मत्ती 25

¹तेवी हेरगान राज त्यु दोह कुवाऱ्युन गेत रेय, ज्यु दिवा लेन वोवड़ाह मिलनेन निकेलन्यु।

²त्युम रेन पाच फोग्यु एने पाच सोमेजदार एत्यु।

³त्यु फोग्यु त्युन दिवा ते लेद्यु, पुण आरही तेल नाह लेद्यु;

⁴पुण सोमेजदार त्युन दिवा हेऱ्यु सिसी माय तेल बी बोर लेद्यु।

⁵जेवी वोवड़ाह आवणेन वार लाग गियी, ते त्यु आख्‍यु जोपणे बाज गीयो, एने हुव गीयो।

⁶आदि राती ओहली पुकार पोड़नी, “वोवड़ो आवणे बाजरिनोह, ताह मिलणेन केरता चालो।”

⁷तेवी त्यु आख्‍यु कुवाऱ्यु उठेन त्युन दिवा हुदारने बाज गीयु।

⁸एने फोग्यु सोमेजदाऱ्युह केयु, “तुमरा तेला माय रेन थोड़ोक आमुह बी आपो, काहाकाय आमरा दिवा ओलाणे केरतेह।”

⁹पुण सोमेजदाऱ्यु जापाप आप्यो, “ज्य आमरी एने तुमरी केरता पुरो नाय एय; हाजो ते ज्यो हे काय तुमू वेचणारा फाय जाईन तुमरी केरता वेचातो लेन आवो।

¹⁰जेवी त्यु वेचातो तेल लेणेन जाणे बाजरियेल एत्युन वोवड़ो आव गीयो, एने ज्‍यु तियार एत्यु, त्यु ता हेऱ्यु वाराड़ान गेरा माय जात रेन्यु, एने बायणो बोंद एय गीयो।”

¹¹पासाण रेन त्यु कुवाऱ्यु बी आवीन केत्युह, “एय मालीक, एय मालीक, आमरे केरता बी बायणो उगाड़ दे।”

¹²पुण वुवड़ो जापाप आप्यो, “मी तुमूह खेरीच केथु, मी तुमूह उलखेत नाह।”25:12 लुका 13:25

¹³तानकेरता जाकता रिवो, काहाकाय तुमू नाहते ता दिह्याह जाणते, नाहते तुलबूखेन टेमाह।25:13 मरकुस 13:36

¹⁴काहाकाय ज्य ता माणहान गेत हे, जो दिहरा देसा माय जाणे बुखेत तान पावराह हादिन तान मालदेन ताह होप देणे।

¹⁵तो एकाह पाच एजार होनान सिक्का, दिहराह दुय एजार एने तिसराह एक एजार, मतलब एकेकाह तान ताकेतीन ईसाब माय आप्यो, एने तेवी तो दिहरा देसा माय जात रिनो।

¹⁶तेवी जाह पाच एजार होनान सिक्का जुड़ेल एता, तो तुलेचबूखे जाईन ता पोयशान लेन देन केऱ्यो, एने उंजु पाच एजार कामाव लेदो।

¹⁷तिहेच केरीन जाह दुय एजार होनान सिक्का जुड़ेल एता, तो बी उंजु दुय एजार कामाव लेदो।

¹⁸पुण जाह एक एजार होनान सिक्का जुड़ेल एता, तो जाईन खाडो खुद्यो, एने तान मालक्यान मालदेन लिकाड़ दिनो। होनान सिक्को

¹⁹मोकतास दिह्यान पासाण ता पावरान मालीक पुशो आवीन ता फाय ईसाब लिथे।

²⁰जाह पाच एजार होनान सिक्का जुड़ेल एता, तो पाच एजार उंजु लावीन केयो, “एय मालीक, तु माहु पाच एजार होनान सिक्का हुपेल ईतो, देख, मी पाच एजार उंजु कामायेल हे।”

²¹तान मालीक ताह केयो, “जुलूम हाजो हे, हाजो एने ईमानदार पावोर तु थोड़ाच माय ईमानदार रिनो, मी तुवाह जुलूम मालदेनान आदिकारी बाणावुह। तु तारा मालक्यान खुसी माय मिलाय जा।”

²²एने जाह दुय एजार होनान सिक्‍का जुड़ेल एता, तो बी आवीन केयो, “एय मालीक, तु माहु दुय एजार होनान सिक्‍का होपेल ईतो, देख, मी बी दुय एजार उंजु कामायेल हे।”

²³तान मालीक ताह केयो, जुलूम हाजो हे, हाजो एने बोरहावालो पावोर, तु थोड़ाच माय बोरहावालो रिनो, मी तुवाह जुलूम मालदेनान आदिकारी बाणावुह, तारा मालक्यान खुसी माय मिलाय जा।

²⁴तेवी जाह एक एजार होनान सिक्का जुड़ेल एता, तो आवीन केयो, एय मालीक, मी तुवाह जाणतालो काय तु वातड़ो माणुह हे, तु जा का नाह पेरने तास काटणे, एने जा पोसार ने नाह ता रेन टुलो केरने।

²⁵तानकेरता मी बिय जायेल एने जाईन तारो मालदेन माटड्या माय लिकाड़ दियेल, “देख, जो तारो हे, तो ज्यो हे।”

