1Avo Mndewa Imulungu kamulongela Musa, “Nokutenda gweye kamba Imulungu kwa Falao, na ndugu yako Haluni kokuwa kamba mtula ndagu wako.
2Mulongele ndugu yako Haluni gaja gose gonda nikulagize, nayo Haluni komulongela Falao yawaleke Waizilaeli wasegele mwiisi yake.
3Lakini noutenda moyo wa Falao uwe mdala. Hata nahakongeza unzonza na vilaguso mwiisi ya Misili,
4Falao hakutegeleza bule. Abaho nougolosa mkono wangu uli na udahi na kuwakoboza Wamisili na nozilava ng'holo za Waizilaeli.”
5Na Wamisili ojuwa kamba niye na Mndewa Imulungu vonda niugolose mkono wangu kumwao na kuwalava Waizilaeli mwiisi yao.
6Musa na Haluni wasang'hana kamba viwalagizwe na Mndewa Imulungu.
7Kipindi viwalongile na Falao, Musa kakala na miyaka malongo nane na Haluni kakala na miyaka malongo nane na ndatu.
8Mndewa Imulungu kamulongela Musa na Haluni,
9“Mndewa wa Misili yahawalongela, ‘Tendeni unzonza,’ mulongele Haluni yasole fimbo yake yaibwanhe hasi mgameso ga Falao, nayo yogaluka mgendela hasi.”
10Avo Musa na Haluni wachola kwa Falao na watenda kamba viwalagizwe na Mndewa Imulungu. Haluni kaibwanha hasi fimbo yake mgameso ga Falao na watawala wake, nayo igaluka mgendela hasi.
11Abaho Falao kawakema wanhu wake weli na nzewele na wahawi wake, na kwa uhawi wao watenda vivija.
12Kila imoja wao kaibwanha hasi fimbo yake, na fimbo zao zigaluka mgendela hasi. Lakini fimbo ya Haluni igaluke mgendela hasi izimeza fimbo zao zigaluke mgendela hasi.
13Hata avo zoyo da Falao dikala dala na hawategeleze bule Musa na Haluni, kamba Mndewa Imulungu viyalongile.
14Abaho Mndewa Imulungu kamulongela Musa, “Moyo wa Falao mdala na kolema kuwaleka Waizilaeli wasegele.
15Avo uidamuke ulukwili ukaiting'hane na Falao viyochola kuulwanda lwa Naili. Isole fimbo ija igaluke mgendela hasi, umbete kumgwazo wa lwanda.
16Abaho umulongele vino, ‘Mndewa Imulungu, Imulungu wa Waebulania, kanhuma kumwako nikulongele uwaleke wanhu zake wasegele, wachole wakamtambikile kuluwala, lakini mbaka sambi gweye hutegeleza.
17Avo Mndewa Imulungu kolonga vino, sambi komjuwa heyo iyo nani. Nogatowa mazi ga lwanda lwa Naili kwa fimbo ino, na mazi gose gogaluka damu.
18Somba weli muulwanda lwa Naili wofa, lwanda lonung'ha bundo, na Wamisili honda walonde kugang'wa mazi gake.’ ”
19Mndewa Imulungu kamulongela Musa, “Mulongele Haluni yasole fimbo yake na yaigolose uchanha ya mazi gose ga Misili, mvizanda vose mna imifuluta mna ivikolongo vose na mna gamalamba, vose avo vogaluka damu. Damu yokuwa kila hanhu mwiisi yose hata mna iviya va mibiki na mabwe.”
20Musa na Haluni watenda kamba Mndewa Imulungu viyawalagize. Haluni kenula fimbo yake mgameso ga Falao na watawala zake kagatowa mazi ga lwanda lwa Naili, na mazi gose gagaluka damu.
21Somba wakalile muulwanda lwa Naili wafa. Mazi gake ganung'ha bundo mbaka Wamisili hawadahile kugang'wa mazi gake. Damu ikala kila hanhu mwiisi ya Misili.
22Lakini wahawi wa Misili kwa uhawi wao watenda kamba vivo. Avo zoyo da Falao digendelela kuwa dala, na heyo hawategeleze Musa na Haluni kamba viyalongile Mndewa Imulungu.
23Avo, Falao kabwela ukae kumwake, na hagagelegeze gaja galawilile.
24Wamisili wose wakala ohimba kumgwazo wa lwanda lwa Naili wapate mazi ga kung'wa, kwavija hawadahile kung'wa mazi ga lwanda lulo.
25Zibita siku saba toka Mndewa Imulungu viyagagaluse mazi ga lwanda.