1ⲡⲁⲇⲁⲩⲉⲓⲇ ⲧⲁⲯⲩⲭⲏ ⲥⲙⲟⲩ ⲉⲡϫⲟⲉⲓⲥ ⲡϫⲟⲉⲓⲥ ⲡϫⲟⲉⲓⲥ ⲡⲁⲛⲟⲩⲧⲉ ⲁⲕⲣϩⲉ ⲛⲙⲛⲧⲛⲟϭ ⲉⲙⲁⲧⲉ</ab>
2ⲁⲕϯ ϩⲓⲱⲱⲕ ⲛⲟⲩⲟⲩⲱⲛϩ ⲉⲃⲟⲗ ⲙⲛⲟⲩⲥⲁ ⲡⲉⲛⲧⲁϥϭⲟⲟⲗⲉϥ ⲙⲡⲟⲩⲟⲉⲓⲛ ⲛⲑⲉ ⲛⲟⲩϩⲟⲉⲓⲧⲉ ⲁϥⲡⲉⲣϣⲧ ⲉⲃⲟⲗ ⲡⲉ ⲛⲑⲉ ⲛⲟⲩϩⲃⲱ</ab>
3ⲡⲉⲛⲧⲁϥⲃⲉϩⲛⲛⲉϥⲡⲉⲧϫⲟⲥⲉ ϩⲛ ⲟⲩⲙⲟⲟⲩ ⲉⲁϥⲕⲱ ⲛⲛⲉⲕⲗⲟⲟⲗⲉ ⲉⲧⲣⲉϥⲁⲗⲉ ⲉϩⲣⲁⲓ ⲉϫⲱⲟⲩ ⲡⲉⲧⲙⲟⲟϣⲉ ⲉϫⲛ ⲛⲧⲛϩ ⲛⲛⲧⲏⲩ</ab>
4ⲡⲉⲧⲧⲁⲙⲓⲟ ⲛⲛⲉϥⲁⲅⲅⲉⲗⲟⲥ ⲙ ⲁⲩⲱ ⲛⲉϥⲗⲉⲓⲧⲟⲩⲣⲅⲟⲥ ⲛϣⲁϩ ⲛⲥⲁⲧⲉ</ab>
5ⲁϥⲥⲙⲛⲥⲛⲧⲉ ⲙⲡⲕⲁϩ ϩⲛ ⲟⲩⲱⲣϫ ⲛϥⲛⲁⲕⲓⲙ ⲁⲛ ϣⲁ ⲉⲛⲉϩ ⲛⲉⲛⲉϩ</ab>
6ⲁϥϭⲟⲟⲗⲉϥ ⲙⲡⲛⲟⲩⲛ ⲛⲑⲉ ⲛⲟⲩⲣϣⲱⲛ ⲙⲙⲟⲟⲩ ⲛⲁⲁϩⲉⲣⲁⲧⲟⲩ ϩⲓϫⲛ ⲛⲧⲟⲟⲩ</ab>
7ⲥⲉⲛⲁⲡⲱⲧ ⲉⲃⲟⲗ ⲛⲧⲉⲕⲉⲡⲓⲧιⲙⲓⲁ ⲛⲥⲉⲣϭⲱⲃ ⲙⲡⲉϩⲣⲟⲟⲩ ⲛⲛⲉⲕϩⲣⲟⲩⲃⲁⲓ</ab>
8ⲛⲧⲟⲩⲉⲓⲏ ϫⲟⲥⲉ ⲛⲥⲱϣⲉ ϩⲟⲃⲉ ϩⲛ ⲛⲉⲩⲙⲁ ⲉⲛⲧⲁⲕⲥⲙⲛⲥⲛⲧⲉ ⲙⲙⲟⲟⲩ ⲛⲁⲩ</ab>
