1“Wanhu wabili wahagomba na wahachola kuna ikitala kulamuligwa, imoja yahakoneka hatendile dihile na iyagwe yahakoneka kabananga,
2na kamba ija yabanange kolondigwa yazabuligwe mbalati, msemi yamulagize munhu ayo yawase hasi kingubanguba na yazabuligwe mbalati kamba vija viyabanange.
3Munhu yabanange kinhu kodaha kuzabuligwa mbalati malongo mane, lakini siyo kubanza vivo, mwahongeza kubanza vivo momgela kinyala Mwiizilaeli miyenu.
4“Sikuumfunge ng'ombe umulomo wahamsang'hanila kubiga uhemba.
5“Kamba ndugu wabili okala hanhu na imoja wao yahafa bila kuleka mwana wa kimbigalo, mtwanzi wa mwenekwaga sikuyasoligwe na munhu baki kunze ya ulukolo lwa mwenekwaga. Ndugu wa mwenekwaga kolondigwa yamsole mgane ayo.
6Mwana wa ichanduso wa kimbigalo yonda yaleligwe kopetigwa kamba mwana wa mwenekwaga, ili twaga jake sikudisemwigwe mwiisi ya Izilaeli.
7Lakini kamba ndugu ayo wa mwenekwaga hamulonda ayo imtwanzi mgane, avo mtwanzi ayo yachole kuulongozi wa iwavele wa dibuga na yalonge, ‘Ndugu wa mkasano wangu yafile kolema kugendeleza twaga da ndugu yake yafile mwiisi ya Izilaeli, avo kolema kutenda gaja golondigwa heyo yagatende kamba ndugu wa mwenekwaga.’
8Abaho awo iwavele wamkeme ayo imbigalo na walonge na heyo. Kamba kogendelela kulema kumsola,
9mtwanzi ayo mgane yamgendele mbigalo ayo mgameso ga iwavele wa dibuga, yamvule kilatu chake kimoja na yamtemele mate mkihanga na yamulongele, ‘Vino vivo viilondigwa kutendeligwa imunhu yolema kugendeleza ulelo kwa ndugu yake.’
10Na twaga da ng'anda yake mwiisi ya Izilaeli dokuwa, ‘Ng'anda ya munhu yavuligwe kilatu.’”
11“Wambigalo wabili wahaitowa na mwehe wa imoja kogeza kumtaza mkasano wake kwa kumgoga gamaungo gamadeke ija yoitowa na mkasano wake,
12avo muukanhe mkono wa mtwanzi ayo na sikummonele bazi.
13“Sikumuwe na vinhu vibili vibili va kupimila vinhu, kimoja kizama kiyagwe kibewe. Sikumtumie vipimo vivizaga.
14Sikumuwe na vinhu va aina mbili va kupimila, kikulu na kidodo.
15Mupimile vinhu vinogile va kupimila ili mukale siku nyingi mwiisi imugweleligwa na Mndewa Imulungu, Imulungu wenu.
16Wanhu otenda vinhu kamba vivo, wose otenda kwa uvizi, omgevuza Mndewa Imulungu, Imulungu wenu.
17“Kumbukeni gawawatendele Waamaleki vimukalile mmwanza kulawa Misili.
18Kumbukeni viwawatowile vimukalile mnzila na kuwakoma wose wadonhile wakalile kukisogo chenu. Waamaleki hawamdumbile Imulungu.
19Avo, kipindi Mndewa Imulungu, Imulungu wenu vonda yawahumuze na magazo ga wanhu wose owehila, awo owazunguluka mwiisi iyowagwaa mukale mumo, sikumuisemwe molondigwa muwakome Waamaleki wose.”