1Mndewa Imulungu kamulongela Musa,
2“Uwabwezele Wamidiani kwa gaja gawawatendele Waizilaeli, wahamambukiza kutenda vivo gweye kofa.”
3Avo Musa kawalongela iwanhu, “Watandeni wakalizi wachole wakawavamile Wamidiani na kuwabwezela gehile mbuli ya Mndewa Imulungu.
4Kulawa kila kabila da Izilaeli, musagule wakalizi wa ng'hondo elufu imoja.”
5Avo wanhu elufu imoja wasaguligwa kulawa kila kabila da Waizilaeli, wose kwa wose wakala wambigalo elufu kumi na mbili waitandile kwa ng'hondo.
6Musa kawagala wanhu awo kuna ing'hondo, kilongozi wao kakala Finehasi mwanage imulava nhosa Eleazali akuno kavipapa viya va hanhu hong'ala na zimhalati za kutowa ili kulava kilaguso cha ng'hondo.
7Waivamila isi ya Wamidiani kamba Mndewa Imulungu viyamulagize Musa, wawakoma wambigalo wose.
8Mna iwanhu awo wakomigwe kukala na wandewa watano wa isi ya Midiani, wakala Evi na Lekemu na Suli na Huli na Leba. Vivija wamkoma Balaamu mwanage Beoli.
9Waizilaeli wavisola vinhu vao vose, vivija wasola watwanzi na iwana na ng'ombe na fugo zose ziyagwe.
10Gamabuga na ng'hambi zao wavisoma kwa moto.
11Wavisola ivinhu vose na iwanhu wawagogile na iwanyama,
12wamgalila Musa na Eleazali, na iwanhu wose wa Izilaeli wakalile wekile ng'hambi kudibawe da Moabu, behi na lwanda lwa Yolidani uilola na buga da Yeliko dikalile umwambu wa ulwanda.
13Avo Musa na Eleazali na ivilongozi wose wa umting'hano wa Waizilaeli wachola kunze ya ing'hambi kuwabokela awo iwakalizi.
14Musa kawagevuzikila iwakulu wa wakalizi wose, iwakulu wa wakalizi elufu imoja na iwakulu wa wakalizi gana, wabwelile kulawa kuna ing'hondo.
15Musa kawauza, “Habali muwaleka watwanzi wose wano wawe wagima?
16Kumbukeni kamba, iwatwanzi awo wakweleleza lagizo da Balaamu, na watenda Waizilaeli wamtendele Mndewa Imulungu nzambi ako Peoli mbaka mitamu iwezila iwanhu wa Mndewa Imulungu.
17Avo wakomeni wana wose wa kimbigalo na kila mndele yawasile na mbigalo.
18Lakini sikumuwakome wandele wose waja hawanawasa na wambigalo, walekeni wagima mbuli yenu wenyego.
19Iwanhu wose hagati yenu wakomile wanhu hebu kukwasa maiti olondigwa wakale kunze ya ing'hambi kwa siku saba, muisunhe mweye na iwanhu muwagogile kudisiku da kadatu na siku da isaba.
20Vivija mkisunhe kila kiwalo, na kila kinhu kitendigwe kwa ng'hwembe, kila kinhu kitendigwe kwa mibahila ya mbuzi hebu mibiki.”
21Mulava nhosa Eleazali kawalongela iwambigalo wose wabwelile kulawa kuna ing'hondo, “Gano gago malagizo gayagweleligwe Musa na Mndewa Imulungu.
22Zahabu na shaba na shaba ya kiguzi na chuma na bati na lisasi,
23na vose viyagwe vibitaga muumoto, vibitizwe muumoto ili kuvitenda ving'hale, na vivija volondigwa vitendigwe ving'ale kwa gaja gamazi ga kusegesa gehile. Vinhu vose viyagwe havidahaga kukala muumoto avo vitendigwe ving'ale kwa gago gamazi ga kusegesa gehile.
24Siku ya saba muvifue viwalo venu na mweye mokuwa mong'ala na modaha kwingila mwiing'hambi.”
25Mndewa Imulungu kamulongela Musa,
26“Gweye na Eleazali imulava nhosa hamoja na vilongozi wa ng'holo za makabila ga Waizilaeli vipeteni ivinhu vose na iwanhu na iwanyama visoligwe kuna ing'ondo.
