1“Goe e mee di hudi di manu dragon go ‘Leviathan’ gi di maadau,
2Goe e mee di daalo dau loahi laa lodo di uhi o maa,
3Mee gaa dangi adu bolo goe gi diiagi ia gii hana?
4Mee gaa hai adu dana hagababa, ga hagamodu
5Goe gaa nnoo a mee gadoo be di manu mamaangi haga gaidala,
6Digau hai waga daha le e hiihai e hui a mee?
7Goe e mee di daalo di baahi o maa gi nia daalo puu iga,
8Goe ma gaa bili gi mee hagadahi, nomuli gei goe ga langahia dana heebagi,
9Tangada dela ga gidee ia di manu damanaiee deelaa
10Di manu damanaiee deelaa ma ga ala aga, ga llamu dauwa,
11Ma koai e mee di heebagi gi mee gei hagalee halauwa?
12Au ga hagi adu gi di goe di maaloo o nia wae
13Deai tangada e mee di haahi gi daha dono gahu laa daha ai,
14Ma koai dela e mee di huge di ngudu o maa,
15Dono dua ne hai gi nia goolongo abaaba duuli,
16Nia maa e hagapigi e kadi huoloo gi di gowaa e dahi,
17E pigi gi di gowaa e dahi e mau dangihi,
18Di ila e daba i di madagoaa mee ga tiaa,
19Di ulaula e puu mai i lodo dono ngudu,
20Nia huiahi e loloomoi i dono uhi,
21Dono dogi e daamada dana ahi ulaula.
22Dono uwa e maaloo dangihi,
23Deai di mee i dono gili e maluu ai,
24Dono manawa hamaaloo la hagalee dono madagu ai,
25Mee ga manawa aga gei digau ala koia e maaloo hogi
26Deai tulumanu dauwa e mee di haga mohole dono gili ai.
27Ang gi mee, di baalanga le e hai hua be di laagau maluu,
28Di amu maalei e hai a mee gii lele ai.
29Di laagau daaligi dangada le e hai labelaa be nia geinga,
30Nia ganauna ala i hongo dono dinae
31Mee e hai di tai gii hai gadoo be nia wai ala e dunu,
32Di hana o maa guu hai di ala dingidingia i ono muli,
33Ma di mee e hagatau gi mee i henuailala ai.
34Mee e de hei eia nia manu ala e hagamuamua.