ВЫСЛОЎІ 10

¹Выслоўі Саламона. Сын мудры радуе бацьку, а сын бязглузды - засмучэньне маці ягонай.

²Не даюць карысьці скарбы няправедныя, а праўда ратуе ад сьмерці.

³Не дапусьціць Гасподзь, каб галадала душа праведнага, а зьдзірства бязбожных адкіне.

⁴Лянівая рука робіць бедным, а рука руплівая ўзбагачае.

⁵Хто зьбірае летам - сын разумны, а хто сьпіць у жніва - сын шалапутны.

⁶Дабраславеньні - на галаву праведнага, а вусны бязбожным затуліць насільле.

⁷Памяць пра праведнага дабраславёная будзе, а імя бязбожных спаганьбіцца.

⁸Мудры сэрцам прымае запаведзі, а бязглузды вуснамі спатыкнецца.

⁹Хто ходзіць у беззаганнасьці, той ходзіць бясьпечна; а хто скрыўляе шляхі свае, той будзе выкрыты.

¹⁰Хто міргае вачыма, той чыніць прыкрасьць, а бязглузды вуснамі спатыкнецца.

¹¹Вусны праведніка - крыніца жыцьця, а вусны бязбожным затуліць насільле.

¹²Нянавісьць будзіць разлад, любоў акупае ўсе грахі.

¹³На вуснах у разумнага мудрасьць, а на целе ў дурнога - дубец.

¹⁴Мудрыя зьберагаюць веды, а вусны немысьля - блізкая пагібель.

¹⁵Маёмасьць багатага - моцны горад яго, бяда бедным - іхняе ўбоства.

¹⁶Праца праведнага - на жыцьцё, прыбытак бязбожнага - на грэх.

¹⁷Хто захоўвае настаўленьне, той на дарозе да жыцьця; а хто пагарджае засьцярогай - блукае.

¹⁸Хто хавае нянавісьць, у таго вусны ілжывыя; і хто пашырае паклёпы - неразумны.

¹⁹Пры шматслоўі ня ўнікнуць грэху, а хто стрымлівае вусны свае - разумны.

²⁰Чыстае срэбра - язык праведнага, а сэрца бязбожных - нікчэма.

²¹Вусны праведнага пасьвяць многіх, а неразумныя мруць ад нястачы глузду.

²²Дабраславеньне Гасподняе - яно ўзбагачае і смутку з сабой ня прыносіць.

²³Радуе немысьля - учынак ганебны, а чалавека разумнага - мудрасьць.

²⁴Чаго баіцца бязбожнік, тое спасьцігне яго, а жаданьне праведнікаў збудзецца.

²⁵Як падымецца бура, так і няма бязбожнага; а ў праведніка - аснова вечная.

²⁶Што воцат зубам і дым вачам, тое гультай тым, хто пасылае яго.

²⁷Страх Гасподні дадае дзён, а гады бязбожных скароцяцца.

²⁸Спадзяваньне праведнікам - радасьць, а надзея бязбожных загіне.

²⁹Шлях Гасподні - цьвярдыня нявінным і пагібель бязбожным.

³⁰Праведнік вавек не пахісьнецца, а бязбожныя не пажывуць на зямлі.

³¹З вуснаў праведніка крынічыць мудрасьць, а язык шкодлівы будзе вырваны.

³²Вусны праведніка любяць богаспадобнае, а вусны бязбожных - разбэшчанае.