1ⲡⲁⲇⲁⲩⲉⲓⲇ ⲧⲁⲯⲩⲭⲏ ⲥⲙⲟⲩ ⲉⲡϫⲟⲉⲓⲥ ⲁⲩⲱ ⲛⲉⲧϩⲙ ⲡⲁⲥⲁ ⲛϩⲟⲩⲛ ⲧⲏⲣⲟⲩ ⲥⲙⲟⲩ ⲉⲡⲉϥⲣⲁⲛ ⲉⲧⲟⲩⲁⲁⲃ</ab>
2ⲧⲁⲯⲩⲭⲏ ⲥⲙⲟⲩ ⲉⲡϫⲟⲉⲓⲥ ⲁⲩⲱ ⲙⲡⲣⲣⲡⲱⲃϣ ⲛⲛⲉϥⲧⲱⲱⲃⲉ ⲧⲏⲣⲟⲩ</ab>
3ⲡⲉⲧⲕⲱ ⲛⲉ ⲉⲃⲟⲗ ⲛⲛⲟⲩⲁⲛⲟⲙⲓⲁ ⲧⲏⲣⲟⲩ ⲡⲉⲧⲧⲁⲗϭⲟ ⲛⲛⲟⲩϣⲱⲛⲉ ⲧⲏⲣⲟⲩ</ab>
4ⲡⲉⲧⲥⲱⲧⲉ ⲙⲡⲟⲩⲱⲛϩ ⲉⲃⲟⲗ ϩⲙ ⲡⲧⲁⲕⲟ ⲡⲉⲧϯ ⲛⲟⲩⲕⲗⲟⲙ ⲉϫⲱ ⲛⲛⲁ ϩⲓ ⲙⲛⲧϣⲁⲛϩⲧⲏϥ</ab>
5ⲡⲉⲧⲧⲥⲓⲟ ⲙⲡⲟⲩⲟⲩⲱϣ ⲛⲁⲅⲁⲑⲟⲛ ⲧⲟⲩⲙⲛⲧⲕⲟⲩⲓ ⲛⲁⲣⲃⲣⲣⲉ ⲛⲑⲉ ⲛⲧⲁⲟⲩⲁⲉⲧⲟⲥ</ab>
6ⲡϫⲟⲉⲓⲥ ⲡⲉⲧⲉⲓⲣⲉ ⲛϩⲉⲛⲙⲛⲧⲛⲁ ⲁⲩⲱ ⲡϩⲁⲡ ⲡⲉ ⲛⲟⲩⲟⲛ ⲛⲓⲙ ⲉⲧϫⲏⲩ ⲛϭⲟⲛⲥ</ab>
7ⲁϥⲟⲩⲉⲛϩⲛⲉϥϩⲓⲟⲟⲩⲉ ⲉⲙⲱⲩⲥⲏⲥ ⲛⲉϥⲟⲩⲱϣ ⲉⲛϣⲏⲣⲉ ⲙⲡⲓ︤ⲏ︦ⲗ︥</ab>
8ⲟⲩϣⲁⲛϩⲧⲏϥ ⲛⲛⲁⲏⲧ ⲡⲉ ⲡϫⲟⲉⲓⲥ ⲟⲩϩⲁⲣϣϩⲏⲧ ⲡⲉ ⲉⲛⲁϣⲉⲡⲉϥⲛⲁ</ab>
9ⲛϥⲛⲁⲛⲟⲩϭⲥ ⲁⲛ ϣⲁⲃⲟⲗ ⲟⲩⲇⲉ ⲛϥⲛⲁϭⲱⲛⲧ ⲁⲛ ϣⲁ ⲉⲛⲉϩ</ab>
10ⲛⲧⲁϥⲉⲓⲣⲉ ⲛⲁⲛ ⲁⲛ ⲕⲁⲧⲁ ⲛⲉⲛⲛⲟⲃⲉ ⲟⲩⲇⲉ ⲛⲧⲁϥⲧⲱⲱⲃⲉ ⲛⲁⲛ ⲁⲛ ⲕⲁⲧⲁ ⲛⲉⲛⲁⲛⲟⲙⲓⲁ</ab>
11ϫⲉ ⲕⲁⲧⲁ ⲡϫⲓⲥⲉ ⲛⲧⲡⲉ ⲉⲃⲟⲗ ϩⲙ ⲡⲕⲁϩ ⲁⲡϫⲟⲉⲓⲥ ⲧⲁϫⲣⲟⲡⲉϥⲛⲁ ⲉϫⲛ ⲛⲉⲧⲣϩⲟⲧⲉ ϩⲏⲧϥ</ab>
12ⲕⲁⲧⲁ ⲑⲉ ⲉⲧⲉⲣⲉⲡⲉⲉⲓⲃⲧ ⲟⲩⲏⲩ ⲙⲡⲉⲙⲛⲧ ⲁϥⲧⲣⲉⲛⲉⲛⲁⲛⲟⲙⲓⲁ ⲟⲩⲉ ⲛⲥⲁⲃⲟⲗ ⲙⲙⲟⲛ</ab>
