يّتّ سْتْي 35

¹مُنسَ نَشَ عِسِرَيِلَ حَمَ بِرِن مَلَن، عَ عَ قَلَ عٍ بّ، «عَلَتَلَ شَ يَامَرِيٍ نَن يَ؛

²وٌ شَ وَلِ شِ سٍننِ لْشُنيِ كُي، كْنْ عَ شِ سٌلٌقٍرٍ ندٍ وٌ شَ وٌ مَلَبُ. لْشْي سُفَندِشِ نَ عَ رَ عَلَتَلَ بّ. مِشِ يٌ نَشَن وَلِ سُشُمَ نَ لْشْي، عَ لَنمَ نَ كَنيِ شَ قَشَ.

³وٌ نَشَ تّ يٌ رَدّشّ وٌ شَ بَنشِ كُي مَلَبُي لْشْي.»

⁴مُنسَ مَن نَشَ عَ مَسٍن عِسِرَيِلَ حَمَ بِرِن بّ، «عَلَتَلَ شَ يَامَرِيٍ نَن يَ؛

⁵وٌ شَ هَدِيَ بَ عَلَتَلَ بّ. مِشِ نَشَن نَ عَ حَنِفٍ عَ شَ هَدِيَ بَ، عَلْ شّيمَ، فبٍتِ، نُن وُرٍ فبٍيلِ،

⁶فّسّ فّرّ دَاشِ، بُلُ دَاشِ، نُن عَ فبٍيلِ، سُوَ دُفِ، نُن فّسّ نَشَن يَءِلَنشِ سِ شَبٍ رَ،

⁷يّشّي كٌنتٌنيِ كِرِ نَشٍيٍ سٌشِ عَ فبٍيلِ رَ، ثٍرٍ مُي كِرِيٍ، نُن كَسِيَ وُرِ،

⁸لَنثُي تُرٍ، لَبُندّ نَشَن مَسُنبُمَ تُرٍ رَ، سُرَيِ شِرِ حْشُنمّ نَشَن فَنمَ،

⁹عٌنِشِ فّمّ، نُن فّمّ تٌقَنيِ نَشٍيٍ سَمَ سّرّشّدُبّ شَ دٌنمَ كُيٍ نُن عَ شَ دٌنمَ كَنكٍ رَشُنمَسٍ مَ.»

¹⁰«وَلِ كٌلٌنيِيٍ نَشٍيٍ نَ وٌ يَ مَ، عٍ شَ قَ يِ سٍيٍ يَءِلَندٍ عَلْ عَلَتَلَ عَ يَمَرِشِ كِ نَشّ؛

¹¹هْرْ مْلِنفِرَ دُفِيٍ،

¹²عَ نُن سَاتّ كَنكِرَ،

¹³هْرْ مْلِنفِرَ تٍيبِلِ،

¹⁴هْرْ مْلِنفِرَ لَنثُي دْشْسٍ،

¹⁵سُرَيِ سّرّشّبَدٍ،

¹⁶سّرّشّبَدٍ شُنفبٍ،

¹⁷هْرْ مْلِنفِرَ تّتّ شَ دُفِيٍ،

¹⁸هْرْ مْلِنفِرَ مَشِرِ سٍيٍ،

¹⁹عَ نُن سّرّشّدُبّ سٌسٍيٍ هَرُنَ نُن عَ شَ دِيٍ بّ.»

²⁰عِسِرَيِلَ حَمَ نَشَ كٍلِ مُنسَ شُن مَ.

²¹مِشِ نَشٍيٍ عَ حَنِفٍ، نٍيٍ نَشَ قَ عٍ شَ هَدِيَ رَ عَلَتَلَ بّ عَ شَ هْرْ مْلِنفِرَ تِقٍ رَ، عَلَ عٍ لِمَ دّننَشّ، عَ نُن سّرّشّدُبّ سٌسٍيٍ سّنِيّنشِيٍ يَءِلَنقٍ رَ.

²²شّمّيٍ نُن فِنّ نَشٍيٍ عَ حَنِفٍشِ، عٍ نَشَ قَ شُنمَسٍ شّيمَ دَاشِيٍ رَ، عَلْ تُلِرَ سٌي، شُرُندّيٍ، كْنيِ مَفٌرٌ سٍيٍ، بّلّشّرَ سٌييٍ، عَ نُن شُنمَسٍ فبّتّ نَشٍيٍ يَءِلَنشِ شّيمَ رَ. عٍ نَشَ نَ بِرِن قِ عَلَتَلَ مَ سّرّشّ رَ.

