1 तीमुथीयुस 5

¹काल्ला बी डावाला माणहाह दोपकावीन मा बुलहो, पुण ताह आबोख जाणीन सोमजाड़ दे, एने जुवान्याह बाहख सोमजीन ता हिऱ्यो वेवार केर।

²डावाली बायकुह आहख जाणीन; एने जुवान बायकुह पुरो चोखो मोन केरीन बोणीख जाणीन सोमजाड़ दे।

³त्यु रांडायेल बायकुन मान मेल, ज्‍यु खेरीच रांडायेल हेत्यु।

⁴केदी एगदी रांडायेल बायकुन सोरा निहते नाते पोणत्या एती, ते आखान पेल ता तान गेराणा हेऱ्या बोक्‍तीन वेवारो केरती, एने तान आईख आबाख हुक आपणेन हिके, काहाकाय ज्यो बोगवानाह पुटीह।

⁵ज्यी खेरीच रांडायेल हे एने तीन कुणूस नाह सोतो, ती आपणी आसा बोगवाना पोर मेल मिलेह, एने ती रात ने दिह विन्ता एने विन्ता किरते रीथे।

⁶पुण ज्यी सेरीरान मोरजी पुरी केरने माय पोड़ गियीह, ती जीवताली ते हे पुण मुरेल बाराबोर हे।

⁷ज्यी वातुन बी उकुम आप काहाकाय ती निर्दोस रेय।

⁸एने खास केरीन तान गेराणान माणहान कालजी नाह किरेत, ताहार तो बोरहाम रेन बोटकी जायेल हे, एने अविश्वासी माणहाह रेन बी होवटोह खाराब बोण जायेल हे।

⁹तीस रांडायेल बायकुन नाव लिखजे जी साठ वोरह्याह रेन कोम निहे एय, एने एकुच एदम्यान लाडी रेनी एय।5:9 एक वारीन वाराड़ किरेल; नाहते तीन एदम्या हेऱ्यी ईमानदार।

¹⁰एने हाजाला कामान केरता नाव गाजेल एय, एने जी सोरान पोहणो केरेय; पावणाय केरेय, चोखाला माणहान पाय दुयेल एय, एने दुखाऱ्या माणहान सेवा चाकरी किरेल एय, एने आखा हाजा कामा माय मोन लागाड़ेल एय।

¹¹पुण जुवान रांडायेल बायकुन नाव मा लिखहे, काहाकाय ती पोशी वाराड़ केरने हुदेह एने सेरीरान मोरजी पुरी केरनेन केरता मसी रेन सेटी एय जाथे।

¹²एने गुनेगार ठेराथी, काहाकाय त्यु वायदो तोड़ देन्युह।

¹³ओवती ती गेर गेर फिरीन आलही एणेन हिकेह, एने आलही एणेन ओलीस नाह पुण बकबक केरती रीथे, एने दिहरान कामाम आथ टाकेह एने होबाय नाय ओहल्यु वातु किरेह।

¹⁴तान केरता मी ज्यो होद्थु काय जुवान रांडायेल बायकु वाराड़ केरी, एने गेरबार होमाली एने सोराह पायदा केरी, एने विरोद केरनाराह बदनाम केरने टेम नाय आपी।

¹⁵काहाकाय मोकत्युस बोटकीन सैतानान पासाण चाल दियेल हेत्यु।

¹⁶केदी बुरहो केरनार्‍यु बायकुन गेर रांडायेल बायकु एय ताहार, तीन मोदेक तीच केरी एने मोंडली पोर वोजो नाय बोणी, काहाकाय जी खेरीच रांडायेल हे तीन मोदेक मोंडली केर सेकी।

¹⁷जा डायडाया तान आदिकार हास केरीन चालाड़तेह, ताह दुय गुणा मोंजरी जुड़ने जुवे, एने खास केरीन ता जा वचन होमलाड़ ने एने हिकाड़नेन मेहनेत केरतेह।

¹⁸5:18 मत्ती 10:10; लुका 10:7काहाकाय चोखाली पुस्तेक किथे, “वेगेलताला बोयलान मुयाह मोहको मा बांदही,” काहाकाय “मोंजऱ्यो तान मोंजरीन हकदार हे।”

¹⁹दुय नाहते तीन गोवा रेती, तेवीच काल्ला बी डायडाया पोर गुनो लागाड़जे।

²⁰एने पाप केरनाराह आखा माणहान ओंगाण सोमजाड़ दे, काहाकाय दिहरा माणहे बिते एने पाप नाय केरती।

²¹बोगवान, मसी यीशु एने निवाड़ेल हेरोगदुताह आहने जाणीन मी तुवाह चेतावणी आपीन केथु काय तु मोन खोलीन ज्यी वातुह मान्या केर, एने बेदबाव माय काल्लो बी काम मा किरहे।

²²उतवाल्यो एन कुणी पोर बी आथ मा मिलहे, एने दिहरान पापाम बागी मा इही; आपणे आपाह चोखो बोणावीन मेल।

²³एवी रेन ओंगाण पाणी ओलोस पिय मा, पुण पेटान केरता एने जाहार ताहार एण्या दुखान केरता थोड़ोक अंगुरान रूह बी पिया केर।

²⁴थोड़ाक माणहान पापे ते उगड़ीन नियाव ने केरता पेलुच पोच जातेह, पुण थोड़ाक पासाण रेन जातेह।

²⁵तिहेस केरीन थोड़ाक हाजाला कामे उगाड़ला हेते, एने जा ओहला ना सोता, ता बी लीकाय नाह सेकते।