1Ikilo acho wanhu wose wa Izilaeli waiyalala na kulila.
2Wamuyalalila Musa na Haluni walonga, “Vinoga twahafile ako Misili! Vinoga twahafile baha kuluwala!
3Habali Mndewa Imulungu kotugala mwiisi ayo? Tokomigwa mwiing'hondo, wehe zetu na wanetu ogogigwa! Vinoga tubwele Misili.”
4Avo wasonga kuilongela, “Tusagule kilongozi, tubwele Misili!”
5Avo, Musa na Haluni wagwa kingubanguba kuulongozi wa iwanhu wose wa Izilaeli.
6Yoshua mwanage Nuni na Kalebu mwanage Yefune, awo wakalile mna iwanhu wacholile kuisungulila isi ayo, wadega viwalo vao kwa usungu,
7wawalongela wanhu wose wa Izilaeli, “Isi itucholile kuisungulila inoga ng'hani.
8Kamba Mndewa Imulungu kotunogela, kotugala kuko na kotugwaa isi ayo imemile maziwa na uki.
9Lakini sikummuleme Mndewa Imulungu, na sikumuwadumbe iwenekae wa isi ayo, kwavija hewo kamba wana wadodo kumwetu. Kiwotamanila kisegesigwa, lakini Mndewa Imulungu kahamoja na siye, sikumuwadumbe!”
10Lakini iwanhu wose walonda kuwatowa mabwe. Bahaja ukulu wa Mndewa Imulungu oneka uchanha ya dihema da mting'hano, kuulongozi wa iwanhu wose wa Izilaeli.
11Abaho Mndewa Imulungu kamulongela Musa, “Vino wanhu wano onibezeli mbaka lini? Mbaka lini ogendelela kuleka kunitamanila, hamoja nitenda vinhu vingi va unzonza hagati yao?
12Nowakoboza kwa mitamu, na nowafagila wose, lakini kulawa kumwako gweye, notenda wanhu wa isi iyagwe, weli na nguvu kubanza hewo!”
13Lakini Musa kamulongela Mndewa Imulungu, “Kuwalava wanhu wano mwiisi ya Misili kwa nguvu zako. Wamisili wahahulika kamba kuwatenda vivo wanhu zako,
14owalongela wanhu okala isi ino. Wanhu wano wahulika kamba gweye Mndewa Imulungu kwa hamoja na siye, kwavija gweye Mndewa Imulungu koneka kwa meso kipindi wingu jako dahemaga uchanha yetu, na gweye kutulongolelaga, imisi kwa mhanda ya wingu na ikilo kwa mhanda ya moto.
15Avo, kamba uhawakoma wanhu zako kwa mwanza umoja, wanhu wa isi ziyagwe zihulike nhogolwa zako olonga,
16‘Mndewa Imulungu kawakoma wanhu zake kuluwala kwavija kalemelwa kuwagala mwiisi iyaiduwile kowagwaa.’
17Avo, sambi nokupula Mndewa Imulungu, utulagusile udahi wako kwa kutenda kamba viutulongele,
18‘Niye Mndewa Imulungu sigevuzika himahima, nimema bazi na nogela kumgongo nzambi na gehile. Lakini sileka kuwakoboza wana na wazukulu mbaka ulelo wa kadatu na wa ikane kwa nzambi za iwahenga zao.’
19Nokupula ugele kumgongo nzambi za wanhu wano, kamba unogelwa wako viwili mkulu na kamba viuzigelaga kumgongo nzambi za wanhu wano toka walawe ako Misili mbaka sambi.”
20Mndewa Imulungu kamwidika, “Nizigela kumgongo nzambi zao kamba viupulile.
21Lakini nokulongela, kamba niye vinili mgima, na kamba isi yose viimemile ukulu wangu,
22haduhu hata munhu imoja mna iwao onile ukulu wangu na unzonza niutendile Misili na kuluwala abaho onigeza miyanza yose na olema kunitegeleza,
23koyona isi iniiduwile kwa wahenga zao kamba nowagwaa, vivija na iwanhu waja onibezeli niye honda wayone.
