1ⲉⲇⲁⲩⲉⲓⲇ ⲛⲇⲓⲕⲁⲓⲟⲥ ⲧⲉⲗⲏⲗ ⲙⲡϫⲟⲉⲓⲥ ⲉⲣⲉⲡⲉⲥⲙⲟⲩ ⲡⲣⲉⲡⲉⲓ ⲛⲛⲉⲧⲥⲟⲩⲧⲱⲛ</ab>
2ⲟⲩⲱⲛϩ ⲉⲃⲟⲗ ⲙⲡϫⲟⲉⲓⲥ ϩⲛ ⲟⲩⲕⲓⲑⲁⲣⲁ ⲯⲁⲗⲗⲉⲓ ⲉⲣⲟϥ ϩⲛ ⲟⲩⲯⲁⲗⲧⲏⲣⲓⲟⲛ ⲙⲙⲏⲧ ⲛⲕⲁⲡ</ab>
3ϫⲱ ⲉⲣⲟϥ ⲛⲟⲩϫⲱ ⲛⲃⲣⲣⲉ ⲯⲁⲗⲗⲉⲓ ⲉⲣⲟϥ ⲕⲁⲗⲱⲥ ϩⲛ ⲟⲩ ⲗⲟⲩⲗⲁⲓ</ab>
4ϫⲉ ⲡϣⲁϫⲉ ⲙⲡϫⲟⲉⲓⲥ ⲥⲟⲩⲧⲱⲛ ⲁⲩⲱ ⲛⲉϥϩⲃⲏⲩⲉ ⲧⲏⲣⲟⲩ ϣⲟⲟⲡ ϩⲛ ⲟⲩⲡⲓⲥⲧⲓⲥ</ab>
5ϥⲙⲉ ⲛⲧⲙⲛⲧⲛⲁ ⲙⲛ ⲡϩⲁⲡ ⲡⲕⲁϩ ⲧⲏⲣϥ ⲙⲉϩ ⲙⲡⲛⲁ ⲙⲡϫⲟⲉⲓⲥ</ab>
6ⲁⲩⲱ ϩⲙ ⲡⲉϥϣⲁϫⲉ ⲛⲧⲁⲙⲡⲏⲟⲩ ⲉⲧⲁϫⲣⲟ ⲁⲩⲱ ⲛⲉⲩϭⲟⲙ ⲧⲏⲣⲟⲩ ϩⲙ ⲡⲉⲡ︤ⲛ︦ⲁ︥ ⲛⲣⲱϥ</ab>
7ⲡⲉⲧⲥⲱⲟⲩϩ ⲛⲙⲙⲟⲟⲩ ⲛⲑⲁⲗⲁⲥⲥⲁ ⲛⲑⲉ ⲛⲛⲓⲁⲥⲕⲟⲥ ⲡⲉⲛⲧⲁϥⲕⲱ ⲛⲛⲛⲟⲩⲛ ϩⲛ ⲛⲉⲩⲁϩⲱⲱⲣ</ab>
8ⲙⲁⲣⲉⲡⲕⲁϩ ⲧⲏⲣϥ ⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲙⲁⲣⲉⲙⲁ ⲛⲓⲙ ⲥⲧⲱⲧ ϩⲏⲧϥ ⲙⲛ ⲟⲩⲟⲛ ⲛⲓⲙ ⲉⲧⲟⲩⲏϩ ⲛϩⲏⲧⲟⲩ</ab>
9ϫⲉ ⲛⲧⲟϥ ⲡⲉⲛⲧⲁϥϫⲟⲟⲥ ⲁⲩϣⲱⲡⲉ ⲛⲧⲟϥ ⲡⲉⲛⲧⲁϥϩⲱⲛ ⲁⲩⲱ ⲁⲩⲥⲱⲛⲧ</ab>
10ⲡϫⲟⲉⲓⲥ ⲛⲁϫⲱⲱⲣⲉ ⲉⲃⲟⲗ ⲙⲡϣⲟϫⲛⲉ ⲛⲛϩⲉⲑⲛⲟⲥ ϥⲛⲁⲁⲑⲉⲧⲉⲓ ⲛⲙⲙⲉⲉⲩⲉ ⲛⲛⲗⲁⲟⲥ ⲁⲩⲱ ϥⲛⲁⲁⲑⲉⲧⲉⲓ ⲛⲛϣⲟϫⲛⲉ ⲛⲛⲁⲣⲭⲱⲛ</ab>
