लुका 23

¹तेवी आखा पोंचान माणहे उठना एने यीशुह पिलातुस फाय ली गीया।

²ताहरो ता इहकेरीन केयीन यीशु पोर गुनो लागाड़ने बाज गीया: “ज्यो आमरा यहुदि माणहाह बोड़कावणे बाजरिनोह, एने रोमन राजाह फालो आपणेन विरोद किरेह, एने आपणे आपाह मसी एक राजा किथे।”

³पिलातुस यीशुह फुशो, “तु यहुदिन राजा हे काय?” यीशु जापाप आप्यो, “तुसते किथे मी तोस हे।”

⁴तेवी पिलातुस मुखी चाकऱ्याह एने गेरदीह केयो, “माहु ज्या एदम्‍याम काय गुनो नाह देखात।”

⁵पुण ता उंजु बी जुलूम जोरेस केणे बाज गीया, “ज्यो गेलील रेन ते न्या वोर, आखा यहुदिया देसान माणहाह हिकाड़ी हिकाड़ीन बोड़काव दियेल हे।”

⁶ज्य होमलीन पिलातुस फुशो, “ज्यु एदमी गेलील वालो हे काय?”

⁷एने ज्य जाणीन काय यीशु हेरोदेसान आदिकार वालो हे, ते ताह हेरोदेस फाय मोकली दिनो, काहाकाय ता दिह्या माय हेरोद बी यरूशलेम माय ईतो।

⁸हेरोदेस यीशुह देखीन जुलूम खुस एय गीयो, काहाकाय तो जुलूम दिह्यान ताह देखणे होदतालो; तो तान बाराम होमलेल ईतो, एने ता फाय रेन चोमेत्कार देखणेन आसा केरतालो।

⁹हेरोद यीशुह जुलूम सावाल फुसते रिनो, पुण यीशु ताह कायच जापाप नाह आप्यो।

¹⁰मुखी चाकऱ्या एने देरेमगुरू यीशु पोर जुलूम वातीन गुनो लागाड़ते रेना।

¹¹तेवी हेरोदेस तान सिपाया हिऱ्यो यीशुन ईजुत लेन तान चिहटा केऱ्यो, उवतो जुलूम जामण्या फाड़का पेरावीन पोशो पिलातुस फाय मोकली दिनो।

¹²ते दिह रेन पिलातुस एने हेरोदेस राजान दोस्ती एय गियी; तान पेल ता एका दिहरान दुसमोन एता।

¹³पिलातुस मुखी चाकऱ्याह एने आदिकारीह एने माणहाह हाद्यो,

¹⁴एने तो ताह केयो, “तुमू ज्या माणहाह बोड़कावणार केयीन मार फाय लावाह, एने हुमलो, मी तुमरी ओंगाणुच ज्याह पारेख लियेल हे, पुण जी वातीन तुमू गुनो लागाड़ने बाजरेनाह ती वातीन बाराम माहु ज्या फाय कायच गुनो नाह सापड़नो;

¹⁵हेरोदेस राजाह ज्या माय काय गुनो नाह सापड़नो, केरीन तो ज्याह आमरी फाय पुशो मोकली दियेल हे एने हुमलो, ज्याह मारने डेंड आपणे हारको काय गुनो नाह सापड़ेल सोतो।

¹⁶तानकेरता मी ज्याह चापका देवाड़ीन सोड़ देह।”

¹⁷23:17 थोड़ाक लेख माय ज्यो वचन जुड़ेल हे (देखी मरकुस 15:5।)पिलातुस तिवारान टेम माय यहुदि माणहान केरता एक आरापीह सोड़ देतालो।

¹⁸पुण ता आखा माणहे आयड़ीन केया, “ज्याह मार टाक एने आमरी केरता बरअब्बाह सोड़ दे!”

¹⁹रोमी सारकारान विरोद माय हेयराम देंगो एने खुन किरेल ईतो, केरीन बरअब्बा जेली माय कोंडायेल ईतो।

²⁰पिलातुस यीशुह सोड़ने होदतालो, केरीन माणहाह उंजु सोमजाड्यो,

²¹पुण माणहे पोशा आयड़ीन केया, “ओयाह खुरूसखाम पोर चेड़ाव, खुरूसखाम पोर!”

