इब्रानियो 11

¹एवी बुरहो आसा किरेल वोस्तुन निश्चय, एने बिगेर दिखेल वोस्तुन पुरावो हे।

²काहाकाय ज्यास बोरहान द्‍वारे डायलाह बोगवान फाय रेन बोड़ाय जुड़नी।

³11:3 योहान 1:3बोरहास केरीन आपु जाण लेतेह काय आखी दुनिया बोगवानान वचना केरीन बुणेल हे। पुण ज्य नाह काय जो काय देखाह, तो दिखेल वोस्तु केरीन बुणेल एय।

⁴बोरहा केरीस ने हाबील केनाह रेन हाजी बेट बोगवानान केरता चेड़ायेल, एने ताच ने द्‍वारे ताह देरमी रेणेन गोवाय बी दियेल, काहाकाय बोगवान तान बेटीन बाराम गोवाय दियेल; एने तास ने द्‍वारे तो मोरीन बी एवी वोर वातु किरेह।

⁵बोरहास केरीन हनोक विसाय जायेल काय मोतीह नाय देखी, एने तान पुतो नाह लागनो काहाकाय बोगवान ताह विस लियेल ईतो, एने ताह विसाय जाणेन पेल तान ज्यी गोवाय एती काय तो बोगवानाह खुस किरेल हे।

⁶एने बोरहान बिगेर ताह खुस केरनो नाह एण्यो हे; काहाकाय बोगवानान आहने आवणाराह बुरहो केरने जुवे काय तु हे, एने ताह होदणाराह फोल आपेह।

⁷बोरहास केरीन नुह ती वातुन बारामाय जी तुलबूखे नाह देखाताल्यु, चेतावणी लेन बोक्ती हिऱ्यो तान गेराणाह वोचाड़नेन केरता डोंडह्यो बाणायो, एने तान द्‍वारे तु दुनियाह दोसी ठेरायेल; एने ता देरमान वोस रिनो जो बोरहा केरीन ईथे।

⁸बोरहास केरीन अब्राहाम जेवी आयेल ईतो ते उकुम मानेन ओहली जागे निकेल गीयो जाह मिरास माय लिण्यो ईतो; एने ज्य नाह जाणतालो काय मी का जाथु, तीबी निकेल गीयो।

⁹बोरहास केरीन तो वायदो किरेल देसा माय, पारका देसा माय पारकान गेत, रेन इसहाक एने याकुब हिऱ्यो, जा ता हेऱ्या तास वायदान वोस एता, तोम्बु माय रेना।

¹⁰काहाकाय अब्राहाम ता मोजबुत पायावाला गावान वाट जोवतालो, ताह हिचाड़णार एने बाणावणार बोगवान हे।

¹¹11:11 बोरहान द्‍वारे सोरा। तो; थोड़ाक लेख माय बोरहान द्‍वारा खुद साराह दिह रेना, ती सोराह पायदा केरनेन केरता जुलूम डुकेर एय जायेल एती। तीबी लिखेल हे। बोरहा केरीन सारा सोता डुकेर एती तीबी पेटावाली एणेन ताकेत सापड़ावेह, काहाकाय ती वायदो केरनाराह खीरलो सोमजेल एती।

¹²इहीचकेरीन एकुस जाणा पोर रेन जो मुरेलान गेत एतो, जुगान तारा एने देरीयान रेटीन गेत मोजाय नाय ओलाक वोस पायदा एना।

¹³ज्या आखा बोरहास ने हाल माय मुरेल; एने ता वायदो किरेल वोस्तुह नाह सापड़ाया, पुण ताह सिटेस रेन देखीन खुस एना एने मान लेदा काय आपु देरती पोर पारका एने बाहेरल्या हेते।

¹⁴जा ओहली वातु केणु, ता देखाड़तेह काय स्वदेसाह होदणे बाजरेनाह।

¹⁵एने जा देसा माय रेन ता निकेल आयेल एता, केदी ताह एर केरता ते ताह वोल जाणेन टेम ईतो।

¹⁶पुण ता एक हाजा मतलब हेरगावाला देसान अबिलाषी हेते; केरीन बोगवान तान बोगवान केवाणेन नाह लाजवाणे, काहाकाय तो तान केरता हियोर तियार किरेल हे।

¹⁷बोरहास केरीन अब्राहाम, पारखाणे बुखेत, इसहाकाह बोली चेड़ायेल; एने तो वायदाह खेरो मानेल ईतो

¹⁸एने जाह ज्यो कियेल एतो, “इसहाक पोर रेन तारी वोस केवाय,” तोस तान एकलोताह बेट चेड़ावणेन केरता तियार ईतो।

¹⁹काहाकाय तो जाण लियेल ईतो, काय बोगवान ताकेतवालो हे काय ताह मुरेल माय रेन जिवाड़ी; ताच माय रेन किस्सान रिती पोर तो ताह पुशो मिलानो।