9ⲁⲕⲕⲱ ⲛⲁⲩ ⲛⲟⲩⲧⲟϣ ⲛⲛⲉⲩⲉϣ ⲥⲁⲁⲧϥ ⲟⲩⲇⲉ ⲛⲛⲉⲩⲉϣⲕⲟⲧⲟⲩ ⲉϩⲃⲥⲡⲕⲁϩ</ab>
10ⲡⲉⲧϫⲟⲟⲩⲛ ⲙⲡⲏⲅⲏ ϩⲛ ⲛⲉⲓⲁ ⲙⲙⲟⲟⲩ ⲛⲁⲙⲟⲟϣⲉ ϩⲛ ⲧⲙⲏⲧⲉ ⲛⲛⲧⲟⲟⲩ</ab>
11ⲛⲥⲉⲧⲥⲟ ⲛⲛⲉⲑⲏⲣⲓⲟⲛ ⲧⲏⲣⲟⲩ ⲛⲧⲥⲱϣⲉ ⲛⲉⲓⲁϩⲟⲟⲩⲧ ϣⲁⲩϫⲓⲧⲟⲩ ⲉⲡⲉⲩⲉⲓⲃⲉ</ab>
12ϣⲁⲩⲟⲩⲱϩ ϩⲓϫⲱⲟⲩ ⲛϭⲓ ⲛϩⲁⲗⲁⲧⲉ ⲛⲧⲡⲉ ϣⲁⲩϯ ⲛⲧⲉⲩⲥⲙⲏ ⲛⲧⲙⲏⲧⲉ ⲛⲙⲡⲉⲧⲣⲁ</ab>
13ⲡⲉⲧⲧⲥⲟ ⲛⲛⲧⲟⲩⲉⲓⲏ ⲉⲃⲟⲗ ϩⲛ ⲛⲉϥⲡⲉⲧϫⲟⲥⲉ ⲡⲕⲁϩ ⲛⲁⲙⲟⲩϩ ⲉⲃⲟⲗ ϩⲛ ⲛⲕⲁⲣⲡⲟⲥ ⲛⲛⲉϥϩⲃⲏⲩⲉ</ab>
14ⲡⲉⲧϯⲟⲩⲱ ⲛⲟⲩⲭⲟⲣⲧⲟⲥ ⲛⲛⲧⲃⲛⲟⲟⲩⲉ ⲟⲩⲟⲩⲟⲧⲟⲩⲉⲧ ⲛⲧⲙⲛⲧϩⲙϩⲁⲗ ⲛⲛⲣⲱⲙⲉ ⲉⲧⲁⲩⲉⲟⲉⲓⲕ ⲉⲃⲟⲗ ϩⲙ ⲡⲕⲁϩ</ab>
15ⲁⲩⲱ ⲡⲏⲣⲡⲉ ⲉⲩⲫⲣⲁⲛⲉ ⲙⲡϩⲏⲧ ⲙⲡⲣⲱⲙⲉ ⲉⲧⲣⲉⲡⲉϥϩⲟ ⲟⲩⲣⲟⲧ ϩⲛ ⲟⲩⲛⲉϩ ⲡⲟⲉⲓⲕ ⲡⲉⲧⲧⲁϫⲣⲟ ⲙⲡϩⲏⲧ ⲙⲡⲣⲱⲙⲉ</ab>
16ⲥⲉⲛⲁⲥⲉⲓ ⲛϭⲓ ⲛϣⲏⲛ ⲛⲧⲥⲱϣⲉ ⲛⲕⲉⲇⲣⲟⲥ ⲙⲡⲗⲓⲃⲁⲛⲟⲥ ⲉⲛⲧⲁⲕⲧⲟϭⲟⲩ</ab>
17ⲉⲣⲉⲛϫⲁϫ ⲙⲟⲥⲉ ⲛϩⲏⲧⲟⲩ ⲡⲏⲓ ⲙⲡⲉⲗϭⲱⲃ ϫⲟⲥⲉ ⲉⲣⲟⲟⲩ</ab>
