1ⲧⲱⲇⲏ ⲡⲉⲯⲁⲗⲙⲟⲥ ⲛⲛϣⲏⲣⲉ ⲛⲕⲟⲣⲉ ⲛⲥⲟⲩ ⲥⲛⲁⲩ ⲛⲛⲥⲁⲃⲃⲁⲧⲟⲛ</ab>
2ⲟⲩⲛⲟϭ ⲡⲉ ⲡϫⲟⲉⲓⲥ ⲁⲩⲱ ϥⲥⲙⲁⲙⲁⲁⲧ ⲉⲙⲁⲧⲉ ϩⲛ ⲧⲡⲟⲗⲓⲥ ⲙⲡⲉⲛⲛⲟⲩⲧⲉ ϩⲙ ⲡⲉϥⲧⲟⲟⲩ ⲉⲧⲟⲩⲁⲁⲃ</ab>
3ⲉϥⲟⲩⲉⲥⲧⲱⲛ ϩⲙ ⲡⲧⲉⲗⲏⲗ ⲉⲡⲕⲁϩ ⲧⲏⲣϥ ⲛⲧⲟⲟⲩ ⲛⲥⲓⲱⲛ ⲛⲉⲧϫⲟⲥⲉ ⲛⲧⲉⲡⲉⲙϩⲓⲧ ⲧⲡⲟⲗⲓⲥ ⲙⲡⲛⲟϭ ⲛⲣⲣⲟ</ab>
4ⲡⲛⲟⲩⲧⲉ ⲛⲁⲟⲩⲱⲛϩ ⲉⲃⲟⲗ ϩⲛ ⲛⲉⲥⲙⲁ ⲉⲧⲧⲁⲉⲓⲏⲩ ⲉϥϣⲁⲛϯ ⲧⲟⲟⲧⲥ</ab>
5ϫⲉ ⲉⲓⲥ ϩⲏⲏⲧⲉ ⲁⲛⲉⲥⲣⲣⲱⲟⲩ ⲥⲱⲟⲩϩ ⲉϩⲟⲩⲛ ⲁⲩⲉⲓ ⲉⲩⲙⲁ ⲛⲟⲩⲱⲧ</ab>
6ⲛⲧⲟⲟⲩ ⲁⲩⲛⲁⲩ ⲛⲧⲉⲓϩⲉ ⲁⲩⲣϣⲡⲏⲣⲉ ⲁⲩϣⲧⲟⲣⲧⲣ ⲁⲩⲕⲓⲙ</ab>
7ⲁⲩⲥⲧⲱⲧ ⲧⲁϩⲟⲟⲩ ⲙⲙⲁⲩ ⲛⲑⲉ ⲛⲛⲛⲁⲁⲕⲉ ⲛⲧⲉⲧⲛⲁⲙⲓⲥⲉ</ab>
8ϩⲛ ⲟⲩⲧⲏⲩ ⲛϭⲟⲛⲥ ϥⲛⲁⲟⲩⲱϣϥ ⲛⲛⲉϫⲏⲩ ⲛⲑⲁⲣⲥⲓⲥ</ab>
9ⲕⲁⲧⲁ ⲑⲉ ⲉⲛⲧⲁⲛⲥⲱⲧⲙ ⲧⲁⲓ ⲟⲛ ⲧⲉ ⲑⲉ ⲉⲛⲧⲁⲛⲛⲁⲩ ϩⲛ ⲧⲡⲟⲗⲓⲥ ⲙⲡϫⲟⲉⲓⲥ ⲛⲛϭⲟⲙ ϩⲛ ⲧⲡⲟⲗⲓⲥ ⲙⲡⲉⲛⲛⲟⲩⲧⲉ ⲁⲡⲛⲟⲩⲧⲉ ⲥⲙⲛⲥⲛⲧⲉ ⲙⲙⲟⲥ ϣⲁ ⲉⲛⲉϩ ⲇⲓⲁⲯⲁⲗⲙⲁ</ab>
10ⲛⲉⲛⲙⲉⲉⲩⲉ ⲉⲣⲟⲕ ⲡⲛⲟⲩⲧⲉ ϫⲉ ⲡⲉⲕⲛⲁ ϩⲛ ⲧⲙⲏⲧⲉ ⲙⲡⲉⲕⲗⲁⲟⲥ</ab>
11ⲕⲁⲧⲁ ⲡⲉⲕⲣⲁⲛ ⲡⲛⲟⲩⲧⲉ ⲧⲁⲓ ⲟⲛ ⲧⲉ ⲑⲉ ⲙⲡⲉⲕⲕⲉⲥⲙⲟⲩ ⲉϫⲛ ⲁⲣⲏϫϥ ⲙⲡⲕⲁϩ ⲉⲣⲉⲧⲉⲕⲟⲩⲛⲁⲙ ⲙⲉϩ ⲛⲇⲓⲕⲁⲓⲟⲥⲩⲛⲏ</ab>
12ⲙⲁⲣⲉϥⲉⲩⲫⲣⲁⲛⲉ ⲛϭⲓ ⲡⲧⲟⲟⲩ ⲛⲥⲓⲱⲛ ⲁⲩⲱ ⲙⲁⲣⲟⲩⲧⲉⲗⲏⲗ ⲛϭⲓ ⲛϣⲉⲉⲣⲉ ⲛϯⲟⲩⲇⲁⲓⲁ ⲉⲧⲃⲉ ⲛⲉⲕϩⲁⲡ ⲡϫⲟⲉⲓⲥ</ab>
13ⲕⲱⲧⲉ ⲉⲥⲓⲱⲛ ⲛⲧⲉⲧⲛϩⲱⲗϭ ⲉⲣⲟⲥ</ab>
14ϣⲁϫⲉ ϩⲛ ⲛⲉⲥⲟⲩⲟⲙⲧⲉ ⲕⲱ ⲛⲛⲉⲧⲛϩⲏⲧ ⲉⲧⲉⲥϭⲟⲙ ⲁⲩⲱ ⲛⲧⲉⲧⲛⲡⲱϣ ⲛⲛⲉⲧⲧⲁⲉⲓⲏⲩ ⲛⲧⲁⲥ ϫⲉⲕⲁⲥ ⲉⲧⲉⲧⲛⲉϫⲟⲟⲩ ⲉⲕⲉⲅⲉⲛⲉⲁ</ab>
15ϫⲉ ⲡⲁⲓ ⲡⲉ ⲡⲛⲟⲩⲧⲉ ⲡⲉⲛⲛⲟⲩⲧⲉ ϣⲁ ⲉⲛⲉϩ ⲁⲩⲱ ϣⲁ ⲉⲛⲉϩ ⲛⲉⲛⲉϩ ⲛⲧⲟϥ ⲡⲉⲧⲛⲁⲙⲟⲟⲛⲉ ⲙⲙⲟⲛ ϣⲁ ⲉⲛⲉϩ</ab>