يّتّ سْتْي 25

¹عَلَتَلَ نَشَ عَ مَسٍن مُنسَ بّ،

²«عَ قَلَ عِسِرَيِلَكَيٍ بّ، قٌنِسٍرٍلَيٍ شَ يِ سٍيٍ مْولِ بَ هَدِيَ رَ؛

³شّيمَ، فبٍتِ، وُرٍ فبٍيلِ،

⁴فّسّ فّرّ دَاشِ، فّسّ بُلُ دَاشِ، فّسّ فبٍيلِ، سُوَ دُفِ، دُفِ نَشَن سْشْشِ سِ شَبٍ رَ،

⁵يّشّي كٌنتٌنيِ كِرِ نَشٍيٍ سٌشِ عَ فبٍيلِ رَ، ثٍرٍ مُي كِرِيٍ، كَسِيَ وُرِ،

⁶تُرٍ نَشَن سَمَ لَنثُي كُي، لَبُندّ نَشَن سَمَ تُرٍ سّنِيّنشِ نُن سُرَيِ شُن مَ،

⁷عَ نُن فّمّ تٌقَنيِ نَشٍيٍ قِندِ سّرّشّدُبّ شَ دٌنمَ كُيٍ نُن دٌنمَ كَنكٍ رَشُنمَ سٍ رَ.

⁸عِسِرَيِلَكَيٍ شَ هْرْ مْلِنفِرَ تِ ﭑ بّ، عَلَكٌ ﭑ شَ سَبَتِ عٍ يَ مَ.

⁹وٌ شَ نَ لِنفِرَ نُن عَ شَ يِرَبَسٍ بِرِن يَءِلَن عَلْ ﭑ نَ مَسٍنمَ عِ بّ كِ نَشّ.»

¹⁰«عٍ شَ سَاتّ كَنكِرَ يَءِلَن كَسِيَ وُرِ رَ. نَ كَنكِرَ شَ كُيَ نْنفْن قِرِن نُن عَ تَفِ، عَ شَ عِفبٌ نْنفْن كٍرٍن نُن عَ تَفِ، عَ شَ عِتٍ نْنفْن كٍرٍن نُن عَ تَفِ.

¹¹عِ شَ عَ كُي نُن عَ قَرِ مَسٌ شّيمَ رَ. عَ دّ كِرِ قَن شَ يَءِلَن شّيمَ رَ.

¹²عِ شَ عَ سُشُدٍ دِفِلِنشِ نَانِ رَقَلَ شّيمَ رَ عَ تُنشُن نَانِيٍ مَ، قِرِن نَ سّيتِ، قِرِن نَ بٌورٍ سّيتِ مَ.»

¹³«عِ شَ كَسِيَ وُرِ كُيٍ قِرِن مَسٌلِ، عٍ مَسٌ شّيمَ رَ.

¹⁴عِ شَ عٍ رَ سٌ كَنكِرَ سُشُدٍ دِفِلِنشِيٍ كُي، نَ كَنكِرَ شَنِنمَ عٍ تَن نَن مَ.

¹⁵عٍ نَشَ رَ مِنِ نَ عَبَدَن.»

¹⁶«ﭑ نَ سَاتّ تْنشُمَ سٌ عِ يِ رَ، عِ شَ عَ سَ نَ كَنكِرَ كُي.

¹⁷عِ شَ عَ دّرَكٌتٍ يَءِلَن شّيمَ قَنيِ رَ، نَشَن قِندِ مَ شُنسَرٍ يِرٍ رَ. عَ شَ كُيَ نْنفْن قِرِن نُن عَ تَفِ، عَ شَ عِفبٌ نْنفْن كٍرٍن نُن عَ تَفِ.

¹⁸مَلٍكّ سَوُرّ قِرِن شَ يَءِلَن شّيمَ شَبُشِ رَ كَنكِرَ دّرَكٌتٍ قَرِ.

¹⁹مَلٍكّيٍ سَوُرّ نُن كَنكِرَ دّرَكٌتٍ شَ قِندِ كٍرٍن نَ.

²⁰نَ مَلٍكّ سَوُرّ قِرِنيِيٍ شَ تِ عٍ بٌورٍ يَ عِ، عٍ فَبُتٍنيِيٍ عِتَلَشِ، عٍ شُن سِنشِ شُنسَرٍ يِرٍ.»

²¹«عِ شَ نَ كَنكِرَ دّرَكٌتٍ سَ عَ مَ، نَشَن قِندِشِ شُنسَرٍ يِرٍ رَ. ﭑ نَ سَاتّ تْنشُمَ سٌ عِ يِ رَ، عِ شَ عَ سَ نَ كَنكِرَ كُي.

²²ﭑ نَن ﭑ يّتّ مَسٍنمَ عِ بّ مّننِ نّ، نَ سَاتّ كَنكِرَ دّرَكٌتٍ قَرِ، مَلٍكّ سَوُرّ قِرِنيِيٍ تَفِ. ﭑ يَامَرِ بِرِن سٌمَ عِ يِ رَ مّننِ نّ كَتَرَبِ عِسِرَيِلَكَيٍ مَ.»