18ⲁⲕϯ ⲛⲧⲟⲟⲩ ⲉⲧϫⲟⲥⲉ ⲛⲛⲓⲉⲉⲓⲟⲩⲗ ⲙⲡⲉⲧⲣⲁ ⲙⲙⲁ ⲙⲡⲱⲧ ⲛⲛⲥⲁⲣⲁϭⲱⲟⲩϣ</ab>
19ⲁⲕⲕⲁⲡⲟⲟϩ ⲉϩⲉⲛⲟⲩⲟⲉⲓϣ ⲡⲣⲏ ⲁϥⲥⲟⲩⲛⲡⲉϥⲙⲁ ⲛϩⲱⲧⲡ</ab>
20ⲁⲕⲕⲁⲡⲕⲁⲕⲉ ⲁⲧⲉⲩϣⲏ ϣⲱⲡⲉ ⲥⲉⲛⲁⲙⲟⲟϣⲉ ⲛϩⲏⲧⲥ ⲛϭⲓ ⲛⲉⲑⲏⲣⲓⲟⲛ ⲧⲏⲣⲟⲩ ⲛⲧⲥⲱϣⲉ</ab>
21ⲙⲙⲁⲥ ⲙⲙⲟⲩⲓ ⲉⲩⲗϩⲏⲙ ⲉⲧⲱⲣⲡ ⲉϣⲓⲛⲉ ⲛⲥⲁⲧⲉⲩϩⲣⲉ ⲉⲃⲟⲗ ϩⲓⲧⲙ ⲡⲛⲟⲩⲧⲉ</ab>
22ⲁⲡⲣⲏ ϣⲁ ⲁⲩⲥⲱⲟⲩϩ ⲉϩⲟⲩⲛ ⲁⲩⲛⲕⲟⲧⲕ ϩⲛ ⲛⲉⲩⲃⲏⲃ ⲁⲡⲣⲱⲙⲉ ⲉⲓ ⲉⲃⲟⲗ ⲉⲡⲉϥϩⲱⲃ</ab>
23ⲁⲩⲱ ⲧⲉϥⲉⲣⲅⲁⲥⲓⲁ ϣⲁ ⲡⲛⲁⲩ ⲛⲣⲟⲩϩⲉ</ab>
24ⲛⲑⲉ ⲉⲛⲧⲁⲛⲉⲕϩⲃⲏⲩⲉ ⲁⲓⲁⲓ ⲡϫⲟⲉⲓⲥ ⲁⲕⲧⲁⲙⲟⲟⲩ ⲧⲏⲣⲟⲩ ϩⲛ ⲟⲩⲥⲟⲫⲓⲁ ⲁⲡⲕⲁϩ ⲙⲟⲩϩ ⲉⲃⲟⲗ ϩⲙ ⲡⲉⲕⲥⲱⲛⲧ</ab>
25ⲧⲉⲑⲁⲗⲁⲥⲥⲁ ϯⲛⲟϭ ⲉⲧⲟⲩⲟϣⲥ ⲉⲣⲉⲛϫⲁⲧϥⲉ ⲛϩⲏⲧⲥ ⲉⲧⲉⲙⲛⲧⲟⲩⲏⲡⲉ ⲛⲓⲕⲟⲩⲓ ⲉⲧⲟⲛϩ ⲙⲛ ⲛⲓⲛⲟϭ</ab>
26ⲉⲣⲉⲛⲉϫⲏⲩ ⲥϭⲏⲣ ⲛϩⲏⲧⲥ ⲉϥⲙⲙⲁⲩ ⲛϭⲓ ⲡⲉⲇⲣⲁⲕⲱⲛ ⲡⲁⲓ ⲉⲛⲧⲁⲕⲡⲗⲁⲥⲥⲉ ⲙⲙⲟϥ ⲉⲥⲱⲃⲉ ⲙⲙⲟϥ</ab>