²⁶तान मालीक ताह जापाप आप्यो, “एय खाराब एने आलह्या पावोर, जेवी तु ज्य जाणतालो काय जा मी नाह पिऱ्यो ता रेन काटणे, एने जा मी पोसरायेल नाह ता रेन टुलो केरने।

²⁷ते तु मार पोयशा होवकारा फाय मेल देणु एतो। तेवी मी आवीन वियाजतोज ता फाय रेन लेय लितो।

²⁸तानकेरता ता एजार होनान सिक्का ता फाय रेन लेय लिवो, एने जा फाय दोह एजार होनान सिक्का हेते, ताह आप दिवो।

²⁹25:29 मत्ती 13:12; मरकुस 4:25; लुका 8:18काहाकाय जा कुणा फाय हे, ताह उंजु जुड़ी, एने ता फाय जुलूम एय जाय; पुण जा फाय नाह सोतो ता फाय रेन तो बी जो ता फाय हे, सांडाड़ाय जाय।

³⁰25:30 मत्ती 8:12; 22:13; लुका 13:28एने ज्या खाराब पावराह बाहेर आंदारा माय जुगार दिवो, ता रेड़णो एने दात केकड़ावणे हे।”

³¹जेवी माणहान बिटोख तान बोड़ाय माय आवी, एने आखा हेरोगदुत ता हेऱ्या आवती, ते तो तान बोड़ाय ने राजगादि पोर बोही,

³²एने आखा देसान माणहे तान सोमोर टुलो एय जाती; एने जीहे गोवाल मेंड्राह बोकड्या माय रेन आंगे केर दिथे, तिहेस तो ताह एका दिहराह रेन आंगे केरी।

³³तो मेंड्राह तान जीवड़े उगे एने बोकड्याह डाखरे उगे उबो केरी।25:33 मेंड्रा एने बोकड्यान मतलब खेरला माणहे

³⁴तेवी राजा तान जीवड़े उगे वालाह केय, “एय मार आबाख ने बोरकेतवाला माणहे, आवो, ता राज ने आदिकारी बोण जावो, जो देरतीह रेन पेल तुमरे केरता तियार किरेल हे।

³⁵काहाकाय मी बुखल्यो ईतो, एने तुमू माहु खाणेन आपेल; मी तिहल्यो ईतो, एने तुमू माहु पाणी पिवाड़ेल; मी एंजाण्यो ईतो, एने तुमू माहु तुमरा गेरा माय हादिल;

³⁶मी उगाल्लोस ईतो, एने तुमू माहु फाड़का पेरायेल; मी दुखाऱ्यो ईतो, एने तुमू मारी चाकरी किरेल, मी जेली माय ईतो, एने तुमू माहु मिलने आयेल।”

³⁷तेवी खेरला माणहे ताह जापाप देती, “एय मालीक, आमु कुलबुखे तुवाह बुखल्यो दिखेल एने खावाड़ेल? एने तिहल्यो दिखेल एने पाणी पिवाड़ेल?

³⁸आमु तुवाह कुलबुखे पारको दिखेल, एने आमरा गेरा माय हादिल नाहते उगड़ो दिखेल, एने फाड़का पेरायेल?

³⁹आमु केदीह तुवाह दुखाऱ्यो नाहते जेली माय दिखेल, एने तुवाह मिलने आवाला?

⁴⁰तेवी राजा ताह जापाप देय, मी तुमूह खेरीच केथु, काय तुमू जा मारा न्या आत्याम रेन आत्या बायाख माय रेन एका हेऱ्या किरेल, तो मार हेऱ्याच किरेल।”

⁴¹तेवी तो डाखरे उगे वालाह केय, “एय हारापेल माणहे, मार ओंगाण रेन पोला जेलेमक्या आक्‍ठा माय जात रिवो, जो सैतान एने तान दुतान केरता तियार किरेल हे।

⁴²काहाकाय मी बुखल्यो ईतो, एने तुमू माहु खाणेन नाह आप्या, मी तिहल्यो ईतो, एने तुमू माहु पाणी नाह पिवाड़ेल;

⁴³मी पारको ईतो, एने तुमू माहु गेरा माय नाह हादिल; मी उगड़ो ईतो, एने तुमू माहु फाड़का नाह पेरायेल; मी दुखाऱ्यो एने जेली माय ईतो, एने तुमू मारी चाकरी नाह केऱ्या।”

⁴⁴तेवी ता जापाप देती, “एय मालीक, आमु केदीह तुवाह बुखल्यो, तिहल्यो, नाहते पारको, नाहते उगड़ो, दुखाऱ्यो, नाहते जेली माय दिखेल, एने तारी सेवा चाकरी नाह केऱ्या?”

⁴⁵तेवी तो जापाप आपी, “मी तुमूह खेरीच केथु काय तुमू जा न्या आत्याम रेन आत्यान काल्लास ने मोदेक नाह केऱ्या, तो मार हेऱ्या बी नाह केऱ्या।

⁴⁶एने ज्या जेलेमक्यास डेंड बोगती, पुण खेरला माणहे जेलेमक्यास जीवाय माय पोच जाती।”25:46 दानिएल 12:2