1एवी मुरतीन ओंगाण चेड़ायेल खाणान बाराम आपु जाणतेह काय आपु आखाह इकेल हे, मोठवाय पायदा केरने पुण मोंग केरीन वोड़ती ईथे।
2कुण सोमजी काय मी काह जाणथो, ते जोहलो जाणने जुवे तोहलो उंजु वोर जाणेत नाह।
3पुण केदी कुण बोगवानाह मोंग केरतेय, ते बोगवान ताह ओलखी लिथे।
4मुरतीन ओंगाण बोली चेड़ायेल वोस्तुह खाणेन बाराम आमु जाणतेह काय मुरती दुनिया माय काल्लीस वोस्तु नाह सोती, एने एकाह सोड़ीन उंजु काल्लोस बोगवान नाह सुतो।
5जुगा माय एने देरती पोर मोकतास देव केवाड़तेह, जीहे काय मोकतास देव एने मोकतास मालीक हेते।
6तीबी आमरी केरता ते एकुस बोगवान हे; मतलब आबोख जान उगे रेन आख्यु वोस्तु हेत्यु एने आमु तास ने केरता हेते, एने एकुस मालीक हे, मतलब यीशु मसी जान द्वारे आख्यु वोस्तु ईयेल हेत्यु, एने आमु बी तास ने द्वारे हेते।
7पुण सोबाह ज्यी इकेल नाह सोती, पुण काय तीबी एवी वोर मुरतीह काय तीबी सोमेजणे कारेण मुरतीन ओंगाण बोली चेड़ायेल वोस्तुह काय तीबी सोमजीन खातेह, एने तान मोन कोमजोर एणेन कारेण एठो एय जाथे।
8खाणान चिज आपुह बोगवानान आहने नाह पोचाड़ने केदी आपु नाय खाहु ते, आपणो काय दुको नाय एय एने केदी खाहु ते काय फायदो नाह सुतो।
9पुण हास केरीन, ओहलो नाय एय काय तुमरो ज्यो सुटकारो कोमजोर माणहान केरता ठोकरान कारेण एय जाय।
10काहाकाय केदी कुण तुवाह एकलीदाराह मुरतीन मोंदिर माय खाणो खातालो देखी एने तो मोनान कोमजोर माणुह एय ते, काय तान मोनाह मुरतीन ओंगाण बोली चेड़ायेल चिज खाणेन मोन नाय एय जाय।
11इहकेरीन तार एकलीन वोजेसे तो कोमजोर बाहख जान केरता मसी मुरेल, खेतेम एय जाय।
12इहकेरीन बाहख ने विरोद पाप केरने एने तान कोमजोर मोनान जेखेम पोचाड़ीन तुमू मसीन विरोद पाप केरतेह।
13तानकेरता केदी खाणो मार बायाख ठोकरा खावाड़ी ते, मी केदी बी काल्ली रिती माय माह नाय खाव, ओहलो नाय एय काय मी मार बायाख ने केरता ठोकरान कारेण बोणु।