2 ፆኦሲ ዓሶ ሃይሶ 17

¹ዒዮሳፒፄ ዓዶ፥ ዓኣሳ ቤዛ ጌሊ ካኣታዼኔ፤ ዬካፓ ዒስራዔኤሌ ዓሶ ዖላኒ ዎልቄ ዴንቄኔ፤

²ዙላ ኬልቂ ዲርቂንቴ ዪሁዳ ካታሞና ዙላ ዙላ ዓኣ ቤዛ ቢያ፥ ዬያጉዲ ሃሣ ዒዛኮ ዓዴ ካኣቲ ዓኣሳ ዖሎና ባሺ ዓርቄ ዔፕሬኤሜ ዓጫ ዓኣ ካታማኣ ዓቱዋንቴ ፖኦሊሴ ዴይሤኔ፤

³ዒዮሳፒፄ ዒዛኮ ዓዴ ፔ ካኣቱሞ ዎዶኮ ዓይፆይዳ ማዼ ጎይፆ ዳውቴ ማዼ ኮዦ ማዾ ማዼሢሮ ሃሣ ባዓኣሌ ጌይንታ ሜሌ ፆኦዞ ካኣሽኪባኣሢሮ ናንጊና ናንጋ ጎዳ ዒዛ ዓንጄኔ፤

⁴ዒዮሳፒፄ ፔ ዓዶ ፆኦዛሢም ማዼኔ፤ ዓይሢፆዋ ካፔኔ፤ ዒስራዔኤሌ ካኣታ ማዼ ጎይፆ ፑርቶ ማዾ ፔቴታዖ ማዺባኣሴ፤

⁵ዬያሮ ናንጊና ናንጋ ጎዳ ዒዮሳፒፄኮ ካኣቱማ ዶዳንዳጉዲ ማሄኔ፤ ዪሁዳ ዴራ ቢያ ዱማ ዱማ ዒዛም ዒንጎ ባኣዚ ዔኪ ሙካሢሮ ዒዚ ኮሺ ዖርጎጪ ቦንቺንታያ ማዔኔ፤

⁶ዒዚ ናንጊና ናንጋ ጎዳም ጎኔ ዒናፓ ማዼኔ፤ ዬያ ሌሊቱዋንቴ ጌሜራ ጌሜራ ዓኣ ሜሌ ዓሳ ካኣሽካ ቤዞና ዪሁዳይዳ ዓኣ ዓሼራ ጌይንታ ላኣሎ ፆኦዜሎ ማላቶ ቢያ ባይዜኔ።

⁷ዒዮሳፒፄ ካኣታዼንቴ ሃይሣሳ ሌዖና፦ ቤንሃይሌ፥ ዖብዲዩ፥ ዛካሪያሴ፥ ናትናዔኤሌና ሚኪያሴ ጌይንታ ዒዛኮ ዶንዞ ማዔ ቢታንታ ዓኣ ዓሳ ዪሁዳ ካታሞ ዓሶ ዔርዛንዳጉዲ ዳኬኔ።

⁸ዬንሢና ዎላ ታዞጳ ሌዊ ዓሲና ላምዖ ቄኤሴስኬንሢያ ዓኣኔ፤ ሌዊ ዓሳ፦ ሼማዒያ፥ ኔታኒያ፥ ዜባዲያ፥ ዓሳሄሌ፥ ሼሚራሞቴ፥ ዪሆናታኔ፥ ዖዶኒያ፥ ፆቢያንታ ፆባዶኒያንታ ማዓዛ ቄኤሶንሢ ዔልሻማዔና ዪሆራሜናኬ፤

⁹ዔያታ ናንጊና ናንጋ ጎዳኮ ዎጎ ማፃኣፖ ዓርቂ፥ ዪሁዳ ካታሞ ቢያ ዴንዲ ዴንዲ ዴሮ ቢያ ዔርዜኔ።

¹⁰ዪሁዳ ዓጮኮ ኮይላ ኮይላ ዓኣ ዓጮ ካኣታ ዒዮሳፒፄ ዖሉዋጉዲ ናንጊና ናንጋ ጎዳ ዔያቶይዳ ዒጊቹሞ ጌልዜኔ፤

¹¹ፒሊስፄኤሜ ዓሶይዳፓ ፔቴ ፔቴሢ ሚርጌ ቢራና ሜሌ ዒንጊሢያ ካኣቲ ዒዮሳፒፄም ዒንጋዛ ፔቴ ፔቴ ዓሬቦ ዓሳ ጊንሣ ላንካይ ሺያና ላንካይ ፄኤታ ዓዴ ማራይ፥ ሃሣ ላንካይ ሺያና ላንካይ ፄኤታ ኮላይ ዔኪ ሙኬኔ።

¹²ዪሁዳ ፃጳፓ ኬሶና ፖኦሊሶኮ ዓይሣሢ ዓዲና ጌይንታሢኬ፤ ዒዛኮ ዴማ ሃይሦ ፄኤታ ሺያ ፖኦሊሴ ዓኣኔ፤

¹³ዒዛ ሄሊሳዖ ላምዓሳ ዴማሢ ዬሆሃናኔ ጌይንታሢኬ፤ ዒዛኮ ዴማ ላምዖ ፄኤታና ሳሊታሚ ሺያ ፖኦሊሴ ዓኣኔ፤

¹⁴ዬሆሃናኔ ሄሊሳዖ ሃይሣሳ ዴማሢ ማዒ ዖሎ ዓሶ ዓይሣሢ ዚኪሪ ናኣዚ ዓማስያኬ፤ ዒዛኮ ዴማ ላምዖ ፄኤታ ሺያ ፖኦሊሴ ዓኣኔ፤ ዒዚ ፔኤሮ ናሽኪ ናንጊና ናንጋ ጎዳ ማዾም ፔና ዱማሴ ዖልዚ ሱኡጌኬ፤

¹⁵ቢኢኒያሜ ፃጳፓ ኬስኬ ፖኦሊሶ ዓይሣ ሱኡጋሢ ዔሊያዳዔ ጌይንታያ ዒዛና ቤቃ ዓሲባኣ ዔርቴ ፖኦሊሴኬ፤ ዒዛኮ ዴማ ጊቲማና ሂኢሺና ዓርቄ ላምዖ ፄኤታ ሺያ ፖኦሊሴ ዓኣኔ፤

¹⁶ዒዛ ሄሊሳዖ ዒዛኮ ዴማ ላምዓሳያ ማዓሢ ዬሆዛባዴ ጌይንታ ዖሎ ዓሶ ዓይሣሢኬ፤ ዒዛ ዴማ ዖልዚም ጊኢጌያ ፔቴ ፄኤታና ሳሊታሚ ሺያ ፖኦሊሴ ዓኣኔ፤

¹⁷ዬንሢ ፖኦሊሳ ቢያ ካኣቲ ዒዮሳፒፄም ዬሩሳላሜይዳ ማዻያ ማዓዛ፥ ካኣቲ ቃሲ ሃሣ ሜሌ ዙላ ኬልቂ ዲርቂንቴ ካታማይዳ ዱማ ፖኦሊሴያኣ ጌሤኔ።