²²पिलातुस तिसरी वार ताह फुशो, “काहा, ज्यो काय गुनो किरेल हे? माहु ते ज्या माय मोतीन डेंड आपणेन कायच गेलती नाह देखात। तानकेरता मी ज्याह चापका देवाड़ीन सोड़ दिथो।”

²³पुण ता आयड़ी आयड़ीन पासाण पोड़ गीया काय यीशु खुरूसखाम पोर चेड़ावाय जाय, एने सेवली बुखेत माणहान आयेड़नो सफल एनो।

²⁴जीहे माणहे मांग केऱ्या तिहेच पिलातुस यीशुह खुरूसखाम पोर चेड़ावणेन उकुम आप्यो।

²⁵बरअब्बा देंगो किरेल एने खुन किरेल तानकेरता जेली माय कोंडायेल ईतो, एने जाह ता मांगताला, ताह सोड़ दिनो; पुण यीशुह तान मोरजीन गेत तान आथाम होप दिनो काय ताह जो केरनु हे ता हेऱ्या केरी।

²⁶जेवी सिपायड़ा यीशुह ली जाणे बाजरियेल एता, तुलेचबूखे कुरेन गावाम रेणार शिमोन नावान एक माणुह हेयराम रेन आवणे बाजरियेल ईतो, तेवी सिपायड़ा ताह देरीन यीशुन खुरूसखाम उखलाड्या एने यीशुन पासाण पासाण चालने लागाड्या।

²⁷जुलूम माणहे यीशुन पासाण पासाण चाल पोड़ना ता माय जुलूम बायकु बी एत्यु त्यु यीशुन केरता साती ठोकी ठोकीन रेड़ने बाजरियेल एत्यु।

²⁸यीशु त्युन उगे फिरीन केयो, “एय यरूशलेमान बेट्युख, मार केरता मा रिड़ो; पुण तुमरे एने तुमरा सोरान केरता रिड़ो।

²⁹काहाकाय ओहला दिह आवती, ते माणहे केती, ‘ज्‍यु वांज हेत्यु त्यु बोरकेतवाल्यु हेत्यु ज्‍यु सोराह पायदा नाह किऱ्यो एने दुद नाह पिवाड्यु, त्यु बोरकेतवाल्यु हेत्यु।’

³⁰23:30 प्रकाशितवाक्य 6:16ती टेम माय त्यु बोयड़ाह केती काय आमरी पोर ओदरी पोड़ी, एने बोयड्युह केती आमुह डाप लिवो।

³¹काहाकाय ता निल्ला जाड़ा हेऱ्या ओहला केरतेह, ते हुकेल जाड़ा हेऱ्या काय काय नाय केरती?”

³²ता दिहरा दुय आरापीह, यीशु हेऱ्या खुरूसखाम पोर मारने ली गीया।

³³ता खोपड़ी नावान जागे पोचना, ता यीशुह खुरूसखाम पोर चेड़ाया, एक डाकुह तान जीवड़े उगे एने दिहराह डाखरे उगे चेड़ाया।

³⁴तेवी यीशु केयो, “एय आबा, न्याह माफ केर, काहाकाय ज्या जो केरने बाजरेनाह तो नाह जाणते।”23:34 थोड़ाक लेख माय यीशु केयो, “एय आबा, न्याह माफ केर, काहाकाय ज्या जो केरने बाजरेनाह तो नाह जाणते!” नाह लिखेल सोतो। ओवता ता चिटठ्यु टाकीन यीशुन फाड़का वाट लेदा।

³⁵माणहे उबरीन देखणे बाजरियेल एता, एने यहुदिन मुखी बी यीशुन मोजाक केरीन केतालो: “ज्यो दिहराह वोचाड्यो, तु खेरीच बोगवानान निवाड़ेल मसी एय ते, आपणे आपाह वोचाड़ ले।”

³⁶सिपायड़ा बी आहने आवीन एने माणलो अंगुरान रोह चुहाड़ीन यीशुन मोजाक केरीन केताला,

³⁷“तु खेरीच यहुदिन राजा एय, ते आपणे आपाह वोचाड़ ले!”

