Kulawa 4

¹Abaho Musa kamulongela Mndewa Imulungu, “Avo yokuwaze kamba Waizilaeli hawanhogola na hawanitegeleza vonda niwalongele. Onongela, ‘Mndewa hakulawile bule’?”

²Avo Mndewa Imulungu kamuuza, “Kugoga choni mmakono?”

³Mndewa kamulongela, “Ibwanhe hasi.” Musa viyaibwanhe hasi, igaluka mgendela hasi, Musa kakimbila.

⁴Abaho Mndewa Imulungu kamulongela Musa, “Golosa mkono wako mgoge umkila.” Avo Musa kagolosa mkono wake kamgoga umkila, na imgendela hasi kagaluka fimbo kabili.

⁵Mndewa Imulungu kamulongela, “Utende vino ili Waizilaeli watogole kamba niye Mndewa, Imulungu wa wahenga zao, Imulungu wa Abulahamu na Imulungu wa Isaka na Imulungu wa Yakobo nikulawila.”

⁶Mndewa Imulungu kamulongela kabili Musa, “Ingiza mkono wako mna ikiwalo chako.” Avo Musa kengiza mkono wake mna ikiwalo chake na viyaulavile kunze, ukala na utamu wa dikulu ukala mzelu kamba pamba.

⁷Abaho Imulungu kamulongela, “Ingiza kabili mkono wako mna ikiwalo chako!” Musa kawingiza mkono wake mna ikiwalo chake, viyaulavile kunze mkono wake ubwela kamba viwili lukuli lwake.

⁸Imulungu kamulongela Musa, “Kamba oleka kukutogola kwa unzonza wa ichanduso, odaha kutogola kwa unzonza wa kabili.

⁹Lakini kamba hawakutogole kwa vinhu avo vibili, wahalema kukutegeleza kwa gaja gaulongile, deha mazi ga lwanda lwa Naili ugete mwiisi. Mazi gago gogaluka damu.”

¹⁰Musa kamulongela Mndewa Imulungu, “Aka Mndewa sikuunhume niye. Niye sidahile bule kulonga goya toka mwaka, hata sambi viusongile kulonga na niye msang'hanaji wako. Niye sili mulongaji.”

¹¹Mndewa Imulungu kamuuza, “Nani yalumbile mulomo wa munhu? Nani yomtenda munhu sikuyalonge hebu mvugu? Yalole hebu msuwameso? Vino sili niye Mndewa Imulungu?

¹²Avo, genda! Nokutaza kulonga, nokufunza cha kulonga.”

¹³Lakini Musa kamwidika, “Mndewa wangu, chonde mtume munhu iyagwe.”

¹⁴Mndewa Imulungu kamgevuzikila Musa, kamulongela, “Gweye sikunayo ndugu yako Haluni ija Imulawi? Nojuwa heyo kodaha kulonga vinogile. Sambi kamnzila kokwiza kuiting'hana na gweye na yahakona kodeng'helela.

¹⁵Gweye longa nayo na mulongele gaja gonda yalonge. Niye nowataza, na kuwafunza ga ukusang'hana.

¹⁶Haluni kolonga na Waizilaeli hanhu hako. Heyo kokuwa mulongaji wako na gweye kokuwa kamba Imulungu kumwake.

¹⁷Sola ifimbo ino ili mmakono gako, avo koitumia kutenda unzonza.”

¹⁸Abaho Musa kabwela kwa Yetulo, tata mkwe yake, kamulongela, “Chonde nokupula nhogolela nibwele Misili kwa ndugu zangu, nikawakagule kamba wang'hali wagima.” Yetulo kamulongela, “Genda moyo uholile.”

¹⁹Musa viyakalile yang'hali mwiisi ya Midiani, Mndewa Imulungu kamulongela, “Bwela Misili kwavija waja wose walondile kukukoma wafa.”

²⁰Avo Musa kamsola mwehe wake na wanage, kawakweza mumgongo wa kihongwe, kasonga mwanza wa kubwela Misili, Musa kasola fimbo iyalongeligwe na Imulungu yaisole.

²¹Mndewa Imulungu kamulongela Musa, “Wahavika mwiisi ya Misili sang'hana mgameso ga Falao unzonza wose unikugwelele udahi wa kusang'hana. Lakini noutenda moyo wa Falao uwe mdala avo honda yawaleke Waizilaeli wasegele.

²²Abaho gweye komulongela Falao, Mndewa Imulungu kalonga vino, ‘Wanhu wa Izilaeli kamba mwanangu chaudele wa kimbigalo.

²³Na niye nokulongela muleke mwanangu yasegele, ili yakanitambikile, lakini humulekesa bule yasegele, avo nomkoma chaudele wako wa kimbigalo.’ ”

²⁴Viyakalile yang'hali mnzila kobwela Misili, Musa kakala mng'anda ya kuwasa wageni, Mndewa Imulungu kamcholela kalonda kumkoma.

²⁵Lakini Sipola mwehe wake Musa kasola dibwe dikutwa, kadikanha govi da mwanage, kamkwasa najo mmagulu gake, kalonga, “Gweye kwa mkasano wa damu kumwangu.”

²⁶Avo Mndewa Imulungu kamuleka Musa yawe mgima, kwavija Sipola viyamwingize kumbi kakala yalongile, “Mkasano wa damu.”

²⁷Mndewa Imulungu kamulongela Haluni, “Chola kuluwala ukaiting'hane na Musa.” Avo Haluni kachola kuiting'hana na Musa kulugongo lwa Imulungu, viyamone kamnonela.

²⁸Abaho Musa kamulongela Haluni gaja gose gayalongeligwe na Mndewa Imulungu viyamulongele yabwele Misili, vivija kamulongela unzonza wose uyalongeligwe yasang'hane.

²⁹Avo Musa na Haluni wachola Misili, wawakema wavele wose wa Izilaeli.

³⁰Haluni kawalongela gose Mndewa Imulungu gayamulagize Musa na vivija Musa katenda unzonza mgameso ga wanhu wose.

³¹Wanhu watogola, na viwahulike kamba Mndewa kawezila na kagona madununzo gao na kolonda kuwataza, waidulika wamtambikila Mndewa Imulungu.