24Lakini kwavija msang'hanaji wangu Kalebu kavingine, na kanitegeleza goya, nomvikiza mwiisi ayo iyacholile kuisungulila, vivija ulelo wake oitawala.
25Kwavija Waamaleki na Wakanaani okala kugamabonde ga isi ayo, avo mayo mubwele kukisogo muchole kuluwala kuna inzila ilongoza bahali ya Shamu.”
26Abaho Mndewa Imulungu kamuuza Musa na Haluni,
27“Wanhu wano ogendelela kuniyalalila mbaka lini? Nidonha na kuiyalala kwa wanhu wa Izilaeli!
28Avo walongeleni, ‘Kamba vinili mgima nolonga niye Mndewa Imulungu, nowatendela gagaja gamhulike molonga.
29Mofa na ng'huli zenu zopigisigwa mmuno kuluwala kwavija muniyalalila niye, kuduhu hata imoja wenu yapetigwe yeli na miyaka malongo mabili na kugendelela,
30yonda yengile mwiisi iniwalongele nowagwaa iwe yenu, ila Kalebu mwanage Yefune na Yoshua mwanage Nuni.
31Mweye mulonga wanenu ogogigwa, lakini niye nowavikiza wanenu mwiisi imuibezeli, na isi ayo yokuwa kae yao.
32Lakini mweye mofila kukuno kuluwala.
33Wanenu ogunga na kugaya kukuno kuluwala kwa miyaka malongo mane mbuli ya mweye kuswela kutamanila mbaka vonda mufe mose kuluwala.
34Mbuli ya ago gehile genu, mogaya kwa miyaka malongo mane, kamba vizili siku azo zimucholile kuisungulila isi ayo, kila siku mwaka umoja. Avo, mojuwa kumulema Imulungu ndio choni.’
35Niye Mndewa Imulungu nilonga, nowatendela vivo kamba vimuiting'hane kunilema. Wanhu wose okwamila baha kuluwala na wose ofila baha.”
36Wanhu waja watumigwe na Musa wachole kuisungulila isi ayo, waja wabwelile na kuwatenda wanhu wose wamuyalalile Mndewa Imulungu kwa kugala usenga wihile mbuli ya isi ayo,
37wanhu awo wagalile usenga awo wafa kwa mikubulo kuulongozi wa Mndewa Imulungu.
38Lakini Yoshua mwanage Nuni, na Kalebu mwanage Yefune, wasigala wagima mna iwanhu awo wacholile kuisungulila isi ayo.
39Nayo Musa kawalongela Waizilaeli mbuli zija ziyalongeligwe na Mndewa Imulungu, na hewo walila kwa usungu.
40Imitondo ng'hani wachola kuvigongo walonga, “Sambi todaha kuchola hanhu aho hayatulongele Mndewa Imulungu. Totogola kamba tutenda nzambi.”
41Lakini Musa kalonga, “Avo habali mobena lagano da Mndewa Imulungu? Avo mohumwa!
42Sikumuchole ako kuna ivigongo, sambi mutoigwe na iwanhu owehila, kwavija Mndewa Imulungu heli na mweye.
43Avo mwahachola kuitowa na Waamaleki na Wakanaani, mofa kuing'hondo kwavija mulema kumkweleleza Mndewa Imulungu, heyo hali hamoja na mweye.”
44Lakini hewo wasusumiza kuchola uchanha kuvigongo, hamoja sanduku da lagano da Mndewa Imulungu na vivija Musa hasegele kuna ing'hambi.
45Avo Waamaleki na Wakanaani wakalile okala mwiisi ayo ya ivigongo wahumuluka hasi wawatowa na kuwahuma, wawawinga mbaka mwiisi ya Holima.