प्रेरितान काम 9

¹शाऊल जो एवी वोर मालीकान चेलाह दोमकी देणे एने मारनेन दुंद माय ईतो, मुखी चाकऱ्या फाय गीयो।

²एने तो दमिश्‍क ने बोक्ती केरन्या गेरान नावा पोर ओहली चिट्ठी मांग्‍यो काय एदमी काय बायकु, कुण बी ताह सापड़ी, ताह बांदिन यरूशलेम माय लावे।

³पुण चालते चालते जेवी शाऊल दमिश्‍क ने आहने पोचनो, ते उचकाहुच जुगाम रेन तान कावदेन उजालो चोमेकनो।

⁴एने शाऊल बुई पोर जाय पोड़नो एने ज्यो आवाज होमल्यो, “एय शाऊल, एय शाऊल, तु माहु काहा वेला केरावेह?”

⁵शाऊल फुशो, “एय मालीक, तु कुण हे?” तो केयो, “मी यीशु हे, जाह तु वेला केरावेह।

⁶पुण एवी उठीन हेयरा माय जा, एने जो तुवाह केरनु हे तो तुवाह केवाय जाय।”

⁷जा माणहे शाऊल हेऱ्या एता, ता ठावकाच रेय गीया; काहाकाय आवाज ते होमेलताला, पुण ताह कुणीस देखानो नाह।

⁸तेवी शाऊल बुई पोर रेन उठनो, पुण जेवी डोला उगाड्यो ते ताह कायच देखानो नाह, एने तान हाती शाऊलान आथ देरीन दमिश्‍क माय ली गीया।

⁹एने ताहरी शाऊल तीन दिह वोर देख नाह सीक्‍यो, एने नाह खादो एने नाह पिदो।

¹⁰दमिश्‍क माय हनन्या नावान एक विश्वासी ईतो, ताह मालीक देरसेन माय केयो, “एय हनन्या!”

¹¹तेवी मालीक हनन्याह केयो, “उठीन ती गेली माय जा, ‘जी हुतरी केवाथे,’ एने यहुदान गेरा माय शाऊल नावान एक तरसुस माय रेणाराह फुस; काहाकाय देख, तो विन्ता केरने बाजरिनोह,

¹²एने शाऊल देरसेन माय हनन्या नावान एक एदम्याह माय आवतालो एने तान उपेर आथ मेलतालो दिख्यो काय पोशो देखणे बाज जाय।”

¹³हनन्या जापाप आप्यो, “एय मालीक, मी ज्या एदम्यान बाराम मोकता जाणा फाय रेन होमलेल हे काय ज्यो यरूशलेम माय तारा चोखाला माणहा हिऱ्यो मोट मोटल्यु बुराय किरेल हे।

¹⁴एने न्याहरी बी तारो नाव लेणाराह आखाह बांदुह ओहलो मुखी चाकऱ्या फाय रेन शाऊलाह आदिकार जुड़ेल हे।”

¹⁵पुण मालीक हनन्याह केयो, “तु जा; काहाकाय तो ते बिगेर यहुदि एने राजान एने इस्राएलान सामने मारो नाव देखाड़नेन केरता मारो निवाड़ेल ठामलो हे।

¹⁶एने मी ताह केह काय मार नावान केरता ताह कोहला कोहला दुख वेठणे पोड़ी।”

¹⁷तेवी हनन्या उठीन ता गेरा माय गीयो, एने ता पोर तान आथ मेलीन केयो, “एय बाहख शाऊल, मालीक मतलब यीशु, जो ती वाटे माय जा रेन तु आवो तुवाह देखायेल ईतो, तोस माहु मोकलेल हे काय तु उंजु देखणे बाज जाय एने चोखाला जीवा केरीन पुरो बोराय जाय।”

¹⁸एने चालोच तान डोलाम रेन खोलच्‍यान गेत पोड़नो एने शाऊल देखणे बाज गीयो, एने उठीन बपतीस्मा लिदो;

¹⁹एने जेवी शाऊल खाणो खादो, तेवी ताह पोशी ताकेत जुड़नी।

²⁰एने शाऊल चालोच यहुदिन बोक्ती केरन्या गेरा माय यीशुन पारचार केरने बाज गीयो काय तो बोगवानान बिटोख हे।

²¹एने आखा होमेलनारे बोंगलायीन केणे बाज गीया, “काय ज्यो तोस माणुह नाह सुतो जो यरूशलेम माय ताह जा यीशुन बोक्ती केरताला, ताह खेतेम केरतालो; एने न्या बी ज्यानकेरता आयेल ईतो काय ताह बांदिन मुखी चाकऱ्या फाय ली जाय?”