27Vigoleni vinhu avo mna gamafungu mabili, fungu dimoja dokuwa da iwakalizi wacholile kuna ing'hondo na diyagwe dokuwa da iwanhu wose wayagwe wa Izilaeli.
28Abaho kulawa mdifungu da iwakalizi wacholile kuna ing'hondo, usole kinhu kimoja kulawa mna kila vinhu magana matano, iwe wanhu, ng'ombe, vihongwe, ng'hondolo hebu mbuzi.
29Vinhu avo umgwelele imulava nhosa Eleazali kamba sadaka kwa Mndewa Imulungu.
30Kulawa mdifungu da iwanhu wose, lava kinhu kimoja kwa kila vinhu malongo matano, iwe wanhu, ng'ombe, vihongwe, ng'hondolo hebu mbuzi. Vinhu avo uwagwee Walawi awo osang'hana mna dihema da Mndewa Imulungu.”
31Musa na imulava nhosa Eleazali watenda kamba Mndewa Imulungu viyamulagize Musa.
32Ivinhu viwasolile awo iwakalizi ako kuna ing'hondo vikala, ng'hondolo laki sita na elufu sabini na tano (675,000),
33ng'ombe elufu sabini na mbili (72,000),
34vihongwe elufu sitini na imoja (61,000),
35na wandele hawanawasa na wambigalo wakala elufu selasini na mbili (32,000).
36Nusu ya ivinhu avo wagweleligwa iwakalizi wacholile kuna ing'hondo, ng'hondolo laki ndatu na elufu selasini na saba na magana tano (337,500),
37mna iwang'hondolo awo walavigwe kwa Mndewa Imulungu wakala ng'hondolo magana sita na sabini na tano (675).
38Ng'ombe wa awo iwakalizi wakala elufu selasini na sita (36,000), na mna iwao iwang'ombe sabini na mbili walavigwa kwa Mndewa Imulungu kamba sadaka.
39Vihongwe wa awo iwakalizi wakala elufu selasini na magana tano (30,500), na mna iwao vihongwe sitini na imoja walavigwa kwa Mndewa Imulungu kamba sadaka.
40Iwanhu wakala elufu kumi na sita (16,000), na mna iwao wanhu selasini na mbili walavigwa kwa Mndewa Imulungu.
41Avo Musa kamgwelela vinhu avo Eleazali imulava nhosa kamba sadaka kwa Mndewa Imulungu, kamba Mndewa Imulungu viyamulagize Musa.
42Ija inusu iyagwe iwagweleligwe Waizilaeli, ayo iyaibagule Musa na ija inusu iwagweleligwe iwakalizi wacholile kuna ing'hondo,
43wakala ng'hondolo laki ndatu na elufu selasini na saba na magana tano (337,500),
44ng'ombe wakala elufu selasini na sita (36,000),
45vihongwe wakala elufu selasini na magana tano (30,500),
46wanhu wakala elufu kumi na sita (16,000).
47Kulawa mna inusu ayo iwagweleligwe Waizilaeli, Musa kalava mnyama imoja hebu munhu imoja kulawa kila bumbila da malongo matano, kamba Mndewa Imulungu viyamulagize, kawagwaa Walawi awo wasang'hane kuna dihema da Mndewa Imulungu.
48Abaho iwakulu wa iwakalizi elufu imoja na iwakulu wa wakalizi gana, wamcholela Musa,
49wamulongela, “Go mkulu, siye tuwapeta iwakalizi wose watukalile towalongoza na tona kamba haduhu hata munhu imoja yaswelile.
50Avo tugala viya va zahabu na vikuku na bangili na pete na heleni na ushanga kamba kila munhu viyapatile. Tuvigala ili tutendeligwe loholo kuulongozi wa Mndewa Imulungu.”
51Avo, Musa na Eleazali wavibokela vinhu avo vigeligwe ulembo kwa zahabu.
52Zahabu yose ilavigwe kwa Mndewa Imulungu ikala yovika kamba kilo magana mabili.
53Kila mkalizi hakalile kilongozi kasigala na vinhu vake mwenyego viyasolile ako kuna ing'hondo.
54Avo Musa na Eleazali imulava nhosa waibokela zahabu ayo kulawa mmakono ga awo iwakulu wa wakalizi, waigala mna dihema da mting'hano, ili iwe kinhu cha kukumbuka kwa Waizilaeli kuulongozi wa Mndewa Imulungu.