1Makabila ga Lubeni na Gadi gakala na fugo nyingi. Avo viwone isi ya Yazeli na Gileadi zofaya kwa fugo zao,
2wamcholela Musa na Eleazali na ivilongozi wose wa umting'hano wawalongela,
3“Mabuga ga Ataloti na Diboni na Yazeli na Nimla na Heshiboni na Eleale na Sebamu na Nebo na Beoni,
4isi ayo yose Mndewa Imulungu kaihuma mbuli ya Waizilaeli, isi ayo inoga kwa fugo, na siye tuna fugo nyingi,
5avo kamba mweye munogelwa towapula mutugwelele isi ayo iwe yetu, sikutuloke umwambu wa lwanda lwa Yolidani.”
6Musa kawedika awo iwanhu wa makabila ga Gadi na Lubeni, “Molonda kusigala hano akuno ndugu zenu Waizilaeli ochola kuna ing'hondo?
7Habali mowadonheza Waizilaeli sikuwachole mwiisi iyawalongele Mndewa Imulungu kowagwelela?
8Wahenga zenu watenda vivo viniwatumile kulawa Kadeshi Balinea wakaisungulile isi ayo.
9Hewo wachola mbaka kubonde da Eshikoli, wayona isi ayo lakini viwabwelile wawadonheza Waizilaeli ili sikuwengile mwiisi iyalongile Mndewa Imulungu kowagwaa.
10Mndewa Imulungu kagevuzika ng'hani siku dijo na kaiduwila kalonga,
11‘Kuduhu hata munhu yoyose mna iwanhu walawile Misili yeli na miyaka malongo mabili na kugendelela, yonda yayone isi inilongile nowagwaa Abulahamu na Isaka na Yakobo, kwavija hawanikweleleze kwa mizoyo yao yose.’
12Wose honda wayone isi ayo ila Kalebu mwanage Yefune kulawa lukolo lwa Wakenizi na Yoshua mwanage Nuni, kwavija wao wanikweleleza kwa mizoyo yao yose.
13Mndewa Imulungu kawagevuzikila Waizilaeli kawatenda tanga nzulule kuluwala kwa miyaka malongo mane mbaka ulelo wose wa awo watendile gehile wafa.
14Sambi mweye ulelo wa wene nzambi, muzuka hanhu ha iwahenga zenu, na molonda kwengeza kugevuzika kwa Mndewa Imulungu kwa Waizilaeli.
15Kamba mweye mwahalema kumkweleleza, heyo kowaleka kabili kuluwala na mweye mowatenda wanhu wose wano wakomigwe.”
16Avo wamcholela Musa wamulongela, “Tutogolele tuwazengele ng'hondolo zetu mabumba, na tuwazengele mabuga wanetu hano.
17Lakini siye wenyego toitanda kuchola kuna ing'hondo hamoja na ndugu zetu Waizilaeli, na tolongola mbaka tuwavikize hanhu honda wakale. Kipindi acho wanetu okala mna gamabuga gazunguluswe ili sikuwavamiligwe na iwenekae wa isi ino.
18Siye hatubwela ukae mbaka Waizilaeli wose vonda wagweleligwe hanhu hao kamba uhazi wao.
19Honda tuhazi kinhu chochose ako umwambu wa lwanda lwa Yolidani, kwavija siye tupata uhazi wetu mwambu uno wa kudilawila zuwa wa Yolidani.”
20Avo Musa kawalongela, “Kamba kweli motenda kamba vimulongile, avo baha kuulongozi wa Mndewa Imulungu, muitande kuchola kuna ing'hondo.
21Kila mkalizi wenu yaloke lwanda lwa Yolidani na kuno molongozwa na Mndewa Imulungu, mowavamila iwanhu owehila mbaka Mndewa Imulungu vonda yawatende wahumwe,
22na moisola isi ayo. Mwahatenda gago mobwela kwavija mokuwa musang'hana gaja golondigwa na Mndewa Imulungu kwa ndugu zenu Waizilaeli. Abaho Mndewa Imulungu kowatogolela muisole isi ino ya umwambu wa kudilawila zuwa wa Yolidani.
