योहान 8

¹पुण यीशु जेतुनान बोयड़ा पोर गीयो।

²पासाण पुशो विगोच तो मोंदिर माय आवो। तेवी आखा माणहे यीशु फाय आवा, एने तो बोहीन ताह हिकाड़ने बाज गीयो।

³तेवी देरेमगुरू एने फरिसी एक बायकुह यीशु फाय लावा जी सिनालो केरतालीन देरायेल एती, एने तीह विची माय उबी केर देना।

⁴एने यीशुह केया, “एय गुरू, ज्यी बायकु सिनालो केरतालीन देरायेल हे।

⁵मुसो नेम माय आमुह ओहलो उकुम आपेल हे, ओहल्यु बायकुह देगड़ाठीन मार। पुण तु ज्यी बायकुन बाराम काय किथे?”

⁶ता यीशुह फासाड़नेन केरता इहकेरीन केणे बाज गीया, काहाकाय ता पोर गुनो लागाड़नेन केरता ताह एगदी वात जुड़ जाय। पुण यीशु निड़ो डोंगो वोलीन आंगली केरीन बुय पोर लेखणे बाज गीयो।

⁷जेवी ता यीशुह फुसतेस रेना, ते यीशु हुतरोच उबरेन ताह केयो, “तुमू माय रेन जो पापी नाह सोतो, तोस पेल ज्यी बायकुह देगड़ा केरीन देय।”

⁸यीशु पुशो निड़ो डोंगो वोलीन बुय पोर आंगली केरीन लेखणे बाज गीयो।

⁹पुण ता इहकेरीन होमलीन डावाला रेन ते आतल्या वोर आखा एकान पासाण एक निकलीन जात रेना। यीशु एखालोच रेय गीयो, एने ती बायकु विची माय ताहरीस उबरियेल एती।

¹⁰यीशु हुतरो एन तीह केयो, “एय बाय, ता काहरी जात रेना? तुवाह कुण डेंडान उकुम नाह आप्या काय?”

¹¹ती केयी, “एय मालीक, कुणीस नाह।”

¹²यीशु उंजु माणहाह केयो, “दुनियान उजालो मी हे, जो मार पासाण आवी। तो आंदारलाम नाय चाली, पुण ताह फाय जीवणान उजालो रेय।”

¹³फरिसी यीशुह जापाप आप्या, “तारीस गोवाय तुस देणे बाजरिनोह; तारी गोवाय खेरली नाह नाय मिल।”

¹⁴यीशु ताह जापाप आप्यो, “मी सोतान बाराम गोवाय दिनो, तीबी मारी गोवाय खेरली हे, काहाकाय मी कारीन आयेल हे एने काहरी जाथु ज्य माहु मालुम हे। पुण मी कारीन आवथु एने का जाथु ज्यो तुमूह मालुम नाह नाय सोतो।

¹⁵तुमू माणहान रितीन गेत नियाव केरतेह; पुण मी कुणान नियाव नाह किरेत।

¹⁶एने केदी मी एगदान नियाव केरूह बी, ते मारो नियाव खेरलो हे, काहाकाय मी एखालो नाह सुतो; पुण मी हे एने आबोख हे, जो माहु मुकलेल हे।

¹⁷एने तुमरा नेम माय बी लिखेल हे, दुय जाणान गोवाय मिलीन खेरीच मानाय जाथे,

¹⁸एक ते मी सोता मारी गोवाय देथु, एने दिहरी आबोख मारी गोवाय दिथे जो माहु मुकलेल हे।”

¹⁹ता यीशुह केया, “तारो आबोख काहरी हे?”

²⁰ज्‍यु वातु यीशु मोंदिर ने दान पेटी हिऱ्यो हिकाड़तालोन केयो, एने ताह कुण देऱ्या नाह। काहाकाय ताह वोर तान टेम आयेल नाह एतो।

²¹यीशु ताह पुशो केयो, “जा मी जाणे बाजरिनोह, एने तुमू माहु हुदहो एने तुमू तुमरा पापाम मुरहो; जाहरी मी जाथु। ताहरी तुमू नाह आव सेकते।”

²²ज्या पोर यहुदि आदिकारी केया, “काय ज्यो सोताह मार देय? काहाकाय तो किथे, जाहरी मी जाथु ताहरी तुमू नाह आव सेकते?”

