قْلّ 11

¹نَ تّمُي دُنِحَ مِشِ بِرِن نُ شُي كٍرٍن نَن قَلَمَ.

²مِشِ ندٍيٍ نَشَ كٍلِ، عٍ سِفَ سٌفٍتٍدٍ مَبِرِ، عٍ فٍيَ تٌ سِنَرِ بْشِ مَ. عٍ نَشَ سَبَتِ كّنّ مَ نَشَن نَ فُلُنبَ كُي.

³عٍ نَشَ عَ قَلَ عٍ بٌورٍ بّ، «وٌ قَ، وٌن شَ بِرِكِ بْنبْ، وٌن شَ عٍ فَن.» عٍ نَشَ بِرِكِ قِندِ فّمّ حْشْي رَ. عٍ نَشَ مْتَ قِندِ دٌلٍ حْشْي رَ.

⁴نَ شَنبِ عٍ نَشَ عَ قَلَ، «وٌن وَلِ سُشُ، وٌن شَ تَا تِ وٌن يّتّ بّ، عَ نُن بَنشِ بٍلٍبٍلٍ نَشَن تٍمَ هَن كٌورٍ مَ، عَلَكٌ وٌن شِلِ شَ فبٌ. نَ نَ عَ رَ، وٌن مُ لْيمَ وٌن بٌورٍ مَ.»

⁵كْنْ عَلَتَلَ نَشَ فٌرٌ نَ تَا مَتٌدٍ، عَ نُن نَ بَنشِ بٍلٍبٍلٍ.

⁶عَلَتَلَ نَشَ عَ مَسٍن، «شَ يِ مِشِيٍ بَرَ كَقُ عٍ بٌورٍ مَ يِ وَلِ رَبَدٍ، عٍ نَ شُي كٍرٍن قَلَ، وَلِ بِرِن عٍ وَ مَ نَشَن نَبَقٍ، عَ سْونّيَمَ نّ.

⁷وٌن شّي، وٌن شَ فٌرٌ عٍ شَ شُي مَسُنبُدٍ عَلَكٌ عٍ نَشَ عٍ بٌورٍ وْيّن شُي قَهَامُ.»

⁸نَ كُي عَلَتَلَ نَشَ نَ فَلِ رَيٍنسٍن يّ. نَ بَنشِ تِقٍ نَشَ دَن.

⁹نَ يِرٍ شِلِ نَشَ سَ بَبٍلِ، بَرِ مَ عَلَتَلَ دُنِحَ مِشِيٍ شُييٍ رَوُيَ مّننِ نّ، عَ قَ عٍ رَيٍنسٍن يّ دُنِحَ بِرِن مَ.

¹⁰سٍمِ شَ تَرُشُي نَن يَ. بَنبَرَنيِ دَنفِ شَنبِ حّ قِرِن، سٍمِ شَ سِمَيَ نَشَ حّ كّمّ لِ. عَ نَشَ قِندِ عَرَقَشَدِ بَبَ رَ.

¹¹عَ تٌ عَرَقَشَدِ سْتْ، سٍمِ نَشَ حّ كّمّ سُولِ سَ عَ قَرِ. عَ نَشَ دِ شّمّ نُن دِ فِنّ فبّتّيٍ سْتْ.

¹²عَرَقَشَدِ تٌ حّ تٌنفٌ سَشَن عَ نُن سُولِ سْتْ، عَ نَشَ قِندِ سٍلَهَ بَبَ رَ.

¹³عَ تٌ سٍلَهَ سْتْ، عَرَقَشَدِ نَشَ بُ حّ كّمّ نَانِ نُن حّ سَشَن. عَ نَشَ دِ شّمّ نُن دِ فِنّ فبّتّيٍ سْتْ.

¹⁴سٍلَهَ تٌ حّ تٌنفٌ سَشَن سْتْ، عَ نَشَ قِندِ عٍبٍرِ بَبَ رَ.

¹⁵عَ تٌ عٍبٍرِ سْتْ، سٍلَهَ نَشَ بُ حّ كّمّ نَانِ نُن حّ سَشَن. عَ نَشَ دِ شّمّ نُن دِ فِنّ فبّتّيٍ سْتْ.

¹⁶عٍبٍرِ تٌ حّ تٌنفٌ سَشَن نُن نَانِ سْتْ، عَ نَشَ قِندِ ثٍلٍفِ بَبَ رَ.

