योहान 9

¹जाणे बुखेत यीशु एक माणहाह दिख्यो, जो जेल्माम रेच ने आंदलो एतो।

²तेवी यीशुन चेला ताह फुशा, “एय गुरू, कुणीन पापान वोजेसे ज्यो ओहलो आंदलो पायदा ईयेल हे; ज्यान काय ज्यान आईख आबाख ने?”

³यीशु ताह जापाप आप्यो, “नाह ते ज्यो पाप किरेल ईतो, नाह ज्यान आहख आबोख। पुण ज्यो ज्यानकेरता आंदलो पायदा ईयेल हे काय बोगवानान काम ता माय देखाय।

⁴जो माहु मुकलेल हे, तान काम दिह हे ताह वोर आपुह केरने जोरेवरी हे; काहाकाय रात आवणी हे ती माय कुणीह बी काम केरता नाय आवी।

⁵9:5 मत्ती 5:14; योहान 8:12मी जाह वोर दुनियाम हे, ताह वोर मी दुनियान उजालो हे।”

⁶इहकेरीन केयीन यीशु बुय पोर थुप्यो, एने थुपा केरीन माटड्यो बिजाड़ीन; एने तो माटड्यो ता आंदलान डोला पोर लागाड़ीन

⁷ताह केयो, “जा, शिलोम मतलब मुकलेल। नावान कुंडाम दोव ले।” तो आंदलो जाईन दोव लेदो, एने देखतीन आवो।

⁸तेवी तान आहने रेणारे, एने जा ताह पेल बिख मांगतालो दिखेल एता ता केया, “बोहीन बिख मांग्‍या केरतालो ज्यो तोस हे काय?”

⁹थोड़ाक माणहे केया, “ज्यो तोस हे,” पुण दिहरा केया, “नाह; ज्यो ते तान गेत देखाह।”

¹⁰तेवी ता ताह फुसणे बाज गीया, “तारा डोला किहीक उगड़ी गीया?”

¹¹तो जापाप आप्यो, “यीशु नावान एक माणुह माटड्यो बिजाड़ीन मारा डोला पोर लागाड़ेल,” एने माहु केयो, “शिलोम नावान कुंडाम जाईन दोव ले। ते मी तान वात होमलीन जाईन दुयो, एने देखणे बाज गीयो।”

¹²तेवी ता ताह फुशा, “तो का हे?”

¹³जो पेल आंदलो एतो, ताह माणहे फरिसी फाय ली गीया।

¹⁴जेदिह यीशु माटड्यो बिजाड़ीन तान डोला उगड़ील ईतो तो विहेवणेन दिह ईतो।

¹⁵ओवता फरिसी ताह उंजु फुशा, तु किहीक देखणे बाज गीयो। तो केयो, “तो मारा डोला पोर माटड्यो लागाड्यो; उवतो मी दोव लियेल, एने एवी मी देखथु।”

¹⁶तेवी थोड़ाक फरिसी केणे बाज गीया, “ज्यो माणुह बोगवानान उगे रेन नाह सोतो, काहाकाय ज्यो विहेवणेन दिह नाह मानेत।”

¹⁷फरिसी ता आंदलाह पोशा केया, “जो तारा डोला उगड़ील हे। तान बाराम तु काय किथे?”

¹⁸पुण यहुदि आदिकारीह बुरहो नाह ईनो, ज्यो आंदलो एतो एने एवी दिखेह, केरीन तान आईख आबाख हादाड़ीन

¹⁹ताह फुशा, “तुमरो ज्यो बिटोख आंदलो पायदा ईयेल इहकेरीन केतेह, तो ज्योस हे काय? ते उवतो ज्यो एवी किहीक देखणे बाज गीयो?”

²⁰तान आहख आबोख जापाप आप्या, “ज्यो आमरो बिटोख हे, एने आंदलोच पायदा ईयेल ईतो, ज्यो आमुह मालुम हे।

²¹पुण आमु ज्यो नाह मालुम सोतो काय एवी किहीक देखणे बाज गीयो, एने आमुह ज्यो बी नाह जाणते काय तान डोला कुण उगाड़ेल हे। ज्यो सोमेजदार हे, ज्या फुस लिवो; ज्यो केय देय!”