²³यीशु ताह केयो, “तुमू नेचाला हेते, मी उपेर वालो हे, तुमू दुनियान हेते। पुण मी दुनियान नाह सोतो।

²⁴केरीन मी तुमूह कियेल काय तुमू तुमरा पापाम मुरहो। काहाकाय मी जो हे तोस हे ओहलो बुरहो तुमू नाय किरहो, ताहार तुमू तुमरा पापाम मुरहो।”

²⁵ता यीशुह केया, “तु कुण हे?”

²⁶माहु तुमरे बाराम जुलूम वातु केणु हे, एने हुमचो केरनु हे। पुण जो माहु मुकलेल हे, तो खीरलो हे, एने ज्‍यु वातु मी ता फाय रेन हुमलेल हे, त्यु मी दुनियाह केथु।”

²⁷आबाख ने बाराम किथे, ज्यो ताह सोमजानो नाह।

²⁸तेवी यीशु ताह केयो, “जेवी तुमू माणहान बेटाख उचा किरहो, तेवी तुमू जाणहो काय मी जो हे तोस हे; एने मी सोताच काय नाह किरेत, पुण जिहकेरीन मारो आबोख माहु हिकाड़ेल हे तिहेच केरीन ज्‍यु वातु केथु।

²⁹एने माहु मोकेलनार मार हिऱ्यो हे; तो माहु एखालो नाह सोड्यो, काहाकाय मी जेलेम मार आबाख पुटीह ओहलो काम केरथु।”

³⁰तेवी जुलूम होवटा माणहे यीशुन वात होमलीन ता पोर बुरहो केऱ्या।

³¹जा यहुदि यीशु पोर बुरहो किरेल एता, ताह यीशु केयो, “केदी तुमू मारा हिकवोणान पालेन किरहो, ते खेरीच मारा चेला केवाहो।

³²तुमू खेरायीह जाणहो, एने खेराय तुमूह सोड़वी।”

³³ता यीशुह जापाप आप्या, “आमु ते अब्राहामान वोसीन हेते, एने आमु केदी बी कुणीन पावोर नाह बोणना। उवतो तु किहीक केय सिकेह काय तुमू सोड़वाय जाहो?”

³⁴यीशु ताह जापाप आप्यो, “मी तुमूह खेरीच केथु काय जो कुण पाप किरेह तो पापान पावोर हे।

³⁵एने पावोर जेलेम कुटूमा हिऱ्यो नाह रेणे, पुण गेरावालो बिटोख जेलेम गेरा माय रीथे।

³⁶केरीन केदी बिटोख तुमूह सोड़वी, ताहार खेरीच तुमू सोड़वाय जाहो।

³⁷माहु मालुम हे काय तुमू अब्राहाम ने वोसीन हेते। तीबी तुमू मार वचनाह स्वीकार केरती नाह, केरीन तुमू माहु मारावणे होदतेह।

³⁸मी आबाख फाय जो दिखेल हे तोस तुमूह केथु, तिहेच केरीन तुमू आबाख फाय रेन जो हुमलेल हेते तोस केरतेह।”

³⁹ता यीशुह जापाप आप्या, “आमरो आबोख ते अब्राहाम हे।”

⁴⁰पुण मी ते तुमूह बोगवाना फाय रेन हुमलेल तो खेरायीन वचन केथु, तीबी तुमू माहु मारावणे होदतेह। पुण अब्राहाम ते इहकेरीन नाह किऱ्यो।

⁴¹तुमू तुमरा आबाख ने गेत काम केरतेह।”

⁴²यीशु ताह केयो, “केदी बोगवान तुमरो आबोख रितो, ताहार तुमू माहु मोंग केरता, काहाकाय मी बोगवानान उगे रेन आयेल हे। मी सोतान मोरजीम नाह आवो, पुण तोस माहु मुकलेल हे।

