1मी ज्य ठाण लियेल ईतो काय पुशो मी तुमूह नाराज केरने नाय आवो।
2काहाकाय मी केदी तुमूह नाराज केरू ते माहु खुसी आपणार कुण एय, तोस जाह मी नाराज किरेल।
3एने मी ज्यी वात तुमूह ज्यानकेरता लिखेल काय ओहलो नाय एय काय मार आवणे रेन, जाह रेन माहु खुसी जुड़ने जुवे मी ताह रेन नाराज एय; काहाकाय माहु तुमू आखा पोर बुरहो हे, काय जी मारी खुसी हे, तीस तुमू आखान बी हे।
4मोटली तेकलीत एने मोनान केस्टा माय रेन मी जुलूम आहवा गाल गालीन तुमूह लिखेल ईतो। ज्यानकेरता नाह काय नाराज ईहो, पुण ज्यानकेरता काय तुमू ता मोटला मोंगाह जाण लेय, जो माहु तुमू हेऱ्यो हे।
5केदी कुण बी नाराज किरेल हे, ते माहु ओलोस नाह, पुण केदी वोड़ावीन केय ताहार थोड़ोक थोड़ोक तुमू आखाह बी नाराज किरेल हे।
6ओहला माणहान केरता जो डेंड जा बायह्या माय रेन जुलूम जाणे ताह आपेल हेते, तो जुलूम हे।
7तानकेरता ज्यो हाजो हे काय तुमू तान गुनाह माफ किरो, एने ताह दिलासो आपु, ओहलो नाय एणे जुवे काय ओहलो माणुह दुखा माय बुड़ जाय।
8तानकेरता मी तुमूह विन्ता केरथु काय तुमरो मोंग ताह देखाड़ो।
9काहाकाय मी तुमूह ज्य जाणनेन केरता लिखेल ईतो। काय तुमू मारी आखी वातुह मानेन केरता तियार हेते काय नाह।
10केदी तुमू कुणीह बी कायतान बी बाराम माफ केऱ्या एती, ते मी बी तुमूह माफ केरथु। काहाकाय मी तुमरी केरता मसीन सामने माफ केरथु,
11काय सैतान तुमू पोर आदिकार नाय केरी, काहाकाय तुमू तान विचाराह रेन एंजाणल्या नाह सोता।
12जेवी मी मसी यीशुन हाजाली खुबेर होमलाड़नेन त्रोआस हेयरा माय आवो, एने मालीक मार कामाह पुरो केरनेन केरता एक बायणो उगाड़ दिनो,
13ते मार मोना माय आराम नाह जुड़नो, ज्यानकेरता काय मी मार बायाख तीतुसाह नाह मिलानो; तानकेरता मी ताह रेन मकादुनियाम जात रिनो।
14पुण बोगवानान दन्यवाद एय जो मसी माय कायेम जिकने तिवाराम ली फिरेह, एने मसीन एकलीन हाजाली गेंद आमरे द्वारे आखी जागे पोसरावेह।
15काहाकाय आमु बोगवानान आहने सुटकारो होदणाराह एने खेतेम एणाराह दुयून केरता मसीन हाजाली गेंद हेते।
16जा खेतेम एण्या हेते तान केरता मोतीन गेंद, एने जा जीवण्या हेते तान केरता जीवणान हाजाली गेंद। हाजो ज्यी वातुन बाराबोर कुण हे?
17काहाकाय आमु ता माणहान गेत नाह सोता, जा बोगवानान वचनाह सोतान फायदान केरता वापेर केरतेह, एने बोगवानान आमुह मोकलायेल हे। एने आमु मोनान खेराय माय बोगवानाह आहने जाणीन मसीन पावोरान गेत बोलतेह।