प्रेरितान काम 10

¹केसरीया गावा माय कुरनेलीयुस नावान एक माणुह एतो, “जो इटालीयन नावान सिपाय टोलान आदिकारी ईतो।”

²तो बोगवानाह बिणार बोक्त माणुह ईतो; तो एने तान आखा गेराणान माणहे बोगवानान बोक्ती केरताला। एने यहुदि माणहाह जुलूम दान आपतालो, एने लागातार बोगवानाह विन्ता केरतालो।

³तो दिह्या तीन वाचता हास केरीन देरसेन माय दिख्यो, काय बोगवानान एक हेरोगदुत ता फाय माय आवीन केयो, “एय कुरनेलीयुस!”

⁴कुरनेलीयुस हेरोगदुताह हास केरीन दिख्यो, एने बियीन केयो, “एय मालीक काय हे?”

⁵एने एवी याफा हेयरा माय माणहाह मोकलीन शमोनाह, जो पतरस केवाथे, ताह हादाड़ ले।

⁶तो चामड़ान दोन्दो केरनार शमोन फाय पावणो हे, तान गेर देरीयान दिड़े हे।”

⁷जेवी हेरोगदुत ता हिऱ्यो वातु केरीन जात रिनो, तेवी तो तान दुय चाकऱ्या जा तान आरही रेया केरताला, ताम रेन एक सिपायाह हाद्यो।

⁸एने ताह ज्‍यु सोब वातु केयीन याफा माय मुकल्यो।

⁹दिहरे दिह जेवी ता चालते चालतेन याफा हेयरान आहने पोचना, तेवी पतरस बारा वाचता विन्ता केरनेन केरता गेरान साजा पोर चेड़नो।

¹⁰तुलबूखे पतरसाह बुख लागी एने तो काह खाणे होदतालो; पुण जेवी खाणो बोणने बाजरियेल एतो, तेवी पतरसाह देरसेन जुड़नो।

¹¹तेवी पतरस दिख्यो काय जुग उगड़ी गीयो, एने एक चादरो मोटला ठामलान गेत चार कोपराम लेटकेल देरतीन उगे उतेरने बाजरिनोह।

¹²ता माय देरती पोर वाला आखी बातीन चार पायावाला जेनवारे, एने लोलनारे जेन्तु, एने जुगाम उड़नारे चीड़ा एता।

¹³एने ताह एक ओहलो आवाज होमलानो, “एय पतरस उठ; एने मारीन खा!”

¹⁴पुण पतरस केयो, “नाह मालीक! केदिस नाह, काहाकाय मी केदी बी एगदी एठी एने खाराब चिज नाह खाईल सोतो।”

¹⁵पोशो दिहरी वारीन पतरसाह आवाज होमलानो, “जाह बोगवान चोखो ठेरायेल हे, ताह तु एठो मा मानहे।”

¹⁶ओहलो तीन वार वोर एनो, तेवी चालोच तो चादरो जुगाम विसाय गीयो।

¹⁷जेवी पतरस देरसेन दिख्यो तान बाराम आपणा मोनाम विचार केरने बाजरियेल ईतो काय ज्यान मतलब काय एय सिकेह, तेवी ता माणहे जाह कुरनेलीयुस मोकलेल एतो, शमोनान गेरान पुतो लागाड़ीन बायणा पोर आवीन उबरी गीया।

¹⁸एने आयड़ीन फुशा, “शमोन पतरस केतेह तो न्या पावणो ईतो, तो हे काय?”

¹⁹पतरस ता देरसेनान बाराम विचार केरतालो तेवी चोखालो जीव ताह केयो, “देख, तीन माणहे तुवाह होदतेह।

²⁰उठीन बुंदे उतेर, एने बिंदास ता हिऱ्यो जातरे, काहाकाय मीच ताह मोकलेल हे।”

²¹तेवी पतरस बुंदे उतरीन ता माणहाह केयो, “दिखो, जाह तुमू होदणे बाजरेनाह, तो मीच हे, तुमू न्या काय कामे आवाह?”

²²ता केया, “कुरनेलीयुस आदिकारी आमुह मोकलेल हे, जो देरमी एने बोगवानान बोक्ती केरनार माणुह हे, एने आखा यहुदि माणहाम रेन एने बोगवानान हेरोगदुता से खुबेर सापड़ायेल हे, काय तुवाह गेर हादिन ज्यी खुबेर होमले।”

²³तेवी पतरस ताह गेरा माय हादिन पावणाय किऱ्यो।

²⁴दिहरे दिह ता केसरीया माय पोचना, तेवी कुरनेलीयुस एने तान गेरल्या, एने तान आहेंल्या हाती टोलवाएन तान वाट जोवणे बाजरियेल एता।

²⁵जेवी पतरस गेरा माय आवणे बाजरियेल ईतो, तेवी कुरनेलीयुस तान हुम्बो गीयो, एने पतरसान पाया पोड़ीन ताह वोंद्यो।

²⁶पुण पतरस ताह उठाड़ीन केयो, “उबरी, मी बी ते माणुहच हे।”

²⁷ओवतो पतरस कुरनेलीयुस हिऱ्यो वातु केरती लेन गेरा माय गीयो, एने पतरस जुलूम होवटा माणहाह टोलवायेल वाट जोवताला देखीन,

²⁸ताह केयो, “तुमू जाणतेह काय बिगेर यहुदि माणहा हेऱ्या ओलखात मेलने, एने ता फाय जाणे यहुदि माणहान केरता पाप हे। पुण बोगवान माहु कियेल हे काय काल्ला बी माणहाह एठो एने खाराब मा किहे।

²⁹केरीन माहु हादाड़ता बाराबोर मी कायच नाह फुसता, एने मी न्या आव लागो, एवी मी फुसथो काय माहु काय कामे हादाड्या?”

