Kupetigwa 15

¹Mndewa Imulungu kamulongela Musa,

²“Walongele Waizilaeli vino ‘Vonda mwingile mwiisi iniwagwelela mukale,

³na mweye mogala nhosa yenu kuulongozi wangu niye Mndewa Imulungu kulawa mzifugo zenu, nhosa za kusoma moto hebu nhosa ziyagwe kwa kuvikiza gaja gaulongile hebu kwa kulonda wenyego hebu kwa nyimwilinyimwili zenu, nhosa azo zogala mnung'ho uninogeza niye Mndewa Imulungu.

⁴Avo munhu ayo yogala ng'hondolo hebu mbuzi kamba nhosa yake, vivija yamgalile Mndewa Imulungu nhosa ya ndiya, vibaba vibili va usage ulibule midundulu na utibwilizigwe na mavuta nyhupa imoja,

⁵hamoja na nyhupa imoja ya divai kamba nhosa ya king'waji. Vinhu avo vigaligwe hamoja na inhosa ya kusoma moto hebu zinhosa ziyagwe.

⁶“ ‘Kamba munhu kogala ng'hondolo mbigalo vivija yagale mhishi imoja ya usage ulibule midundulu na utibwilizigwe na mavuta nyhupa imoja na nusu kamba nhosa ya ndiya,

⁷hamoja na nyhupa imoja na nusu ya divai kamba nhosa ya king'waji, ili kutenda ininung'hile goya niye Mndewa Imulungu.

⁸“ ‘Kipindi vonda munigalile niye Mndewa Imulungu ng'ombe mbigalo mbuli ya nhosa ya kusoma moto hebu nhosa ziyagwe kwa kuvikiza gaja gaulongile hebu kwa kugala kuilumba,

⁹vivija mugale nhosa ya ndiya ya usage unogile mhishi imoja na vibaba vibili utibwilizigwe na mavuta nyhupa mbili,

¹⁰hamoja na divai nyhupa mbili kamba nhosa ya king'waji isomigwa kwa moto, ili kugala mnung'ho uninogeza niye Mndewa Imulungu.

¹¹“ ‘Avo vinhu avo vilavigwe hamoja na kila ng'ombe mbigalo, na ng'hondolo na mbuzi.

¹²Vinhu avo vongezigwe kwa kuigala na iwanyama onda walavigwe.

¹³Kila Mwiizilaeli yakweleleze malagizo gago kipindi viyolava nhosa ya kusoma moto, kamba mnung'ho uninogeza niye Mndewa Imulungu.

¹⁴Na kamba kuna munhu baki yokala hamoja na mweye kwa siku ndodo hebu siku nyingi, yahalonda kulava nhosa yake ya kusoma moto kamba mnung'ho uninogeza niye Mndewa Imulungu, munhu ayo yatende kamba mweye vimutenda.

¹⁵Muulelo wenu wose onda wize, malagizo gagaja gomukweleleza mweye gago gonda wakweleleze hewo na vivija munhu baki yoyose yokala hamoja na mweye. Mgameso ga Mndewa Imulungu mose mwa sawa,

¹⁶mweye na heyo molongozwa na malagizo gago.’ ”

¹⁷Mndewa Imulungu kamulongela Musa,

¹⁸“Walongele Waizilaeli, ‘Vonda mwingile mwiisi yonda niwagale,

¹⁹kila vonda muje ndiya ya isi ayo, molondigwa mwike kumgwazo hanhu ha ndiya na mundavile niye Mndewa Imulungu.

²⁰Mwahakoka magate, gate da ichanduso dilawile mna izindiya za ichanduso, dilavigwe kamba nhosa ilawile hanhu ha kubigila uhemba.

²¹Mundavile niye Mndewa Imulungu nhosa ayo ulelo wenu wose onda wize.