¹⁷عَ تٌ ثٍلٍفِ سْتْ، عٍبٍرِ نَشَ بُ حّ كّمّ نَانِ نُن حّ تٌنفٌ سَشَن. عَ نَشَ دِ شّمّ نُن دِ فِنّ فبّتّيٍ سْتْ.

¹⁸ثٍلٍفِ تٌ حّ تٌنفٌ سَشَن سْتْ، عَ نَشَ قِندِ رُيٍ بَبَ رَ.

¹⁹عَ تٌ رُيٍ سْتْ، ثٍلٍفِ نَشَ بُ حّ كّمّ قِرِن نُن حّ سٌلٌمَنَانِ. عَ نَشَ دِ شّمّ نُن دِ فِنّ فبّتّيٍ سْتْ.

²⁰رُيٍ تٌ حّ تٌنفٌ سَشَن عَ نُن قِرِن سْتْ، عَ نَشَ قِندِ سٍرُفُ بَبَ رَ.

²¹عَ تٌ سٍرُفُ سْتْ، رُيٍ نَشَ بُ حّ كّمّ قِرِن نُن حّ سٌلٌقٍرٍ. عَ نَشَ دِ شّمّ نُن دِ فِنّ فبّتّيٍ سْتْ.

²²سٍرُفُ تٌ حّ تٌنفٌ سَشَن سْتْ، عَ نَشَ قِندِ نَشٌرِ بَبَ رَ.

²³عَ تٌ نَشٌرِ سْتْ، سٍرُفُ نَشَ بُ حّ كّمّ قِرِن. عَ نَشَ دِ شّمّ نُن دِ فِنّ فبّتّيٍ سْتْ.

²⁴نَشٌرِ تٌ حّ مْشْحّن نُن سٌلٌمَنَانِ سْتْ، عَ نَشَ قِندِ تٍرَ بَبَ رَ.

²⁵عَ تٌ تٍرَ سْتْ، نَشٌرِ نَشَ بُ حّ كّمّ نُن حّ قُ نُن سٌلٌمَنَانِ. عَ نَشَ دِ شّمّ نُن دِ فِنّ فبّتّيٍ سْتْ.

²⁶تٍرَ تٌ حّ تٌنفٌ سٌلٌقٍرٍ سْتْ، عَ نَشَ قِندِ عِبُرَ مَ، نَشٌرِ، نُن شَرَنِ بَبَ رَ.

²⁷تٍرَ شَ تَرُشُي نَن يَ. تٍرَ نَشَ قِندِ عِبُرَ مَ، نَشٌرِ، نُن شَرَنِ بَبَ رَ. شَرَنِ نَشَ قِندِ لٌتِ بَبَ رَ.

²⁸شَرَنِ سِنفٍ نَشَ قَشَ عَ بَبَ تٍرَ بّ عُرُ، كَلِدِ بْشِ مَ، عَ بَرِشِ دّننَشّ.

²⁹عِبُرَ مَ نُن نَشٌرِ نَشَ فِنّيٍ قٍن، عٍ نَشَ قُتِ شِرِ. عِبُرَ مَ شَ فِنّ شِلِ سَرَيِ. نَشٌرِ شَ فِنّ شِلِ مِلِكَ. مِلِكَ شَرَنِ شَ دِ نَ عَ رَ. دِ قِرِن نُ نَ شَرَنِ يِ رَ، مِلِكَ نُن عِسِكَ.

³⁰سَرَيِ دِبَرِتَرٍ نَن نُ عَ رَ. دِ يٌ مُ نُ نَ عَ بّ.

³¹تٍرَ نَشَ عَ شَ دِ عِبُرَ مَ، عَ شَ مَمَدِ لٌتِ، نَشَن قِندِشِ شَرَنِ شَ دِ رَ، نُن عِبُرَ مَ شَ فِنّ سَرَيِ تٌنفٌ، عٍ نَشَ كٍلِ عُرُ كَلِدِ بْشِ مَ سِفَقٍ رَ كَنَان بْشِ مَ. كْنْ عٍ تٌ شَرَنِ لِ، عٍ نَشَ سَبَتِ مّننِ.

³²تٍرَ شَ سِمَيَ تٌ حّ كّمّ قِرِن حّ سُولِ لِ، عَ نَشَ لَاشِرَ شَرَنِ.