta Zuda wolodamaiti su nui tanigaa ɓalaa ti liini Davide, ʋɛ naa lɔɔɠuni ná.
18Davide ti laaɠomini, é ɠɛ ti ma: «Ni wa ʋaazu pɔ̀ ga ziilɛigi, kisiɛ ʋagɔi zu ga wo ɓɔ bà, naazu ada ɠili ɓɔɠɔ ʋa. Kɛlɛ ni wa ʋaazu ga wo yàava, wo fè sìli nuiti zea, tama gè la faa ɲɔu ɠɛɛni, ade-mɛmɛwolani ta-ƓALAGI ná ɠa é tukpɔɠaaleʋe ade yɔɠɔzu.»
19Naama ziɛgi zu GALA Zɛnvui yeini Amasayi ma, nii é ɠɛni ga nu ʋuusaʋagɔiti (30) ta-ɠundiɠii, é ɠɛ ma:
20Manasé wolodai zu nui tanigaa ɓalaa ti ɠilini Davide ʋa, siɛgi zu naa ʋɛɛni la Filisiti nuiti ba, ga ti kɔɔi ɠɔ Sayile laalɔɠɔma. Kɛlɛ de bo ga gaama, Davide ta ná-nuiti ti la ɠɛni kɔɔɠɔni Filisiti nuiti bɛ, tɔɔzei naati ta-ɠundiɠiiti ti Davideni kpɛɛni ʋolu, ti ɠɛni ma: «Davide ta maliɠi wɔlɔmai ta yɔɠɔzuɓɛtɛna, toɠa ade ve naa ya.»
21Siɛgi zu niina Davide ɠɛni liizu la Sikilage, názu ɠa Manasé nui niiti ti ʋilɛni la polu, ti laaseigiti kaa: Adana, Yozaɓade, Yediayɛle, Mikayɛle, Yozaɓade, Eliyu ta Siletayi. Ti ɠilagilagi pɛ ti ɠɛni ga salaʋusu waagilagila kundiɠiiti Manasé wolodamaiti saama.
22Naa ɠɛni ga kpɔba wola Davide ta ná-nuiti bɛ, tɔɔzei ti pɛ ti ɠɛni ga kɔɔɠuluɓa wolaiti, Davide ti ɠɛɛni ga kundiɠiiti ná-kɔɔʋɛbɛi zu.
23Folo-o-folo, nuiti ti ɠɛni ʋaazu, ti ɗa ʋɛɛ Davide ʋa ga ti ɓɔ ba, gaamanɔ ná-kɔɔʋɛbɛi zuwɔɔlɔni, é ɠɛni eɠɛ GALA ná-kɔɔʋɛbɛi.
24Salaʋusuiti tiegɔi ɠaa, niiti ti ʋaani Eɓelɔn ga ti ɓɔ Davide ʋa, ga ti Sayile ná-masadai ve zea, ʋelei Ɠɔoɠɔ GALAGI boni la.
25Zuda wolodai zu nu waadɔzita nu undɔsaʋa (6.800) kɔɔɠɔ zɛpɛgiti ta kpɛɛinti ti ti ya.
26Simiyɔn wolodai zu nu waadɔfela nu ungila (7.100), ti ga kɔɔɠuluɓaiti.
27Levi wolodai zu nu waanaanigɔ nu undɔzita (4.600),
28naa ʋɛɛ Yeɠoyada ʋa, nii é ɠɛni ga Aalɔn mavofodaiti ta-ɠundiɠii, nu waasaʋagɔ nu undɔfela (3.700) ɠa é ʋɛɛni naa ʋolu.
29Sadɔke ɠɛni ga zunu loungo nii é ɠɛni ga kɔɔɠuluɓa wola, ná-pɛlɛyeɠei wu totuɠɔ ʋuufelegɔ maazu felegɔ (22) ɠa é ɠɛni polu.
30Ɓɛnzamɛn wolodai zu nuiti, niiti ti ɠɛni ga Sayile kɛɛɠɛlointi, naati ti ɠɛni ga nu waasaʋagɔ (3.000), ti bɔɔlɔzu, ti ɠɛni botii ɠɛɛzu Sayile ná-pɛlɛyeɠei ʋɛ.