⁴³तुमू मारी वात काहा नाह सोमेजते? काहाकाय तुमू मारा वचनाह होमेल नाह सेकते।

⁴⁴तुमू तुमरा आबाख बुतड़ान हेते, एने तुमू तान मोरजीह पुरी केरने होदतेह। तो ते सुरवात रेन खुनी हे एने तो खेराय पोर टिकनो नाह, काहाकाय ता माय खेराय सोतीस नाह। जेवी तो जुठ बोलने, ते तान सोबाव केरीन बुलेह, काहाकाय तो जुठो हे एने जुठान आबोख हे।

⁴⁵पुण मी तुमूह खेरीच केथु, केरीन तुमू मार पोर बुरहो नाह केरते।

⁴⁶तुमू माय रेन कुण माहु पापी ठेरावेह? मी खेरीच केथु, तीबी मार पोर बुरहो काहा नाह केरते?

⁴⁷जो बोगवानान उगे रेन हे, तो बोगवानान वातु हुमलेह। एने तुमू बोगवानान उगे रेन नाह सोता, केरीन तुमू होमेलते नाह।”

⁴⁸ज्यो होमलीन यहुदि आदिकारी यीशुह सावाल फुशा, “तु सामरी हे, एने तार माय बुतड़ो हे, आमु जो केतेह तो बाराबोर हे काय नाह?”

⁴⁹यीशु जापाप आप्यो, “माहु माय बुतड़ो नाह नाय मिले, पुण मी मारा आबाख ने मान मेलथु, एने तुमू मारी ओबरू वेरतेह।

⁵⁰मी सोता मारी बोड़ाय नाह हुदेत। पुण एक हे जो मारी बोड़ाय हुदेह एने तो माहु नियाव केरनार ठेरावीह।

⁵¹मी तुमूह खेरीच केथु: जो मार हिकवोणीह पालेह, तो मोतीह केदी नाय देखी।”

⁵²यहुदि यीशुह केया, “एवी आमु सोमजी गीया काय तार माय बुतड़ो हे! अब्राहाम मोर गीयो, एने जाणाव केरनार बी मोर गीया एने तु किथे, जो मार हिकवोणीह पालेह, तो मोतीह केदी नाय देखी।

⁵³आमरो आबोख अब्राहाम ते मोर गीयो; काय तु ताह रेन मुठो हे? एने जाणाव केरनार बी मोर गीया। तुवाह काय लागेह काय तु कुण हे?”

⁵⁴यीशु ताह जापाप आप्यो, “मी सोता मारी बोड़ाय केरूह ताहार मारी बोड़ाय काईच नाह सोती, पुण मारी बोड़ाय केरनार मारो आबोख हे। जाह तुमू केतेह काय आमरो बोगवान हे।

⁵⁵तीबी तुमू ताह ओलख्या नाह, पुण मी ताह ओलेखथु। एने मी ताह ओलखेत नाह, इहकेरीन केदी मी केह ताहार मी तुमरी गेत जुठो बोणुह। पुण मी ताह ओलेखथु, एने तान हिकवोणान पालेन केरथु।

⁵⁶तुमरो आबोख अब्राहाम मारो दिह देखणेन आसा केरीन जुलूम खुस ईतो; एने तो देख्यो एने खुसी माणायो।”

⁵⁷तेवी यहुदि आदिकारी यीशुह केया, “एवी वोर तु पाचाह वोरह्यान नाह ईनो, ते तु अब्राहामाह किहीक दिखेल हे?”8:57 काय तुमू अब्राहामाह दिखेल हेते? थोड़ाक लेख माय काय अब्राहाम तुमूह दिखेल हे? लिखेल हे।

⁵⁸यीशु ताह केयो, “मी तुमूह खेरीच केथु, अब्राहाम पायदा एणेन पेलुच रेन मी हे।”

⁵⁹तेवी ता यीशुह देणेन केरता दिगोड़ विशा, पुण यीशु लीकीन मोंदिर माय रेन बाहेर निकील गीयो।