रोमीयो 15

¹आपु जा ताकेतवोर हेते, ता आपणा हुका उगे नाह देखता कोमजोरान कोमजोरीह वेठी।

²आपणे माय रेन एकेक जाण आपणा आहेंल्याह तान बोलाय ने केरता खुस केरी काय तान बोरहा माय उन्नती एय।

³काहाकाय मसी बी सोतान हुका उगे नाह दिख्यो, पुण जीहे लिखेल हे: “तार चिहटा केरनारे किरेल चिहटा मार पोर आवी।”

⁴जोल्युक वातु पेलुस रेन लेखायेल, त्यु आपणीस हिक ने केरता लेखाय जायेल हे काय आपु दिर एने पुस्तेक प्रोत्साहन द्‍वारा आसा मीले।

⁵एवी बोगवान जो दिर एने प्रोत्साहन आपेह, तुमूह ओहलो वरदान आपी काय तुमू यीशु मसीन गेत आपसाम एक मोन रिवो।

⁶काहाकाय तुमू एक मोन एने एक सुर माय आपणो मालीक यीशु मसीह आबाख बोगवानान बोड़ाय केरी।

⁷तानकेरता, जीहे मसी बोगवानान बोड़ायीन केरता तुमूह स्वीकार किरेल हे, तिहेस केरीन तुमू बी एका दिहराह स्वीकार किरो।

⁸तानकेरता मी केथु काय जा उकुम डायडायाह आपेल एता ताह मोजबुत केरनेन केरता मसी, बोगवानान खेरायीह देखाड़नेन केरता, यहुदि माणहान सेवक बोणी।

⁹एने बिगेर यहुदि बी किवीन वोजेसे बोगवानान बोड़ाय केरी; जीहे लिखेल हे, “तानकेरता मी जाती जाती माय तारो दन्यवाद केरूह, एने तारा नावान बजन गावुह।”

¹⁰पोशो तो किथे, “एय बिगेर यहुदि माणहे, तान माणहा हेऱ्या खुसी मोणावो।”

¹¹एने उंजु किथे, “एय जाती जातीन आखा माणहे, मालीकान बोड़ाय किरो; एने एय राज राज ने आखा माणहे, तान बोड़ाय किरो।”

¹²एने उंजु यशाया किथे, “यीशेन एक मुल देखाय, एने बिगेर यहुदिन आदिकारी बोणनेन केरता उबरेय, ता पोर बिगेर यहुदि आसा मेलती।”

¹³एवी आसान बोगवान तुमूह बुरहो केरने माय पुरी खुसी एने सान्ती केरीन पुरो केरी, जाकेरीन चोखाला जीवान ताकेत केरीन तुमरी आसा वोदते जाय।

¹⁴एय मारा बाय बोणहा, मी खुद तुमरी बाराम खेरीच जाणथो काय तुमू बी सोता बोलाय केरीन बोरायेल एने बोगवानान एकली केरीन पुरा हेते, एने एका दिहराह सोमजाड़ सेकतेह।

¹⁵तीबी मी तुमूह थोड़ो थोड़ो एर केरावणेन केरता जुलूम ईमोत केरीन लिखेल हे। ज्य ता गीणान वोजेसे एनो जो बोगवान माहु आपेल हे।

¹⁶काय मी बिगेर यहुदिन केरता मसी यीशुन सेवक बोणीन बोगवानान हाजाली खोबरीन सेवा चाकर्‍यान गेत केरू, जाकेरीन बिगेर यहुदिन चेड़ावणो, चोखाला जीवा केरीन चोखालो बोणीन समर्पित केराय जाय।

¹⁷तानकेरता त्यु वातुन बाराम ज्‍यु बोगवाना हेऱ्यो समंद मेलत्युह, मी मसी यीशु माय बोड़ाय केर सेकथु।

¹⁸काहाकाय त्यु वातुह सोड़ीन मी दिहरी एगदी वातीम केणेन ईमोत नाय केरू जो मसी बिगेर यहुदिन उकुम मान्नेन केरता वचन एने कामा केरीन,

¹⁹निसाणी, एने अद्बुत कामान ताकेत केरीन, एने चोखाला जीवान ताकेत केरीन मारीस द्‍वारा किरेल; न्या वोर काय मी यरूशलेम रेन कावदेन इल्लुरीकुम वोर मसीन हाजाली खोबरीन पुरो पुरो पारचार किऱ्यो।

²⁰पुण मारा मोनान मोरजी ज्यी हे काय जाहरी जाहरी मसीन नाव नाह पोचनो, ताहरी हाजाली खुबेर होमलाडु ओहलो नाय एय काय दिहरान पाया पोर गेर बाणावु।

²¹पुण जिहकेरीन पुस्तेक माय लिखेल हे तिहेच केरीन एय, “जाह यीशुन हाजाली खुबेर नाह पोचनो, ता देखती एने जा नाह होमल्या ता सोमेजती।”

²²तानकेरता माहु तुमरी फाय आवणेन जुलूम वारीन रोकाय रिनो।

²³पुण एवी ज्या देसा माय मारा कामान केरता जागो नाह रिनो, एने जुलूम वोरह्या रेन माहु तुमरे फाय आवणेन लालसा हे।

²⁴तानकेरता जेवी मी स्पेन माय जाह ताहार तुमरी फाय लागतोन जाह, काहाकाय माहु आसा हे काय ती यात्रा माय तुमू हेरी बेट एय, एने जेवी तुमरी संगती केरीन मारो जीव खुसी केरीन थोड़ोक बोराय जाय ताहार तुमू माहु थोड़ोक ओंगाण पोचाड़ दिज्यो।

²⁵15:25 1 कुरिंथीयो 16:1-4पुण एवी ते मी बोगवानान माणहान सेवा केरनेन केरता यरूशलेम माय जाथु।

²⁶काहाकाय मकादुनिया एने आखायान माणहाह ज्य हाजो लागो काय यरूशलेमान बोगवानान माणहा माय गोर गेरीबान केरता थोड़ोक फालो केरी।

²⁷15:27 1 कुरिंथीयो 9:11ताह हाजो ते लागो, पुण ता तान केर्जावाला बी हेते, काहाकाय केदी बिगेर यहुदि तान आत्मिक वातु माय बागी एना, ताहार ताह बी जोरेवरी हे काय सारिरीक वातु माय तान सेवा केरी।

²⁸तानकेरता मी ज्यो काम पुरो केरीन एने ताह तो फालो होपीन तुमरी फाय लागतोन स्पेन माय जाह।

²⁹एने मी जाणथो काय जेवी मी तुमरी फाय आवुह, ताहार मसीन पुरो बोरकेत हिऱ्यो आवुह।

³⁰एय बाय बोणहा, आपणा मालीक यीशु मसीन उगे चोखाला जीवान मोंगान एर केरावीन मी तुमूह विन्ता केरथु, काय मार केरता बोगवाना फाय विन्ता केरने माय मार हेऱ्या मिलीन लागीन रिवो,

³¹काय मी यहुदियान अविश्वासी से वोचीन रेव, एने मारी ती सेवा जी यरूशलेमान केरता हे, बोगवानान माणहाह पोटे;

³²एने मी बोगवानान मोरजी से तुमरी फाय खुसी माय आवीन तुमरी हिऱ्यो आराम सापड़ावु।

³³सान्तीन बोगवान तुमरे आखा हिऱ्यो रेय। आमेन।