13ⲛⲑⲉ ⲉϣⲁⲣⲉⲟⲩⲉⲓⲱⲧ ϣⲛϩⲧⲏϥ ϩⲁ ⲛⲉϥϣⲏⲣⲉ ⲁⲡϫⲟⲉⲓⲥ ϣⲛϩⲧⲏϥ ϩⲁ ⲛⲉⲧⲣϩⲟⲧⲉ ϩⲏⲧϥ</ab>
14ϫⲉ ⲛⲧⲟϥ ⲁϥⲉⲓⲙⲉ ⲉⲡⲉⲛⲡⲗⲁⲥⲙⲁ ⲁⲣⲓⲡⲙⲉⲉⲩⲉ ⲡϫⲟⲉⲓⲥ ϫⲉ ⲁⲛⲟⲛ ⲟⲩⲕⲁϩ</ab>
15ⲁⲩⲱ ⲛⲑⲉ ⲛⲟⲩⲭⲟⲣⲧⲟⲥ ⲛⲉ ⲛⲉϩⲟⲟⲩ ⲙⲡⲣⲱⲙⲉ ⲛⲑⲉ ⲛⲟⲩϩⲣⲏⲣⲉ ⲛⲧⲥⲱϣⲉ ⲧⲁⲓ ⲧⲉ ⲑⲉ ⲉⲧϥⲛⲁϣⲟⲟⲩⲉ</ab>
16ϫⲉ ⲁⲡⲉϥⲡ︤ⲛ︦ⲁ︥ ⲉⲓ ⲉⲃⲟⲗ ⲛϩⲏⲧϥ ⲁⲩⲱ ⲙⲉϥϣⲱⲡⲉ ⲁⲩⲱ ⲙⲉϥⲧⲥⲧⲟϥ ⲉⲥⲟⲩ ⲙⲡⲉϥⲙⲁ</ab>
17ⲡⲛⲁ ⲇⲉ ⲙⲡϫⲟⲉⲓⲥ ϫⲓⲛ ⲉⲛⲉϩ ϣⲁ ⲉⲛⲉϩ ⲡⲉ ⲉϫⲛ ⲛⲉⲧⲣϩⲟⲧⲉ ϩⲏⲧϥ</ab>
18ⲁⲩⲱ ⲧⲉϥⲇⲓⲕⲁⲓⲟⲥⲩⲛⲏ ⲉϫⲛ ⲛϣⲏⲣⲉ ⲛⲛϣⲏⲣⲉ ⲛⲛⲉⲧϩⲁⲣⲉϩ ⲉⲧⲉϥⲇⲓⲁⲑⲏⲕⲏ ⲁⲩⲱ ⲉⲧⲉⲓⲣⲉ ⲙⲡⲙⲉⲉⲩⲉ ⲛⲛⲉϥⲉⲛⲧⲟⲗⲏ ⲉⲁⲁⲩ</ab>
19ⲁⲡϫⲟⲉⲓⲥ ⲥⲃⲧⲉⲡⲉϥⲑⲣⲟⲛⲟⲥ ϩⲛ ⲧⲡⲉ ⲁⲩⲱ ⲧⲉϥⲙⲛⲧⲉⲣⲟ ⲟ ⲛϫⲟⲉⲓⲥ ⲉϫⲛ ⲟⲩⲟⲛ ⲛⲓⲙ</ab>
20ⲥⲙⲟⲩ ⲉⲡϫⲟⲉⲓⲥ ⲛⲉϥⲁⲅⲅⲉⲗⲟⲥ ⲧⲏⲣⲟⲩ ⲛϫⲱⲱⲣⲉ ϩⲛ ⲧⲉⲩϭⲟⲙ ⲉⲧⲉⲓⲣⲉ ⲙⲡⲉϥϣⲁϫⲉ ⲉⲥⲱⲧⲙ ⲉⲡⲉϩⲣⲟⲟⲩ ⲛⲛⲉϥϣⲁϫⲉ</ab>
21ⲥⲙⲟⲩ ⲉⲡϫⲟⲉⲓⲥ ⲛⲉϥϭⲟⲙ ⲧⲏⲣⲟⲩ ⲛⲉϥϣⲙϣⲓⲧ ⲉⲧⲉⲓⲣⲉ ⲙⲡⲉϥⲟⲩⲱϣ</ab>
22ⲥⲙⲟⲩ ⲉⲡϫⲟⲉⲓⲥ ⲛⲉϥϩⲃⲏⲩⲉ ⲧⲏⲣⲟⲩ ϩⲙ ⲙⲁ ⲛⲓⲙ ⲛⲧⲉϥⲙⲛⲧϫⲟⲉⲓⲥ ⲧⲁⲯⲩⲭⲏ ⲥⲙⲟⲩ ⲉⲡϫⲟⲉⲓⲥ</ab>