²²पुण शाऊल उंजु बी ताकेतवोर बोणती गीयो, एने यीशुस मसी हे इहकेरीन पुरावो आपीन दमिश्‍क माय रेणारे यहुदि माणहाह बोंगलाड़ दिनो।

²³जेवी जुलूम दिह वित गीया, ते यहुदि मिलीन शाऊलाह मारनेन होमच्‍यो केऱ्या,

²⁴पुण तान होमच्‍यो शाऊलाह मालुम एय गीयो। ता ते शाऊलाह मार टाकणेन केरता रात दिह हेयरान फाटेक पोर तियारी माय रेताला।

²⁵पुण तान चेला रातीन वेला ताह एक टोपला माय बोहाड़ीन बितड़ान खिड़की माय रेन बुंदे उतार देना।

²⁶ओवतो शाऊल यरूशलेम माय आवो एने चेला हिऱ्यो बेचकाणेन कोसीत किऱ्यो। पुण आखा ताह बिताला, काहाकाय ताह बुरहो नाह एतालो काय ज्यो बी यीशुन चेलो हे।

²⁷पुण बरनबास नावान चेलो शाऊलाह ता हिऱ्यो प्रेरिता फाय ली गीयो। एने ताह केयो काय ज्यो किहकेरीन दमिश्‍क ने वाटे मालीकाह दिख्यो, एने तो ज्या हिऱ्यो वातु किऱ्यो; एने यीशुन नावा माय दमिश्‍क माय ज्यो किहीक ईमोत केरीन पारचार किऱ्यो।

²⁸एने शाऊल ता हिऱ्यो रिनो, एने यरूशलेम माय आवती जाते बिंदास एन मालीकान नावा माय पारचार केरने बाज गीयो।

²⁹एने युनानी बाषा बोलनारे यहुदि हिऱ्यो वातु एने बोलचाल केरती रिनो; पुण ता शाऊलाह मार टाकणेन कोसीत केरने बाज गीया।

³⁰ज्यो जाणीन विश्वासी बाहख ताह केसरीया माय लेन आवा, एने तरसुस माय मोकेल दिनो।

³¹इहकेरीन आखा यहुदिया, एने गेलील एने सामरीया माय मोंडलीह सान्ती जुड़नी। एने तान उन्नती एते गियी, एने ती मालीकान बिय एने चोखाला जीवान उत्साह माय चालते एने वोदते गियी।

³²एने इहकेरीन एनो काय पतरस आखी जागे फिरते लेन, ता बोगवानान माणहा फाय बी पोचनो, जा लुद्दा गावा माय रेताला।

³³ताहरी ताह एनियास नावान लोखवान एक दुखाऱ्यो माणुह मिलनो, जो आठ वोरह्या रेन खाटला माय पोड़ रियेल ईतो।

³⁴पतरस ताह केयो, “एय एनियास, यीशु मसी तुवाह हुदारेह। उठ, तारो आथरोण गुंडाल,” ओवतो तो चालुस उबरेय गीयो।

³⁵तेवी लुद्दा एने शारोन गावा माय आखा रेणारे माणहे ताह देखीन मालीकान उगे वोलना।

³⁶याफा माय तबीता नावान एक विश्वासी बायकु रेताली, जीन नाव ग्रीक माय दोरकास जान मतलब “मेंदड़ो।” ती जुलूम हाजा हाजा काम एने बेट केऱ्या केरताली।

³⁷तास दिह्या माय ती दुखार्‍यी पोड़ीन मोर गियी; तेवी ता तीह उंगलावीन उपेरली खोलीम मेल देना।

³⁸ज्यानकेरता काय लुद्दा गाव याफान आहने एतो, पतरस ताहरी हे इहकेरीन जुलबुखे विश्वासी होमल्या, तुलबूखे ता दुय जाणाह मोकलीन ताह विन्ता केऱ्या, “काय आमरी फाय आवणेन वार मा लागाड़े।”

³⁹तेवी पतरस ता हिऱ्यो गीयो, पतरस ताहरी पोचतास ता ताह उपेरली खोलीम ली गीया। ता हेऱ्यो सोब रांडायेल बायकु रेड़तेन उब रेन्यु, एने जा चोगा एने फाड़का दोरकास ती हेऱ्यी रेते लेन बाणायेल एती, देखाड़ने बाज गियी।

⁴⁰तेवी पतरस आखाह बाहेर निकाल दिनो, एने मांड्या वालीन विन्ता किऱ्यो एने देड़ान उगे देखीन केयो, “एय तबीता, उठ।” तेवी ती तीन डोला उगाड़ देनी; एने पतरसाह देखीन उठ बोहनी।

⁴¹ओवतो पतरस तीह ओंगाण आथ केरीन उठाड्यो, एने विश्वासी माणहाह एने रांडायल्युह हादिन त्युन सामने तीह जीवताली देखाड़ दिनो।

⁴²ज्यी वात आखी याफा माय मालुम एय गियी; एने जुलूम जाणे मालीक पोर बुरहो केऱ्या।

⁴³एने पतरस याफा माय शमोन नावान एक चामड़ान दोन्दो केरनारा फाय जुलूम दिह वोर रिनो।