1“Wahavika na kuisola isi iyokugwaa Mndewa Imulungu, Imulungu wako na kukala mumo,
2usole ndiya yonda usonge kusenga kulawa mwiisi iyokugwaa Mndewa Imulungu, Imulungu wako, uike mkigelo na ugale hanhu aho honda yahasagule Mndewa Imulungu, Imulungu wako kwika twaga jake.
3Umcholele mulava nhosa yosang'hana kipindi acho, na umulongele, ‘Lelo notogola mgameso ga Mndewa Imulungu, Imulungu wangu kamba ningila mwiisi iyaiduwile kwa wahenga zetu kamba kotugwelela.’
4“Na mulava nhosa vonda yasole kigelo acho mmakono gako na kukika kuulongozi wa upango wa Mndewa Imulungu, Imulungu wako,
5ulonge mbuli zino kuulongozi wa Mndewa Imulungu, Imulungu wako, ‘Muhenga wangu kakala Mwalamu, kagunga kuno na kuno abaho kachola ako Misili na kakala kuko kamba munhu baki. Wakala wanhu wadodo viwakalile kuko, lakini wawa wanhu wa isi ng'hulu na wengi.
6Wamisili watutendela usede watugaza na watunanahiza tusang'hane sang'hano ndala za utumwa.
7Abaho tumulilila Mndewa Imulungu, Imulungu wa wahenga zetu, kahulika kililo chetu na kagona magazo getu na sang'hano ndala na gose gehile gatupatile.
8Avo, Mndewa Imulungu katulava kuko Misili kwa mkono wake wa nguvu, kwa vinhu vidumbiza na vilaguso na unzonza.
9Katugala hano na katugwelela isi ino imemile maziwa na uki.
10Na sambi nimgalila Mndewa Imulungu ndiya ino ya ichanduso kulawa mwiisi iyanigwelele.’
11Na gweye udeng'helele ganogile gose gayakutendele Mndewa Imulungu, Imulungu wako, gweye na Iwalawi na iwanhu baki na ndugu zako wadeng'helele hamoja na gweye.
12“Kila miyaka midatu, kila imoja wenu yalave fungu da longo da ndiya yake yose mbuli ya Walawi na iwanhu baki na iwana iwakiwa na wagane, ili wapate ndiya ya kuja na kwiguta viwokala mmabuga genu.
13Abaho ulonge vino kuulongozi wa Mndewa Imulungu, Imulungu wako, ‘Nidilava mng'anda yangu fungu ding'ala, niwagwaa Walawi na iwanhu baki na iwana iwakiwa na wagane, kamba viundagize nitende. Sibenile lagizo jako hebu kuisemwa.
14Sidile fungu jojose da longo ving'halile noiyalala, sidilavile kunze ya ng'anda yangu ving'halile nifita na sidilavile fungu da longo kwa iwanhu wafile. Nikutegeleza gweye Mndewa Imulungu, Imulungu wangu, na nitenda kila kinhu kiunilagize.
15Ulole hasi kulawa hanhu hako hong'ala ako kuulanga, uwatendele ganogile wanhu zako Izilaeli na isi yuutugwelele kamba viuiduwile kwa iwahenga zetu, isi imemile maziwa na uki.’
16“Lelo didino Mndewa Imulungu, Imulungu wenu, kowalagiza mugagoge mafundizo na malagizo gano. Muiteganye mugagoge kwa mizoyo yose na kwa loho yose.
17Lelo mulonga kamba Mndewa Imulungu ayo Imulungu wenu, na kamba mokweleleza nzila zake na kugoga mafundizo gake na malagizo na momtegeleza.
18Na Mndewa Imulungu lelo kalonga kamba mweye mwa wanhu zake heyo mwenyego kamba viyaiduwile na kamba molondigwa mugagoge malagizo gake gose.
19Mndewa Imulungu, Imulungu wenu kowatenda mweye muwe wanhu wa isi ng'hulu kubanza isi zose ziyalumbile, mbuli ya twaga jake na nhogolwa zake na ukulu wake. Na mweye mokuwa wanhu zake wang'alile kamba viyalongile.”