³⁸एने तान खुरूसखाम ने उपेर गुनान चिट्ठी लेखीन लागाड़ मीलेल एती: “ज्यो यहुदिन राजा हे।”

³⁹यीशु हेऱ्या दुय आरापी बी खुरूसखाम पोर चेड़ायेल एता, ताम रेन एक आरापी यीशुन चिहटा केरीन केयो, “तु मसी नाह सुतो काय? खेरीच तु मसी एय ते आपणे आपाह एने आमुह बी वोचाड़।”

⁴⁰पुण दिहरो आरापी ताह दोपकावीन केयो, “तु बोगवानाह बी नाह बित काय? तु बी ते तोच डेंड बोगेतणे बाजरिनोह,

⁴¹आपु ते आपणा नियाव ने गेत डेंड बोगेतणे बाजरेनाह, काहाकाय आपु आपणा कामान गेत तोहलो फोल सापड़ाव रेनाह; पुण ज्यो ते काल्लो गेलेत काम नाह किरेल सुतो।”

⁴²ओवतो तो यीशुह केयो, “एय यीशु, जेवी तु तारा राज हिऱ्यो आवहे ताहार तु माहु बी एर किरजे।”

⁴³यीशु ताह केयो, “मी तुवाह खेरीच केथु काय आजुच तु मार हिऱ्यो हेरगा माय रिहे।”

⁴⁴ती टेम माय हिराणेन बारा वाचता रेन तीन वाचता वोर आखा देसा माय आदारो एय गीयो;

⁴⁵तेवी दिह्यान उजालो बोंद एय गीयो एने मोंदिरान पुड़दो फाटीन दुय टुकड़ा एय गीया।

⁴⁶एने यीशु जोरेस आयड़ीन केयो, “एय आबा, मी मारो जीव तारा आथाम होपथु।” इहकेरीन केयीन तो मोर गीयो।

⁴⁷ज्य आखो देखीन सिपायड़ान मुखी, बोगवानान बोड़ाय केरीन केयो, “खेरीच ज्यो माणुह देरमी ईतो।”

⁴⁸जा माणहे ज्यी गेटनाह देखणे बाजरियेल एता, ता साती ठोकते जाईन पोशा जात रेना।

⁴⁹23:49 लुका 8:2,3पुण यीशु हेऱ्यो गेलील रेन ज्‍यु बायकु पासाण पासाण आयेल एत्यु, त्यु एने तान ओलखातीन आखा माणहे, सेटाच उबरीन देखणे बाजरियेल एता।

⁵⁰ता युसूफ नावान एक हाजो एदमी ईतो, तो यहुदिन मोटला पोंचान एक माणुह ईतो,

⁵¹तो यहुदिन फेसला माय एने यहुदिन कामा माय बेचकायेल नाह ईतो। तो यहुदिन हेयरान अरीमतीया गावाम रेतालो एने तो बोगवानान राज आवी इहकेरीन वाट जोवतालो।

⁵²एने तो पिलातुस फाय जाईन यीशुन देड़ मांग्‍यो;

⁵³तेवी देड़ाह खुरूसखाम पोर रेन उतारीन हुवाल्ली डाठी माय गुंडालीन एक माहणाम मिल्यो, तो माहेण सापराट्याम खुदेल एतो; एने ता माय उंजु कुणीह नाह मीलेल एता।

⁵⁴तो दिह तियारीन दिह ईतो, एने विहेवणेन दिह आवण्यो ईतो।

⁵⁵गेलील रेन आयेल बायकु युसूफान पासाण पासाण जाईन ता माहणाह देख्यु, एने यीशुन देड़ाह किहीक मेल्या तो सोब देख्यु।

⁵⁶ओवत्यु त्यु पोशु गेर गीयु एने यीशुन देड़ा पोर लागाड़नेन केरता मोग मोग गेंदाणार तेल एने सोमान तियार किऱ्यो; एने यहुदि नेम ने गेत विहेवणेन दिह त्यु आराम केऱ्यु।