1Kwavija tojuwa kamba hema ino itukala sambi hano mwiisi, awo lukuli lwetu, dahabanangika Imulungu kotuvaza kae iyagwe ako kuulanga, kae ilibule uhelelo haizengigwe kwa makono ga wanhu.
2Lakini sambi togutilila, kipindi vitubeta kwa kusulukila tugweleligwe lukuli lwa kuulanga,
3kwavija twahavazigwa lukuli lwa sambi, hatukoneka twa mwazi.
4Vitukala mdihema dino da mwiisi, togutilila kwa lusikisiki, kwavija hatulonda kululeka lukuli luno lwa mwiisi, lakini tolonda kuvazigwa kae yetu ya kuulanga, ili kija kifa kigalusigwe na ugima wa milele.
5Imulungu mwenyego ayo yatutandile gano gose. Katugwaa Loho wake kamba fungu dodo da gaja gayatwikile.
6Avo siku zose togangamala. Tojuwa kamba vitukala mzing'huli zino, twa kutali na kae yetu hamoja na Mndewa.
7Kwavija tokala kwa kumtamanila Imulungu, siyo kwa gaja gotulola.
8Lakini togangamala na tolonda kuleka ukazi uno wa lukuli na kukala hamoja na Mndewa.
9Mbuli ng'hulu, towamba ng'hani kumnogeza Mndewa, iwe tokala mwiisi ino hebu kuulanga.
10Kwavija kila munhu kokwima kuulongozi wa Kilisito yatagusigwe. Kila munhu kobokela kija kiyolondigwa, kamba vija viyasang'hane mwiisi, kamba ganoga hebu geha.
11Siye tojuwa choni kumdumba Mndewa, avo towamba kuwatewenza wanhu wayagwe. Imulungu kotujuwa goya, na niye nogesa kamba mweye vivija munjuwa mmizoyo yenu.
12Siye hatugeza kuitogola kabili kumwenu. Lakini towagwaa kilamuso kinogile mweye muigodele siye, ili mudahe kuwedika waja oigodela vija vikoneka na oleka vija vili mmizoyo.
13Kamba tokoneka twabule nzewele, mbuli ya Imulungu na kamba tuna nzewele, mbuli ya mweye.
14Tolongozigwa na unogelwa wa Kilisito, sambi tojuwa munhu imoja kafa mbuli ya wanhu wose, avo wose wafa nayo.
15Kafa mbuli ya wanhu wose, ili wanhu okala sikuwakale wenyego, lakini wakale mbuli ya heyo yafile na kazilibuligwa mbuli ya hewo.
16Avo kulawa sambi, hatumgesa munhu kwa kumulola. Hamoja hana kipindi tumgesa Kilisito kwa kumulola, sambi hatutenda vivo kabili.
17Munhu yoyose yahailumba na Kilisito kotendigwa wa sambi, gaumwaka gabita, ga sambi geza.
18Gano gose golawa kwa Imulungu, yatutendile tuilumbe nayo kubitila Kilisito na katugwelela sang'hano ya kuwatenda wanhu wayagwe wailumbe nayo.
19Avo, kubitila Kilisito Imulungu kailumba na wanhu wa mwiisi, hagesile nzambi zao, katugwaa usenga wa kuwapetela wanhu wailumbe nayo.
20Avo, siye tolonga mbuli ya Kilisito, kubitila siye Imulungu kowapula mweye. Towapula kwa twaga da Kilisito, muilumbe na Imulungu.
21Imulungu kamtenda ija yelibule nzambi yasole nzambi zetu, ili kubitila heyo Imulungu yatutende tunoge mgameso gake.