31Nu waaʋuufelegɔ nu undɔsaʋa (20.800) ɠa é zeɠeni Efelayime wolodai zu, ti ga kɔɔɠuluɓaiti, ti pɛ ti ga lɔɠɔba nuiti ta-ʋɛlɛyeɠeiti bu.
32Manasé wolodai ɠilazuʋɛ zu nu waapuugɔ maazu lɔsaʋa (18.000) ɠa daaseigi zɛʋɛni ga ti li, ti Davide zei ga masagi.
33Isakaal wolodai zu totuɠɔ unfelegɔ (200) ɠa é ʋaani ta niiti ti ɠɛni ta-levei wu, ti pɛ ti ɠɛni kwɛɛ ʋelei ta yeeɠɛɠalai nii Izilayɛle ɠa faa ɠɛɛzu la.
34Zaɓulɔn wolodai zu salaʋusu waaʋuulɔɔlugɔ (50.000) ɠa é ʋaani, ti pɛ ti ɠalagai ga kɔɔɠɔi, ti ɠɛʋele ɓɛtɛai ga ti li kɔɔɠɔzuʋɛ, kɔɔɠɔ zɔɔlai ma zii pɛ ge ti ya. Ti zooni ɓalaa kɔɔi ɠɔɔzu gilibalai zu.
35Nɛfɛtali wolodai zu kɔɔɠuluɓa waagila (1.000) ka é zeɠeni miná, ti ʋaani ga salaʋusu waaʋuusaʋagɔ maazu lɔfela (37.000), kɔɔɠɔ zɛpɛgiti ta kpɛɛinti ti ti ya.
36Salaʋusu waaʋuufelegɔ maazu lɔsaʋa undɔzita (28.600) ɠa é zeɠeni Dan wolodai zu, ti ɠɛʋele ɓɛtɛai ga ti li kɔɔɠɔzuʋɛ.
37Salaʋusu waaʋuunaanigɔ (40.000) ɠa é zeɠeni Asɛɛl wolodai zu, ti ɠalagai ga kɔɔɠɔi, ti ɠɛʋele ɓɛtɛai ga ti li kɔɔɠɔzuʋɛ.
38Bolodai niiti ti ɠɛni zeini Zuludɛn ʋoluʋelei, folo ɠulazu ʋelei, niiti ti ga Luɓɛn, Gade, ta Manasé wolodai ɠilazuʋɛ, naati ti nu waaungila waaʋuufelegɔ (120.000) leʋeni, kɔɔɠɔ zɔɔlai ma zii pɛ ge ti ya.
39Salaʋusui niiti pɛ ti ʋaani Eɓelɔn, ti ɠɛʋele ɓɛtɛni ga ti kɔɔi ɠɔ, ti pɛ ti zolooni ɠi gila ma ga ti Davide ɠɛ ga masagi Izilayɛle pɛ unda. Izilayɛle nui mɔtai zɔiti pɛ ti zolooni ma ga ti masadai ve Davide ya Izilayɛle nuiti pɛ maazu.
40Ti kɛɛni ná Davide ɠoba ga folo saʋagɔ, ti-ɠɔnɔgi ta ti ɓɔɔle ani ɠɛni ga nii ti-ɠɛɛlointi ti ɠɛni feezu ti ya.
41Ná ɠoba yooiti su nuiti ɓalaa, eyɛsu é zeeli Isakaal, Zaɓulɔn ta Nɛfɛtali wolodamaiti su nuɓusɛiti ti daamianigiti daani soovalegiti kɔma, ta ɲɔmɛiti, soovale fuuluiti ta nikɛiti kɔma, ti ʋa ga tiye, daamianigi naati ti ɠɛni ga: ɓulu vukɔiti, kooleɠoole fɔɔi ma liʋɛiti, leezɛn vɔɔi, dɔɔi, gulɔi, nikɛiti ta baala mɔinmɔin, tɔɔzei koozunɛɛi wɔɔlɔni Izilayɛle yooi zu.