²⁰बोरहास केरीन इसहाक याकुब एने एसावाह आवणाऱ्यु वातुन बाराम बोरकेत आप्यो।

²¹बोरहास केरीन याकुब मोरने बुखेत युसूफ ने दुय बेटाख माय रेन एक एकाह बोरकेत आप्यो, एने तान डेंगीन टेका पोर आसरो लेन बोगवानान बोक्ती किऱ्यो।

²²बोरहास केरीन युसूफ, जेवी मोरनेस केरतालो, ते इस्राएल ने सोरा निकेल जाणेन वात केऱ्या, एने तान आड़ान बारा माय उकुम किऱ्यो।

²³बोरहास केरीन मुसान आहख आबोख ताह, पायदा एणेन पासाण तीन मोयना वोर लिकाड़ मेल्या, काहाकाय ता देख्या काय सोरो सुंदर हे, एने ता राजान उकुमाह नाह बिना।

²⁴बोरहास केरीन मुसा सियानो एन फिरोनान बेटीख ने बिटोख केवातालो केरीन नाकाऱ्यो।

²⁵ज्यानकेरीन काय ताह पापा माय थोड़ाक दिह्यान हुक बोगणे रेन बोगवानान माणहा हिऱ्यो दुख बोगणेन गाडोह हाजो लागनो।

²⁶तो मसीन कारेण निन्दीत एणेन केरता मीस्र ने बण्‍डाराह रेन मोटलो मालदेन सुमज्यो, काहाकाय तान डोला फोल सापड़ावणेन उगे लाग रियेल एता।

²⁷बोरहास केरीन राजान रागाह नाह बिन तो मीस्राह सोड़ दिनो, काहाकाय तो नाह दिखेल ताह सुमजो देखतीन मोजबुत रिनो।

²⁸बोरहास केरीन तु फसह एने लुय हितेड़नेन विदी मान्यो, काय पेल पायदा ईयेल खेतेम केरनार इस्राएल्या पोर आथ नाय टाकी।

²⁹बोरहास केरीन ता रातला देरीयान ती उगे इहकेरीन उतेर गीया, जिहकेरीन हुकील बुय पोर रेन; एने जेवी मीस्री तोहलोच केरने होद्या ते आखा बुड़ीन मोर गीया।

³⁰बोरहास केरीन यरीहो हेयरान बितड़ो, जेवी ता हात दिह वोर तान कावदेन फिर लेदा, ते तो जाय पोड़नो।

³¹बोरहास केरीन राहाब वेश्या उकुम नाह माणनारा हेऱ्यी खेतेम नाह एनी, ज्यानकेरीन काय ती खोबर्‍याह होमालीन मिलेल एती।

³²एवी उंजु काय केव? काहाकाय टेम नाह सुतो काय गिदोनान, एने बाराक एने शिमशोनान, एने यिफतहान, एने दाऊद एने शमुएलान, एने जाणकारान बाराम केव।

³³न्या बोरहास ने द्‍वारे राज जिकेल; देरमान काम किरेल; वायदो किरेल वोस्तु सापड़ायेल; सिहान मुये बोंद किरेल;

³⁴आक्‍ठान जिराह हेलो किरेल; तेलवारीन दारीह रेन वोच निकलेल; कोमजोरी माय तेगड़ा ईयेल; लेड़ाय माय बाहदुर निकलेल; पारका देसान सिपायाह दितेन दोवड़ाया।

³⁵बायकु त्युन मुरेल ताह पोशु जीव उठेल देख्यु; कोलाक ते मार खाते खातेन मोर गीया एने सुटकारो नाह होद्या, ज्यानकेरीन काय हाजाला पोशा जीवणान गोवांद्या रेती।

³⁶कोलाक मोजाक उड़ावणेन; एने चापका खाणेन एने बांदाय जाणेन, एने जेल माय देराणेन द्‍वारे पारखाय गिल्या।

³⁷डेगड़ाठाय गिल्या; दाऱ्या केरीन चिराय गिल्या; ता गेरबाय माय, एने वेला माय, एने दुख बोगतीन, मेंड्रान एने बोकड्यान चामड़ा पांगरीन, न्यान ता मोऱ्या मोऱ्या फिरना;

³⁸एने जेंगला, माय एने बोयड़ा, माय एने गुफा माय, एने देरतीन बुयारा माय बोटेकतेन फिरना जेग तान लायेक नाह एतो।

³⁹बोरहास ने द्‍वारे न्या सोबान बाराम हाजी गोवाय दियेल हे, तीबी ताह वायदो किरेल वोस्तु नाह जुड़नी।

⁴⁰काहाकाय बोगवान आपणी केरता पेलुस रेन एक हाजी वात ठेरायेल ईतो। काय ता आपणी बिगेर सिद्दता फाय नाय पोची।