27ⲉⲩϭⲱϣⲧ ⲉⲃⲟⲗ ϩⲏⲧⲕ ⲧⲏⲣⲟⲩ ⲉϯⲧⲉϩⲣⲉ ⲛⲁⲩ ⲙⲡⲉⲩⲟⲩⲟⲉⲓϣ</ab>
28ⲉⲕϣⲁⲛϯ ⲛⲁⲩ ⲥⲉⲛⲁⲥⲱⲟⲩϩ ⲉϩⲟⲩⲛ ⲉⲕϣⲁⲛⲟⲩⲱⲛ ⲛⲧⲉⲕϭⲓϫ ⲥⲉⲛⲁⲥⲉⲓ ⲧⲏⲣⲟⲩ ϩⲛ ⲧⲉⲕⲙⲛⲧⲭⲣⲏⲥⲧⲟⲥ</ab>
29ⲉⲕϣⲁⲛⲕⲧⲟ ⲉⲃⲟⲗ ⲙⲡⲉⲕϩⲟ ⲥⲉⲛⲁϣⲧⲟⲣⲧⲣ ⲕⲛⲁϥⲓ ⲙⲡⲉⲩⲡ︤ⲛ︦ⲁ︥ ⲛⲥⲉⲱϫⲛ ⲛⲥⲉⲕⲟⲧⲟⲩ ⲉⲡⲉⲩⲕⲁϩ</ab>
30ⲕⲛⲁⲧⲛⲛⲟⲟⲩ ⲙⲡⲉⲕⲡⲛⲉⲩⲙⲁ ⲛⲥⲉⲥⲱⲛⲧ ⲛⲅⲣⲡϩⲟ ⲙⲡⲕⲁϩ ⲛⲃⲣⲣⲉ ⲛⲕⲉⲥⲟⲡ</ab>
31ⲙⲁⲣⲉⲡⲉⲟⲟⲩ ⲙⲡϫⲟⲉⲓⲥ ϣⲱⲡⲉ ϣⲁ ⲉⲛⲉϩ ⲡϫⲟⲉⲓⲥ ⲛⲁⲉⲩⲫⲣⲁⲛⲉ ⲉϫⲛ ⲛⲉϥϩⲃⲏⲩⲉ</ab>
32ⲡⲉⲧϭⲱϣⲧ ⲉϫⲙ ⲡⲕⲁϩ ⲉⲧⲣⲉϥⲥⲧⲱⲧ ⲡⲉϣⲁϥϫⲱϩ ⲉⲛⲧⲟⲟⲩ ⲛⲥⲉϯⲕⲁⲡⲛⲟⲥ</ab>
33ϯⲛⲁϫⲱ ⲉⲡϫⲟⲉⲓⲥ ϩⲙ ⲡⲁⲱⲛϩ ϯⲛⲁⲯⲁⲗⲗⲉⲓ ⲉⲡⲁⲛⲟⲩⲧⲉ ϩⲟⲥⲟⲛ ϯϣⲟⲟⲡ</ab>
34ⲡⲁϣⲁϫⲉ ⲛⲁϣⲱⲡⲉ ⲉϥϩⲟⲗϭ ⲛⲁϥ ⲁⲛⲟⲕ ⲇⲉ ϯⲛⲁⲉⲩⲫⲣⲁⲛⲉ ⲉϫⲙ ⲡϫⲟⲉⲓⲥ ⲉⲣⲉⲛⲣⲉϥⲣⲛⲟⲃⲉ ⲱϫⲛ ϩⲓϫⲙ ⲡⲕⲁϩ</ab>
35ⲁⲩⲱ ⲛⲁⲛⲟⲙⲟⲥ ϩⲱⲥⲧⲉ ⲉⲧⲙⲧⲣⲉⲩϣⲱⲡⲉ ⲧⲁⲯⲩⲭⲏ ⲥⲙⲟⲩ ⲉⲡϫⲟⲉⲓⲥ</ab>
36