1Abaho Mndewa Imulungu kamulongela Musa, “Chola kwa Falao mulongele Imulungu kolonga, ‘Waleke wanhu zangu wasegele, wakanitambikile.
2Wahalema, noibananga isi yako kwa kugala mibula.
3Lwanda lwa Naili lomema mibula na mibula ayo yokwingila mng'anda yako na mdigati jako na mulusazi lwako luuwasa, na mzing'anda za watawala zako na mzing'anda za wanhu zako hata mna iviya venu va kutelekela.
4Mibula ayo yokwela mulukuli lwako, na mna izing'huli za wanhu zako na watawala zako.’ ”
5Mndewa Imulungu kamulongela Musa, “Mulongele Haluni yenule fimbo yake uchanha ya vizanda na imifuluta na vikolongo, na mibula yolawilila na kuigubika isi yose ya Misili.”
6Avo Haluni kenula fimbo yake uchanha ya mazi gose ga Misili, na mibula ilawilila na kuigubika isi yose ya Misili.
7Lakini wahawi wa Misili watenda kamba vivo kwa uhawi wao, na vivija watenda mibula ilawilile mwiisi ya Misili.
8Abaho Falao kawakema Musa na Haluni kawalongela, “Mpuleni Mndewa Imulungu yaisegese mibula ino kumwangu na kwa wanhu zangu, na niye nowaleka wanhu zenu wachole kumulavila nhosa Mndewa Imulungu.”
9Musa kamwidika Falao, “Sagula gweye lini kolonda nikupulile gweye hamoja na watawala zako na wanhu zako mibula isegele mzing'anda zenu na wasigale muulwanda wiiyeka.”
10Falao kalonga, “Nipulile mayo.”
11Mibula ayo yosegela kumwako na mzing'anda zenu na watawala wako na kwa wanhu zako, mibula ayo yosigala muulwanda wiiyeka.”
12Abaho Musa na Haluni wasegela kwa Falao, Musa kampula Mndewa Imulungu, yaisegese mibula ikalile kwa Falao.
13Mndewa Imulungu katenda kamba Musa viyampulile. Mibula ikalile mzing'anda na mna gamabuga na mmigunda ifa.
14Wanhu waika hamoja mibula yose ifile, na isi yose inung'ha bundo.
15Lakini Falao viyonile mibula ifa, zoyo jake dikala dala kabili, hawategeleze Musa na Haluni kamba Mndewa Imulungu viyalongile.
16Abaho Mndewa Imulungu kamulongela Musa, “Mulongele Haluni, yenule fimbo yake yatoe timbwisi da isi, najo dogaluka mhani mwiisi yose ya Misili.”
17Avo Haluni viyenule fimbo yake na kuitowa hasi, timbwisi digaluka mhani wawananahila wanhu na wanyama. Timbwisi jose da isi ya Misili digaluka mhani.
18Wahawi wa Misili kwa uhawi wao wageza kugalusa timbwisi diwe mhani lakini hawadahile bule. Mhani wakala wenele kwa wanhu na wanyama.
19Wahawi wamulongela Falao, “Uno mkono wa Imulungu!” Lakini zoyo da Falao digendelela kuwa dala na halondile kuwategeleza Musa na Haluni kamba Mndewa Imulungu viyalongile.
20Mndewa Imulungu kamulongela Musa, “Uidamuke ulukwili ukaiting'hane na Falao viyochola kuulwanda. Mulongele kamba Mndewa Imulungu kolonga, ‘Waleke wanhu zangu wasegele, wakanitambikile.
21Wahalema kuwaleka wasegele, nogala mikonzi kumwako gweye na watawala zako na kwa wanhu zako wose. Ng'anda za Wamisili zomema mikonzi na vivija isi yose yomema mikonzi.
22Lakini mdisiku dijo kuna umwambu wa Gosheni, kuko kowokala wanhu zangu kokuwa kuduhu mikonzi, ili ujuwe kamba niye Mndewa Imulungu nosang'hana mwiisi ino.
23Nowabagula wanhu wako na wanhu wangu, unzonza uno noutenda mayo.’ ”
24Avo Mndewa Imulungu katenda kamba viyalongile, kagala madali ga mikonzi ingile mng'anda ya Falao na mna zing'anda za watawala zake. Isi yose ya Misili inangigwa na mikonzi ayo.
25Abaho Falao kamkema Musa na Haluni kawalongela, “Gendeni mkamulavile nhosa Imulungu wenu mmuno mwiisi ya Misili.”
26Musa kamwidika, “Aka havinogile bule kutenda vivo, kwavija nhosa zonda tumulavile Mndewa Imulungu wetu zowagevuza Wamisili. Avo twahalava nhosa ziwagevuza okwiza kutukoma kwa mabwe.
27Tolondigwa tugende mwanza wa siku ndatu kuluwala, tukamulavile nhosa Mndewa Imulungu wetu, kamba viyatulagize.”
28Falao kalonga, “Nowaleka musegele muchole mkamulavile nhosa kuluwala Mndewa Imulungu, Imulungu wenu, lakini sikumuchole kutali ng'hani. Mhulileni na niye.”
29Musa kamwidika Falao, “Nahasegela hano nompula Imulungu, mayo mikonzi ino yosegesigwa kumwako gweye, na kwa watawala wako na kwa wanhu zako. Lakini sikuutuvizile kabili na kuwagomesa wanhu sikuwachole kumulavila nhosa Mndewa Imulungu.”
30Abaho Musa kasegela kwa Falao, na kampula Mndewa Imulungu.
31Mndewa Imulungu katenda vivija kamba Musa viyapulile. Mikonzi isegela kwa Falao, na kwa watawala zake na kwa wanhu zake, kuduhu hata ng'honzi imoja yasigale.
32Lakini hata mwanza uno zoyo da Falao dikala dala na hawalekile Waizilaeli wasegele.