²²ज्‍यु वातु तान आहख आबोख ज्यानकेरता केया, काहाकाय ता यहुदि आदिकारीह बिताला, काहाकाय यहुदि एकमेल एय जायेल एता काय केदी ईखेह केय काय तो मसी हे, ते बोक्‍तीन गेराम रेन काड़ देती।

²³ता माय तान आहख आबोख केया, “ज्यो सोमेजदार हे; ज्या फुस लिवो!”

²⁴तेवी यहुदि आदिकारी ता आंदला माणहाह दिहरी वार उंजु हादिन केया, “बोगवानान सामने वायदो केर काय तु खेरीच बुलेह! पुण आमु जाणतेह काय जो माणुह तुवाह हुदारेल हे, तो पापी हे।”

²⁵तो आंदलो माणुह जापाप आप्यो, “तो पापी हे काय नाह ज्यो माहु मालुम नाह सोतो। पुण माहु एक वात मालुम हे: काय मी पेल आंदलो ईतो, एने एवी देखथु।”

²⁶ता यहुदि आदिकारी ताह उंजु केया, “तार हिऱ्यो तो काय किरेल? एने किहीक तारा डोला उगड़ील?”

²⁷तो आंदलो माणुह ताह जापाप आप्यो, “मी ते तुमूह केय दिनो, एने तुमू नाह होमल्या। पोशा होमेलनेन आसा काहा केरतेह? काय तुमू बी तान चेला बोणने होदतेह?”

²⁸तेवी ता हाजो बाकतो केयीन ताह केया, “तुस तान चेलो एय; पुण आमु ते मुसान चेला हेते।

²⁹आमु जाणतेह काय बोगवान मुसा हिऱ्यो वातु किरेल ईतो; पुण ता माणहाह नाह जाणते काय तो कारीन आयेल हे!”

³⁰तो माणुह ताह जापाप आप्यो, “ज्यी ते बोंगलाणेन वात हे, ज्यो तुमूह नाह मालुम सोतो काय तो कारीन आयेल हे! पुण तो ते मारा डोला उगाड़ेल हे!

³¹आमु जाणतेह काय बोगवान पापी माणहान वात नाह होमलेत; पुण जा बोगवानान बोक्ती केरतेह एने तान मोरजी पोर चालेह, तान वात होमलेह।

³²जेल्माम रेच ने आंदलान माणहान डोला एगदो उगाड़ेल ओहली वात दुनियान सुरवात रेन केदी होमेलनाम आवी नाह।

³³केदी ज्यो माणुह बोगवानान उगे रेन नाय रेतो, ते कायच नाय केर सेकतो।”

³⁴ता ताह जापाप आप्या, “तु ते खेरीच पापाम पायदा ईयेल हे, आमुह तु काय हिकाड़ेह?” इहकेरीन केयीन ता ताह बोक्ती केरन्या गेरा माय रेन बाहेर काड़ देना।

³⁵जेवी यीशु हुमल्यो काय ता ताह बोक्ती केरन्या गेरा माय रेन बाहेर काड़ दियेल हेते, एने जेवी तो यीशुह मिलानो ते केयो, “तु बोगवानान बेटाख पोर बुरहो किरेह काय?”

³⁶तो माणुह जापाप आप्यो, “एय मालीक, तो कुण हे? जा पोर मी बुरहो केरू!”

³⁷यीशु ताह केयो, “ताह तु दिखेल हे, एने जो तार हिऱ्यो वातु केरने बाजरिनोह तोस तो हे।”

³⁸तो केयो, “एय मालीक! मी बुरहो केरथु।” एने तो पाया पोड़ीन यीशुह वोंद्यो।

³⁹तेवी यीशु केयो, “मी ज्यी दुनिया माय नियाव ने केरता आयेल हे, ज्यानकेरता काय जाह देखात नाह ताह देखाय, एने जाह देखाह ता आंदला एय जाती।”

⁴⁰जा फरिसी ता हेऱ्या एता, ता ज्यी वात होमलीन यीशुह केया, “ते आमु बी आंदला हेते काय?”

⁴¹यीशु ताह जापाप आप्यो, “केदी तुमू आंदला रेता, ते पापी नाय ठेराता; पुण आमुह देखाह इहकेरीन तुमू एवी केतेह, केरीन तुमरा पापान गुनो बोणीन रीथे।”