11ⲡϣⲟϫⲛⲉ ⲛⲧⲟϥ ⲙⲡϫⲟⲉⲓⲥ ϣⲟⲟⲡ ϣⲁ ⲉⲛⲉϩ ⲙⲙⲉⲉⲩⲉ ⲙⲡⲉϥϩⲏⲧ ϫⲓⲛ ⲟⲩϫⲱⲙ ϣⲁ ⲟⲩϫⲱⲙ</ab>
12ⲛⲁⲓⲁⲧϥ ⲙⲡϩⲉⲑⲛⲟⲥ ⲉⲡϫⲟⲉⲓⲥ ⲡⲉ ⲡⲉϥⲛⲟⲩⲧⲉ ⲡⲗⲁⲟⲥ ⲉⲛⲧⲁⲡϫⲟⲉⲓⲥ ⲥⲟⲧⲡϥ ⲉⲩⲕⲗⲏⲣⲟⲛⲟⲙⲓⲁ ⲛⲁϥ</ab>
13ⲁⲡϫⲟⲉⲓⲥ ϭⲱϣⲧ ⲉⲃⲟⲗ ϩⲛ ⲧⲡⲉ ⲉⲛⲁⲩ ⲉⲛϣⲏⲣⲉ ⲧⲏⲣⲟⲩ ⲛⲛⲣⲱⲙⲉ</ab>
14ⲉⲃⲟⲗ ϩⲙ ⲡⲉϥⲙⲁ ⲛϣⲱⲡⲉ ⲉⲧⲥⲃⲧⲱⲧ ⲁϥϭⲱϣⲧ ⲉϫⲛ ⲛⲉⲧⲟⲩⲏϩ ⲧⲏⲣⲟⲩ ϩⲙ ⲡⲕⲁϩ</ab>
15ⲡⲉⲛⲧⲁϥⲡⲗⲁⲥⲥⲉ ⲙⲁⲩⲁⲁϥ ⲛⲛⲉⲩϩⲏⲧ ⲡⲉⲧⲉⲓⲙⲉ ⲉⲛⲉⲩϩⲃⲏⲩⲉ ⲧⲏⲣⲟⲩ</ab>
16ⲙⲛⲟⲩⲣⲣⲟ ⲛⲁⲟⲩϫⲁⲓ ⲉⲧⲃⲉ ⲧⲉϥⲛⲟϭ ⲛϭⲟⲙ ⲁⲩⲱ ⲙⲛⲟⲩϫⲱⲱⲣⲉ ⲛⲁⲛⲟⲩϩⲙ ϩⲙ ⲡⲁϣⲁⲓ ⲛⲧⲉϥⲛⲟⲙⲧⲉ</ab>
17ⲙⲛⲟⲩϩⲧⲟ ⲛϩⲟⲧⲉ ⲉⲩⲟⲩϫⲁⲓ ⲛϥⲛⲁⲟⲩϩⲙ ⲁⲛ ϩⲙ ⲡⲁϣⲁⲓ ⲛⲧⲉϥϭⲟⲙ</ab>
18ⲉⲓⲥ ⲛⲃⲁⲗ ⲙⲡϫⲟⲉⲓⲥ ϭⲱϣⲧ ⲉϫⲛ ⲛⲉⲧⲣϩⲟⲧⲉ ϩⲏⲧϥ ⲛⲉⲧⲕⲱ ⲛϩⲧⲏⲩ ⲉⲡⲉϥⲛⲁ</ab>
19ⲉⲧⲟⲩϫⲉ ⲛⲉⲩⲯⲩⲭⲏ ⲉⲃⲟⲗ ϩⲙ ⲡⲙⲟⲩ ⲁⲩⲱ ⲉⲥⲁⲛⲟⲩϣⲟⲩ ϩⲙ ⲡϩⲃⲱⲱⲛ</ab>
20ⲧⲉⲛⲯⲩⲭⲏ ⲛⲁϩⲩⲡⲟⲙⲉⲓⲛⲉ ⲉⲡϫⲟⲉⲓⲥ ϫⲉ ⲡⲉⲛⲃⲟⲏⲑⲟⲥ ⲡⲉ ⲁⲩⲱ ⲧⲉⲛⲛⲁϣⲧⲉ ⲡⲉ</ab>
21ϫⲉ ⲉⲣⲉⲡⲉⲛϩⲏⲧ ⲛⲁⲉⲩⲫⲣⲁⲛⲉ ⲛϩⲏⲧϥ ⲁⲩⲱ ⲛⲧⲁⲛⲛⲁϩⲧⲉ ϩⲙ ⲡⲉϥⲣⲁⲛ ⲉⲧⲟⲩⲁⲁⲃ</ab>
22ⲉⲣⲉⲡⲉⲕⲛⲁ ⲡϫⲟⲉⲓⲥ ϣⲱⲡⲉ ⲉϫⲱⲛ ⲕⲁⲧⲁ ⲑⲉ ⲉⲛⲧⲁⲛϩⲉⲗⲡⲓⲍⲉ ⲉⲣⲟⲕ</ab>