³⁰तेवी कुरनेलीयुस ताह केयो, “आज रेन तीन दिह्यान पेल, मी मार गेर हिराणान तीन वाचता विन्ता केरने बाजरियेल ईतो, तेवी चोमेकण्या फाड़का पिरील एक माणुह मार सामने आवीन उबरेय गीयो। एने माहु केयो,

³¹‘एय कुरनेलीयुस! तारी विन्ता बोगवान होमेल लियेल हे, एने तु जो गेरब्याह दान देरेम किरेल तो एर केराय जायेल हे।

³²तानकेरता याफा माय कुणीह बी मोकलीन शमोन जाह पतरस केतेह ताह हादिन लाव तो देरीयान दिड़े चामड़ान दोन्दो केरनार शिमोन चामारान गेर पावणो हे।’

³³तेवी चालोच मी तुवाह हादणे मुकल्यो, एने हाजो केऱ्यो तु आव लागो। एने एवी बोगवान जो तुवाह बोलनेन केरता कियेल हे, तो होमेलनेन केरता आखा न्या बोगवानान सामने आव रेनाह।”

³⁴तेवी पतरस केयो, “एवी माहु खेरीच मालुम एय गीयो काय बोगवान कुणीन बी बेदबाव नाह केरने।

³⁵पुण आखा देसान माणहा माय रेन जो कुण बोगवानाह बिथे, एने हाजो काम केरतेह, तो ताह पुटीह।

³⁶जो वचन तो इस्राएल माणहा फाय मुकल्यो, यीशु मसी जो आखान मालीक हे, तान द्‍वारे सान्तीन हाजाली खुबेर होमलाड्यो।

³⁷तुमू ती मोटली गेटनाह जाणतेह, जी आखा इस्राएलान बुई पोर गेटेल एती, ती गेलील माय सुरवात एन योहानान द्‍वारे बपतीस्मा आपणेन पासाण रेन जान पारचार केराय जायेल एतो।

³⁸तुमू यीशु नासरीन बाराम जाणतेह बोगवान चोखाला जीवान ताकेत रोचवेल ईतो, एने यीशु हाजाला कामे केरतीन एने ता आखाह जा सैतानान ताबा माय एता ताह हुदारतेन चार चोमखीर किहीक फिरतालो, काहाकाय बोगवान ता हिऱ्यो ईतो।

³⁹एने आमु ता आखा कामान गोवा हेते, जो यीशु इस्राएल देसा माय एने यरूशलेम माय बी किऱ्यो, एने ता ताह खुरूसखाम पोर टागीन मार टाक्या।

⁴⁰पुण बोगवान ताह तीसरे दिह जीवाड्यो, एने देखाड़ी बी दिनो।

⁴¹आखा माणहाह नाह, पुण ता गोवाह जाह बोगवान पेलुच रेन निवाड़ लियेल ईतो, मतलब आमुह जा तान मुरेल माय रेन जीव उठणेन पासाण ता हेऱ्या खाईल पियेल हेते।

⁴²एने तो आमुह उकुम आपेल हे काय माणहा माय पारचार किरो, एने गोवाय दिवो काय ज्यो तोच हे, जाह बोगवान जीवताला एने मुरेल माणहान नियाव केरनार ठेरायेल हे।

⁴³तान बाराम आखा जाणाव केरनार गोवाय देतेह काय जो कुण बी ता पोर बुरहो केरी, ताह यीशु नावान ताकेत माय पापान माफी जुड़ी।”

⁴⁴पतरस ज्यी वातु केताच, चोखालो जीव वचन होमेलनारा आखा पोर उतेरनो।

⁴⁵एने जोला याफा माय रेन यहुदि विश्वासी माणहे पतरस हेऱ्या आयेल एता, ता बिगेर यहुदि माणहाह बी चोखाला जीवान दान ता पोर रोचवाय जायेल हे, ज्यो देखीन ता आखा बोंगलाय गीया।

⁴⁶काहाकाय ता आखा माणहाह बात बातीन बाषा बोलताला एने बोगवानान बोक्ती केरताला होमल्या। तेवी पतरस केयो,

⁴⁷“आपुह जिहकेरीन चोखालो जीव जुड़ेल एतो, तिहेच केरीन न्याह बी जुड़ेल हे, ते काय न्याह पाण्या केरीन बपतीस्मा लेणेन केरता एगदो रोक सेकी?”

⁴⁸एने तो उकुम आप्यो काय ताह यीशु मसीन नावा माय बपतीस्मा आपाय जाय। तेवी ता पतरसाह केया आमु हिऱ्यो उंजु थोड़ाक दिह रे।