1Abaho Musa na Haluni wachola kwa Falao wamulongela, “Mndewa Imulungu, Imulungu wa Izilaeli kolonga vino, ‘Waleke wanhu zangu wasegele, wakanitendele nyimwilinyimwili kuluwala.’ ”
2Lakini Falao kawauza, “Mndewa Imulungu ayo nani mbaka nimtegeleze na niwaleke Waizilaeli wasegele? Niye simjuwile bule ayo Mndewa Imulungu, na siwaleka Waizilaeli wasegele.”
3Musa na Haluni wamwidika, “Imulungu wa Waebulania katulawila siye. Tuleke tuchole kuluwala kwa mwanza wa siku ndatu tukamulavile nhosa Mndewa Imulungu wetu. Wahalema sikutusegele Mndewa Imulungu kotukoma kwa mitamu hebu kwa ng'hondo.”
4Mndewa wa Misili kawedika, “Gweye Musa na miyago Haluni habali mowatenda wanhu waleke kusang'hana? Bweleni mzisang'hano zenu.”
5Abaho Falao kalonga kabili, “Wanhu wenu wengi kubanza wanhu wa isi yangu, na sambi mweye molonda waleke kusang'hana!”
6Siku didija Falao kawalagiza Wamisili iwakulu wa watumwa hamoja na iwemilizi owemililaga Waizilaeli wayao, kalonga,
7“Sikumuwagwelele Waizilaeli minyomvi ya kutendela matofali, walekeni wenyego wachole kuizahila.
8Lakini wingi wa matofali gondawatende uwe uuja kamba wa siku zose, na sikudiswele hata tofali dimoja, kwavija wanhu wano wanyeka, lekaavo onongela, ‘Tuleke tuchole tukamulavile nhosa Imulungu wetu.’
9Wengezeni wanhu wano sang'hano ndala zonda ziwatende sikuwategeleze mbuli za uvizi.”
10Avo Wamisili iwakulu wa watumwa hamoja na iwemilizi owemililaga Waizilaeli wayao wachola kwa iwanhu kuwalongela, “Falao kalonga vino, ‘Siwagwelela kabili minyomvi.
11Gendeni mweye wenyego kokose kumudaha kuipata, lakini wingi wa matofali uwe vivija kamba siku zose.’ ”
12Avo wanhu wapwililika kila hanhu mwiisi ya Misili kuzahila minyomvi.
13Nao Wamisili iwakulu wa watumwa, wawalagiza wanhu walonga, “Tendeni matofali kamba gaja gamukalile motenda siku zose vimukalile mogaliligwa minyomvi.”
14Wamisili iwakulu wa watumwa wawatowa iwemilizi owemililaga Waizilaeli wayao, wasaguligwe kwimilila sang'hano kuno owalongela, “Habali hamuvikize wingi wa matofali gagaja kamba vimutendaga siku zose?”
15Abaho iwemilizi owemililaga Waizilaeli wayao wachola kwa Falao, wamulongela, “Go, mkulu habali kotutendela vino siye wasang'hanaji zako?
16Hatugweleligwa kabili minyomvi na kuno tolongeligwa tutende matofali. Abaho totoigwa lakini wabanange wanhu zako mwenyego.”
17Falao kawedika, “Mweye mnyeka, na hamulonda kusang'hana, lekaavo monongela, ‘Tuleke tuchole tukamulavile nhosa Mndewa Imulungu.’
18Bweleni kusang'hana! Honda mugweleligwe minyomvi, lakini molondigwa mutende matofali kamba gaja gamutendaga siku zose.”
19Avo iwemilizi owemililaga Waizilaeli wayao wayona wa mmagazo ng'hani kwavija walongeligwa, “Mutende matofali kamba gaja gamutendaga siku zose.”
20Viwasegele kwa Falao, wamting'hana Musa na Haluni wakala owabeta.
21Avo wawalongela, “Mndewa Imulungu yakilole kija kimutenda na yawataguse mweye kwavija mumtenda Falao na wasang'hanaji zake watwihile. Mweye muwagwelela mbuli ya kutukomela.”
22Abaho Musa kachola kwa Mndewa Imulungu kabili kamulongela, “Mndewa Imulungu habali kowatendela gehile wanhu wano? Avo kumbe kino acho kiunitumile?
23Toka vinicholile na kulonga na Falao kwa twaga jako, mndewa ayo kowatendela gehile wanhu wano, na gweye hutendile kinhu chochose kuwakombola wanhu zako.”