23Lakini kamba hamgavikiza gago gamulongile, mokuwa mumtendela Mndewa Imulungu nzambi, na mujuwe kamba mokobozwa.
24Avo wazengeleni wanenu mabuga na wazengeleni ng'hondolo zenu mabumba, lakini mutende kamba vimulongile!”
25Abaho wanhu wa makabila ga Gadi na Lubeni wamulongela Musa, “Siye wasang'hanaji wako tosang'hana kamba Mndewa Imulungu viyatulagize.
26Wehe zetu na wanetu na ng'hondolo na ng'ombe osigala hano mwiisi ya Gileadi.
27Lakini siye wasang'hanaji wako tuitanda kuchola kuna ing'hondo kuno tolongozwa na Mndewa Imulungu. Toloka ulwanda lwa Yolidani na kuitowa na hewo kamba viulongile.”
28Abaho Musa kalava malagizo gano kwa imulava nhosa Eleazali na Yoshua mwanage Nuni, na ivilongozi wa ng'holo za makabila ga Waizilaeli.
29“Kamba wanhu wa makabila ga Gadi na Lubeni wahaloka lwanda lwa Yolidani hamoja na mweye kuno wapapa migoha yao na kuno molongozwa na Mndewa Imulungu, mwahawatowa iwanhu awo na kuisola isi ayo, avo muwagwelele isi ya Gileadi iwe yao.
30Lakini kamba hawaloka hamoja na mweye na migoha yao, avo osola hanhu ha isi ya Kanaani hamoja na mweye.”
31Iwanhu wa makabila ga Gadi na Lubeni wedika, “Go, mkulu, siye wasang'hanaji wako totenda kamba Mndewa Imulungu viyatulongele.
32Kwa kulongozwa na Mndewa Imulungu, toloka na migoha yetu mbaka mwiisi ya Kanaani, lakini isi itugweleligwe hano hana umwambu wa kudilawila zuwa wa Yolidani yokuwa yetu.”
33Avo Musa kawagwelela, iwanhu wa makabila ga Gadi na Lubeni na nusu ya iwanhu wa kabila da Manase mwanage Yusufu, isi yose ya mndewa Sihoni wa Waamoli na isi yose ya mndewa Ogu wa Bashani, mabuga gake na isi zizunguluke gamabuga.
34Wanhu wa kabila da Gadi wagazenga kabili mabuga ga Diboni na Ataloti na Aloeli,
35na Atiloti Shofani na Yazeli na Yogibeha,
36na Beti Nimula na Beti Halani, mabuga gago gazunguluswa senyenge na wazenga mabumba ga ng'hondolo.
37Iwanhu wa kabila da Lubeni wagazenga kabili mabuga ga Heshiboni na Eleale na Kiliataimu,
38na Nebo na Baali Meoni na Sibima. Matwaga gamabuga gago wagahindula, wagazenga kabili na wagagwaa matwaga gayagwe.
39Iwanhu wa ulelo wa Makili mwanage Manase, waivamila isi ya Gileadi waisola isi ayo na wawawinga Waamoli wakalile okala mumo.
40Avo Musa kawagwelela iwanhu wa ulelo wa Makili mwanage Manase, isi ayo ya Gileadi na hewo wakala mumo.
41Yaili munhu wa kabila da Manase kavivamila vijiji va isi ya Gileadi na kavisola, kavigwaa twaga da Hawoti Yaili.32:41 Kwa Kiebulania Hawoti Yaili fambulo jake vijiji va Yaili.
42Na heyo Noba kadivamila na kadisola buga da Kenati na ivijiji vake, kadikema Noba, twaga jake mwenyego.