²²“ ‘Lakini kamba munhu bila kujuwa kaleka kugagoga malagizo gose ganiwagwelele niye Mndewa Imulungu kubitila Musa,

²³na kamba ako kumwande wanhu oleka kugakweleleza gaja gose niye Mndewa Imulungu ganimulongele Musa,

²⁴avo kamba kinhu acho kitendigwa bila kujuwa, bila Waizilaeli wose kujuwa, avo Waizilaeli wose wagale bofu dimoja da kimbigalo da ng'ombe mbuli ya nhosa ya kusoma moto, kamba mnung'ho uninogeza niye Mndewa Imulungu, hamoja na inhosa ya indiya na iking'waji kamba malagizo vigalonda. Vivija wanhu wagale mbuzi mbigalo imoja kamba nhosa ya kusegesa nzambi.

²⁵Mulava nhosa kowatendela loholo wanhu wose wa Izilaeli, na nzambi zao zogeligwa kumgongo kwavija watenda nzambi bila kujuwa, na wagala nhosa zao kwa Mndewa Imulungu, nhosa ya kusoma moto na nhosa ya kusegesa nzambi.

²⁶Avo Waizilaeli wose na iwanhu baki okala hamoja na hewo, nzambi zao zogeligwa kumgongo kwavija wose waitenda nzambi ayo bila kujuwa.

²⁷“ ‘Munhu yahatenda nzambi bila kujuwa, kolondigwa yagale mbuzi imoja mtwanzi yeli na mwaka umoja yawe nhosa ya kusegesa nzambi.

²⁸Mulava nhosa yamtendele loholo munhu ayo kuulongozi wa Mndewa Imulungu, na nzambi zake zogeligwa kumgongo.

²⁹Mokuwa na malagizo gagano kwa munhu yoyose yotenda nzambi bila kujuwa, yawe mwenekae hebu munhu baki yokala hamoja na mweye.

³⁰“ ‘Lakini munhu yoyose yotenda nzambi giladi, yawe mwenekae hebu munhu baki, ayo komuliga Mndewa Imulungu, avo kolondigwa yabaguligwa mna iwanhu zake.

³¹Kwavija kagalema gaja gayalongile Mndewa Imulungu na kabena malagizo gake. Munhu ayo yabaguligwe na nzambi yake yokuwa mdipala jake mwenyego.’ ”

³²Siku dimoja Waizilaeli viwakalile kuluwala, wamona munhu imoja kodondola ngodi kudisiku da kubwihila.

³³Avo, munhu ayo kagaligwa kuulongozi wa Musa na Haluni na mting'hano wose wa Izilaeli.

³⁴Avo wamgela mmakono, kwavija wakala hawajuwile munhu ayo yatendigwe choni.

³⁵Avo, Mndewa Imulungu kamulongela Musa, “Munhu ayo kolondigwa yakomigwe, umting'hano wose wa Izilaeli wamtowe mabwe kunze ya ing'hambi.”

³⁶Avo, wanhu wamulava kunze ya ing'hambi, wamtowa mabwe mbaka kafa, kamba Mndewa Imulungu viyamulagize Musa.

³⁷Abaho Mndewa Imulungu kamulongela Musa,

³⁸“Walongele wanhu wa Izilaeli, ‘Muisonele vikumbi mna izimhindo za viwalo venu, na mwike luzi lwa langi ya buluu uchanha ya kila kikumbi. Mutende vivo muulelo wenu wose onda wize.

³⁹Vikumbi avo vokuwa kinhu cha kukumbuka kumwenu. Kila mwahavona mogakumbuka malagizo gangu na kugakweleleza, ili sikumukweleleze gaja gomulonda na gaja gomukona kwa meso genu wenyego.

⁴⁰Vikumbi avo vowakumbusa malagizo gangu gose na mogagoga gose, na mweye mokala mung'alile kumwangu.

⁴¹Niye ayo Mndewa Imulungu, Imulungu wenu niwalavile mwiisi ya Misili ili niwe Imulungu wenu. Niye ayo Mndewa Imulungu, Imulungu wenu.’ ”