मत्ती 14

¹ता दिह्या माय गेलील देसान राजा हेरोदेस यीशुन बाराम होमल्यो,

²एने तान पावराह केयो, “ज्यो खेरीच बपतीस्मा केरनार योहान हे, तो मुरेल माय रेन जीव उठेल हे, तानकेरता ताकेत ने काम तान द्‍वारे एतेह।”

³काहाकाय हेरोदेस राजा तान बाहख फिलीपुस ने बायकु हेरोदियास ने वोजेसे, योहानाह बांदिन जेली माय कोंडाड़ दियेल ईतो।

⁴काहाकाय योहान ताह कियेल ईतो, “ज्यीह राखणे तार केरता हाजो नाह सोतो!”14:4 लेव्यवस्था 18:16; 20:21

⁵तानकेरता हेरोदेस राजा ताह मारनेन होदतालो, पुण यहुदि माणहाह बितालो, काहाकाय ता माणहे योहानाह जाणकार मानताला।

⁶पुण जेवी हेरोदेस राजान जेल्मो दिह आवो, तेवी हेरोदियास ने सोरी माय नाच देखाड़ीन हेरोदेसाह खुस केरी।

⁷तेवी राजा सुगोण खाईन तीह केयो, “जो काय तु माहु फाय मांगहे मी तो तुवाह आपु!”

⁸तीन आहख तीह कियेल केरीन ती केयी, “योहान बपतीस्मा केरनारान मुंड काटाड़ीन एक पाराती माय मेलीन मार केरता मांगाड़ दे!”

⁹राजा ज्य होमलीन जुलूम नाराज एय गीयो, पुण ता हेऱ्या बोह रियेल पावणान ओंगाण सुगोण खायेल ईतो, तानकेरता तीन वात मान लिदो।

¹⁰एने राजा सिपायड़ाह उकुम आप्यो काय योहानान मुंड काटीन तीह लावीन आप दिवो।

¹¹एने योहानान मुंड काटीन पाराती माय मेलीन लावो, एने सोरीह आप दिनो, एने सोरी तीन आईख आप देनी।

¹²तेवी योहानान चेला आवीन देड़ाह ली जाईन बुज देना, एने ता यीशु फाय जाईन खुबेर आप्या।

¹³जेवी यीशु योहानान मोतीन बाराम होमल्यो, ते डोंडह्या माय बोहीन एखालोच हुनाला जागाम जात रिनो, एने माणहे ज्य होमलीन हेयरा हेयरा रेन पायेच ता फाय गीया।

¹⁴जेवी यीशु डोंडह्या माय रेन उतरीन दिड़े आवो, ते ता माणहे जुलूम टुलो एय रियेल दिख्यो, एने यीशु ता पोर किव किऱ्यो एने तान बेमारीह हुदार दिनो।

¹⁵जेवी हांज एनी ते चेला यीशुन आहने आवीन केया, “ज्यो हुनालो जागो हे, एने दिह जुलूम डेल जायेल हे। न्या माणहाह मुकेल दे, काय ता गावा माय जाईन तान केरता खाणो वेचातो लेती।”

¹⁶पुण यीशु ताह जापाप आप्यो, “न्याह जाणेन जोरवुत नाह सोती, तुमूच न्याह खाणेन आपो।”

¹⁷चेला ताह केया, “न्या आमु फाय पाच रोटा एने दुय मासाह सोड़ीन दिहरो कायच नाह सोतो।”

¹⁸यीशु ताह केयो, “ताह मार फाय लावो।”

¹⁹तेवी यीशु माणहाह खेड़ा पोर बोहणेन उकुम आप्यो; एने ता पाच रोटाह एने दुय मासाह लिदो एने हेरगान उगे देखीन बोगवानान दन्यवाद किऱ्यो। एने रोटा मुड़ मुड़ीन चेलाह आप्यो, एने चेला माणहाह आप्या।

²⁰जेवी आखा माणहे खाईन आफरी गीया। तेवी चेला वोचेल रोटान टुकड़ा बारा टोपला बोरीन विशा।

²¹एने रोटा खाणारे बायकु एने सोराह सोड़ीन पाच एजार एदमीच एता।

²²तेवी यीशु चालोस तान चेलाह डोंडह्या माय चेड़नेन केरता विन्ता किऱ्यो काय ताह रेन पेल ता ती पार जात रेती, जाह वोर काय तो माणहाह मोकली।

²³यीशु माणहाह मोकली देन बोयड़ा पोर विन्ता केरनेन केरता आंगेच जात रिनो, एने हांज पोर तो एखालोच ईतो।

²⁴ती टेम डोंडह्यो देरीयान विचीम लाटा माय डोलाणे बाजरियेल एतो, काहाकाय वारो सोमोर रेन एतो।

²⁵एने यीशु राती तीन ते सोव वाचतान टेम माय पाण्या पोर चालतेन तान आहने आवो।

²⁶चेला ताह पाण्या पोर चालतालो देखीन गाबराय गीया, एने केणे बाज गीया, “ज्यो बुत हे!” एने ता आयेड़ने बाज गीया।

²⁷तेवी यीशु ता हिऱ्यो चालोस वातु किऱ्यो एने केयो, “ईमोत मिलो! मी हे, बिवो मा!”

²⁸पतरस ताह जापाप आप्यो, “एय मालीक केदी तुस हे, ते माहु तार फाय पाण्या पोर चालीन आवणेन उकुम आप।”

²⁹तो केयो, “आव!” तेवी पतरस डोंडह्या पोर रेन उतरीन यीशु फाय जाणेन केरता पाण्या पोर चालने बाज गीयो।

³⁰पुण वाराह देखीन बिय गीयो, एने जेवी पतरस बुड़ने बाज गीयो ते आयड़ीन केयो, “एय मालीक, माहु वोचाड़।”

³¹यीशु चालोस तान आथ देर लिदो एने ताह केयो, “एय अविश्वासी तु काहा सेंका किऱ्यो?”

³²जेवी ता दुयू डोंडह्या पोर चेड़ गीया, तेवी वादोण वारो थोब गीयो।

³³ज्य देखीन ता जा डोंडह्‍याम एता, ताह वोंदिन केया, “खेरीच तु बोगवानान सोरो हे।”

³⁴ओवता ता देरीयाह पार केरीन गन्नेसरत गावा माय पोचना,

³⁵तावाला माणहे ताह चालोस ओलखी लेदा। एने आहने पाहने आखा देसा माय खोबेर लेन मोकल्या, एने आखा दुखाऱ्या माणहाह ता फाय लावा।

³⁶एने ताह विन्ता केरने बाज गीया काय दुखाऱ्याह तान फाड़काह सापेलने देय; एने जोला बी माणहे तान फाड़काह सापेलताला, ता आखा हुदेर गीया।