²³فّسّ فّرّ دَاشِ، بُلُ دَاشِ، نُن عَ فبٍيلِ، سُوَ دُفِيٍ، فّسّ نَشَن يَءِلَنشِ سِ شَبٍ رَ، يّشّي كٌنتٌنيِ كِرِ نَشٍيٍ سٌشِ عَ فبٍيلِ رَ، نُن ثٍرٍ مُي كِرِيٍ نُ نَ نَشٍيٍ يِ رَ، نٍيٍ نَشَ قَ عٍ رَ.

²⁴مِشِ نَشٍيٍ نُ عَ حَنِفٍشِ، نٍيٍ نَشَ قَ فبٍتِ نُن وُرٍ فبٍيلِ هَدِيَ رَ عَلَتَلَ بّ. كَسِيَ وُرِ كَنيِيٍ نَشَ قَ نَ وُرِ رَ هْرْ مْلِنفِرَ وَلِ شَ قٍ رَ.

²⁵فِنّ نَشَن بِرِن قَتَ دُفِ سْشْدٍ، عٍ نَشَ دُفِيٍ سْشْ عٍ بّلّشّ رَ، عٍ قَ نٍيٍ رَ؛ دُفِ فّرّ دَاشِ، بُلُ دَاشِ، نُن عَ فبٍيلِ. عٍ نَشَ قَ سُوَ دُفِ رَ.

²⁶فِنّ نَشَن بِرِن قَتَ، عٍ عَ حَنِفٍ، عٍ نَشَ فّسّ يَءِلَن سِ شَبٍ رَ.

²⁷حَمَ كُنتِفِيٍ نَشَ قَ عٌنِشِ فّمّيٍ نُن فّمّ تٌقَنيِ فبّتّيٍ رَ، نَشٍيٍ سَمَ سّرّشّدُبّ شَ دٌنمَ كُيٍ نُن عَ شَ دٌنمَ كَنكٍ رَشُنمَسٍ رَ.

²⁸عٍ نَشَ قَ لَبُندّ نُن تُرٍ رَ هْرْ مْلِنفِرَ لَنثُي بّ، عَ نُن تُرٍ سّنِيّنشِ نُن لَبُندّ فَن دَاشِ فبّتّ.

²⁹عِسِرَيِلَكَ بِرِن نَشٍيٍ عَ حَنِفٍشِ عٍ بْحّ كُي، شّمّيٍ نُن فِنّيٍ، نٍيٍ نَشَ قَ هَدِيَ رَ عَلَتَلَ شْن مَ، عَلَكٌ مُنسَ شَ وَلِ رَبَ عَلَتَلَ عَ يَمَرِشِ نَشَن نَ.

³⁰مُنسَ نَشَ عَ مَسٍن عِسِرَيِلَكَيٍ بّ، «وٌ عَ كٌلٌن، عَلَتَلَ بَرَ بٍسَلٍلِ عُرِ شَ دِ سُفَندِ، شُرُ شَ مَمَدِ نَشَن قَتَنشِ يُدَ بْنسْي رَ.

³¹عَلَتَلَ بَرَ شَشِلِ قَنيِ قِ عَ مَ، عَلَكٌ عَ شَ وَلِ بِرِن نَبَ كِ كٌلٌن لْننِ قَنيِ رَ،

³²عَ شَ نْ وَلِ تٌدٍ عَ شَشِلِ كُي بٍينُن عَ شَ رَبَ، عَ شَ نْ شّيمَ، فبٍتِ، نُن وُرٍ فبٍيلِ رَوَلِدٍ،

³³عَ شَ نْ فّمّ قَنيِ مَسٌلِدٍ عَ قَ عَ رَبِلِنيِ يَءِلَن، عَ شَ نْ كَمُدّرِحَ نُن وَلِ فبّتّيٍ رَبَدٍ.

³⁴عَلَ بَرَ عَ نِيَ بٍسَلٍلِ شَ نْ مِشِ فبّتّ مَتِنكَندٍ عَ شَ وَلِ رَ. عَلَ بَرَ نَ نِيَ عٌهٌلِيَبُ عَشِسَمَكِ شَ دِ قَن بّ، نَشَن قَتَنشِ دَنَ بْنسْي رَ.

³⁵عَلَ بَرَ عٍ مَلِ عَلَكٌ عٍ شَ قَتَ وَلِ بِرِن نَ، عَلْ فّمّ نُن وُرِ مَسٌلِقٍ، ثِرِنتِ رَبَقٍ، سُوَ دُفِ سْشْقٍ فّسّ فّرّ دَاشِ، بُلُ دَاشِ، نُن عَ فبٍيلِ رَ، عَ نُن وَلِ بِرِن عٍ نَشَن تٌمَ عٍ شَشِلِ كُي.»