²³«عِ شَ تٍيبِلِ ندٍ يَءِلَن كَسِيَ وُرِ رَ، نَشَن كُيَ نْنفْن قِرِن، عَ عِفبٌ نْنفْن كٍرٍن، عَ عِتٍ نْنفْن كٍرٍن نُن عَ تَفِ.

²⁴عِ شَ شّيمَ قَنيِ مَسٌ عَ مَ، عَ نُن عَ دّ كِرِ مَ.

²⁵شٍبٍنيِ ندٍ شَ سَ نَ دّ كِرِ بُن مَ نَشَن عِفبٌ سُشُي كٍرٍن عَ نُن عَ تَفِ. شّيمَ شَ سَ نَ قَن دّ كِرِ مَ.

²⁶عِ شَ عَ سُشُدٍ دِفِلِنشِ نَانِ رَقَلَ شّيمَ رَ عَ تُنشُن نَانِيٍ مَ، نَشٍيٍ عِلَنمَ عَ سَنيِيٍ رَ

²⁷نَ شٍبٍنيِ بُن مَ. وُرِ كُيّيٍ شَ سٌ نٍيٍ كُي تٍيبِلِ شَنِنقٍ رَ.

²⁸نَ وُرِ كُيٍيٍ شَ مَسٌلِ كَسِيَ وُرِ رَ، شّيمَ شَ مَسٌ عٍ مَ. نٍيٍ نَن قِندِ مَ تٍيبِلِ تٌنفٌسٍ رَ.

²⁹ثِلٍتِيٍ، تْنبِلِيٍ، ثْوتِيٍ، نُن ثَانِ نَشٍيٍ سَمَ نَ تٍيبِلِ مَ، نَشٍيٍ رَوَلِمَ سّرّشّ يٍيرَ مَ دَاشِ شَ قٍ رَ، نٍيٍ بِرِن شَ يَءِلَن شّيمَ قَنيِ نَن نَ.

³⁰تَامِ قَن شَ سَ نَ تٍيبِلِ مَ تّمُي بِرِن، نَشَن قِندِشِ سّرّشّ رَ ﭑ بّ.»

³¹«عِ شَ لَنثُي دْشْسٍ ندٍ يَءِلَن شّيمَ قَنيِ شَبُشِ رَ. عَ سَنيِ، عَ بِلِ، عَ سَلٌنيِيٍ، نُن لَنثُي دْشْدٍ نَشٍيٍ مَنِيَ سَنسِ قُفٍيٍ رَ، نَ بِرِن شَ قِندِ كٍرٍن نَ.

³²سَلٌن سٍننِ شَ مِنِ لَنثُي دْشْسٍ بِلِ مَ، سَشَن سّيتِ كٍرٍن، سَشَن بٌورٍ سّيتِ.

³³تْنبِلِ سَشَن شَ لُ نَ سَلٌن سٍننِ بِرِن شُن مَ. عٍ شَ مَنِيَ سَنسِ بٌفِ رَ نَشَن دْشْشِ عَ بُرّشّيٍ نُن عَ قُفٍيٍ تَفِ.

³⁴تْنبِلِ نَانِ فبّتّ شَ لُ لَنثُي بِلِ مَ. عٍ قَن شَ مَنِيَ سَنسِ بٌفِ رَ نَشَن دْشْشِ عَ بُرّشّيٍ نُن عَ قُفٍيٍ تَفِ.

³⁵نَ سَلٌن قِرِن قِرِن دْشْ سَشَنيِيٍ بُن مَ نَشٍيٍ كٍلِشِ عَ بِلِ مَ، عَ سَمَ نّ مّننِ قَن مَ.

³⁶نَ تْنبِلِيٍ نُن لَنثُي سَلٌنيِيٍ شَ قِندِ كٍرٍن نَ، عٍ شَ يَءِلَن شّيمَ قَنيِ شَبُشِ رَ.»

³⁷«عِ شَ لَنثُي سٌلٌقٍرٍ يَءِلَن، عِ شَ عٍ دْشْ عٍ دْشْدٍيٍ مَ عَلَكٌ عٍ دّشّ شَ يَرٍ عِيَلَن.

³⁸عِ شَ وُكِ شَبَسٍ نُن شُبٍ سَسٍ يَءِلَن شّيمَ قَنيِ رَ.

³⁹شّيمَ نَشَن نَوَلِمَ لَنثُي دْشْسٍ نُن لَنثُي يِرَبَسٍ يَءِلَنقٍ رَ، نَ شَ قِندِ شّيمَ كِلٌ تٌنفٌ سَشَن نُن نَانِ نَن نَ.

⁴⁰عِ شَ نَ بِرِن نَبَ عَلْ ﭑ عَ مَسٍنشِ عِ بّ كِ نَشّ فٍيَ قَرِ.»