2 ፆኦሲ ዓሶ ሃይሶ 16

¹ዓኣሳ ዪሁዳይዳ ካኣታዼንቴ ሃይሢታሚ ላሃሳ ሌዖና፥ ዒስራዔኤሌ ካኣቲ ባዕሻ ዪሁዳ ዖላኒ ኬስኪ ዪሁዳ ባንሢ ዖኦኒያ ጌሉዋጉዲና ኬስኩዋጉዲ ማሃኒ ራኣማይዳ ዋርዲሢ ዓርቄኔ፤

²ዬያሮ ዓኣሳ ጌኤዦ ማኣሮና ካኣቱሞ ማኣሮናኮ ሜሆ ጌሦ ማኣራፓ ቢሮ ዓንጎና ዎርቆና ኬሲ ዴማስቆይዳ ናንጋ ሶኦሪያ ካኣቲ ቤንሃዳዴም ዒንጋንዳጉዲ ዳኬኔ፤ ዬያ ዒንጎም ዳኮና ባኮና ዎላ ሂዚ ጋዓ ኪኢታኣ ዓኣኔ፦

³«ኔ ዓዶና ታ ዓዶና ማዼ ጎይፆ ኑ ዎላ ፑርቲንዱዋኣሢ ጫኣቆም፤ ሃያ ቢሮ ዓንጎና ዎርቆና ታ ኔኤም ዳኬሢ ኔኤም ዒንጎም ጌይኬ፤ ዬያሮ ዒስራዔኤሌ ካኣቲ ባዕሻ ፔኤኮ ፖኦሊሶ ታ ዓጫፓ ኬሳንዳጉዲ ኔ ታና ማኣዳኒ ሚና ቤርታ ኔ ዒዛና ዎላ ጫኣቄ ጫኣቁሞ ሃሻንዳጉዲ ታ ኔና ሺኢቃኔ።»

⁴ካኣቲ ቤንሃዳዴ ዓኣሳ ዒዛ ዖኦጬ ማሊፆ ኮሺኬ ጌይ ዔካዖ ዖሎ ዓሶ ዓይሣዞንሢና ዖሎ ዓሶና ዳኪ ዒስራዔኤሌ ካታሞ ዖሊሴኔ፤ ዬያሮ ዖሎ ዓሳ፦ ዒዮኔ፥ ዳኣኔንታ ዓቤልቤትማዕካ ጌይንታ ካታሞንሢና ኒፕታኣሌኤሜ ዓጮይዳ ጋሎንታ ዖሎ ዓንጋሞዋ ጌሦ ካታሞ ቢያ ዖሊ ባሺ ዓርቄኔ፤

⁵ካኣቲ ባዕሻ ዬያ ዋይዛዖ ራኣማይዳ ዋርዲዮ ኮሺፆ ዓርቄሢ ሃሼኔ፤

⁶ዬካፓ ካኣቲ ዓኣሳ ዓሶ ዪሁዳይዳፓ ቢያ ቡኩሲ፥ ካኣቲ ባዕሻ ራኣማይዳ ዋርዳኒ ጊኢጊሼ ሹጮንታ ሚፆንታ ቢያ ዒኢካፓ ዔኪ ሙካንዳጉዲ ዓይሤኔ፤ ዬያሮ ዓሳ ሹጮና ሚፆና ቢያ ራኣማይዳፓ ዔኪ ሙኪ ጌባዕኔና ሚፂጳ ካታሞናኮ ዙሎ ዋርዴኔ።

⁷ዒማና ፆኦሲ ማሊፆ ኬኤዛ ሃናኒ ካኣቲ ዓኣሳ ኮይላ ሙካዖ፦ «ናንጊና ናንጋ ጎዳ ማዔ ኔ ፆኦዛሢና ጉሙርቂንቲፆ ሃሺ ሶኦሪያ ካኣቲ ኔ ጉሙርቄሢሮ ዒስራዔኤሌኮ ዖሎ ዓሳ ኔ ኩጫፓ ቶሌኔ፤

⁸ዒቶጲያና ሊቢያ ዓሶናኮ ሚርጌ ዖላ ዓሲንታ ሳርጌላ ዖይታንታ ፓሮና ዖላ ዓሲንታ ባኣዓዳ? ዒማና ኔኤኒ ፆኦሲ ጉሙርቄሢሮ ዖሎና ኔ ባሻንዳጉዲ ፆኦሲ ኔና ማኣዴኔ።

⁹ናንጊና ናንጋ ጎዳ ዓጮ ጉቤ ኮሺ ዛጋዖ ጉቤ ዒኔና ዒዛ ጉሙርቃዞንሢም ቢያ ዶዱሞ ዒንጋኔ፤ ዓካሪ ኔኤኒ ዔኤያቶ ማዾ ማዼሢሮ ሃካፓ ሴካ ዖልዚ ኔኤፓ ሺኢካዓኬ» ጌዔኔ፤

¹⁰ዬይ ጌኤዛ ዓኣሳ ኮሺ ዻጋሴሢሮ ፆኦሲ ማሊፆ ኬኤዛሢ ካኒ ቢራታና ቱኪ ቱኡሲ ማኣሪ ጌልዜኔ፤ ዬማ ኬላፓ ዓርቃዖ ካኣቲ ዓኣሳ ዴሮ ባኣካፓ ፔቴ ፔቴ ዓሶ ሚጪንቱዋዖ ሜታሲሢ ዓርቄኔ።

¹¹ዓኣሳ ካኣታዼሢዳፓ ዴንዲ ጋፖ ሄላንዳኣና ማዺንቴ ባካ ቢያ ዪሁዳና ዒስራዔኤሌ ካኣቶ ሃይሶ ማፃኣፖይዳ ፃኣፒንቲ ዓኣኔ፤

¹²ካኣቲ ዓኣሳ ካኣታዼንቴ ሃይሢታሚ ታዞጳሶ ሌዖና ቶኪ ዒዛኮ ኮሺ ሃርጌኔ፤ ዬያይዲ ሃርጊንታዖ ዼኤሻ ዔራ ዓሶይዳፓዓቴም ፆኦሲ ዒዛ ማኣዳንዳጉዲ ዒ ኮዒባኣሴ፤

¹³ዓኣሳ ካኣታዼዖ ዖይዲታሚ ፔታሳ ሌዖና ሃይቄኔ።

¹⁴ዒማና ሌዛ ዒዛኮ ዱማ ሳውቃ ቲሺንታ ዼኤሻናኣ ቲሽኪንቲ ዒዚ ቤርታ ፔኤሮ ዳውቴ ካታማ ላሌ ዓርሲ ኮሼ ዱኡፒ ዔቴይዳ ዱኡቴኔ፤ ዒዛ ቦንቾሮ ዓሳ ሚርጌ ሃንፂሌ ኩሊ ታሚ ዔኤሢ ዼኤፒ ዬኤፒ ዬኤኬኔ።