1Lelo Mkulu Nguluwi nakamlajiza mloli Natani kwa Daudi. Natani nakaluta kwa Daudi, nakamlonjela, “Nakwali na walume weli kuli muji umwe, yumwe nayali na lufufu lwinji na yunji nayali mzunwa.
2Yula yawele na lufufu nayali na ming'holo minji na misenga minji.
3Ila yula mzunwa nayali na ing'holo lyana limwe idala, liwele yaligulile. Nakalilolela goya nalyo nalikula haluga ha heye hamwe na wana wa heye. Nakalipa chilyo lila ing'holo lyana, chilyo chichila kota cha heye na kunwa mazi kwa chizombe cha heye, naye kahi nayali yolibatilila mmhambaga. Lila ing'holo lyana nalyali kota mhinza kwa yula mzunwa.
4Zuwa limwe yula yawele na lufufu nayali na mjenzi. Yula yawele na lufufu haganile kuhola limwe lya ing'holo lya heye yuye ama isenga lya heye, yalidumule singo kwa chiwalo cha mjenzi wa heye, ila nakaluta kulihola ing'holo lyana lya yula mzunwa. Nakalidumula singo na kuliteleka kwa chiwalo cha mjenzi wa heye.”
5Daudi loyahuliche ago, nakamzudila lukami yula yawele na lufufu. Nakamlonjela mloli Natani, “Ndangilaha kwa Mkulu Nguluwi yawele mkomu kota munhu yaditile mbuli ayo kanguganigwa kubagama!
6Kahi kanguganigwa kumhilusila yula mzunwa ming'holo myana jine kwa chiwalo cha lila ing'holo lyana limwe yaliholile, kwa vila nakadita mbuli yihile na nayali hela isungu.”
7Natani nakamlonjela Daudi, “Hegwe ndo yula munhu! Lelo Mkulu Nguluwi, Nguluwi wa Isilaeli, kangulonga hino, ‘Heni nandikubakaliza mafuta leka uwe mndewa kwa wanhu wa Isilaeli na kukulohola kuli moko ga Sauli.
8Ndikupa ng'handa ya mkulu wa hegwe na wache wa heye wawe wa hegwe. Ndikupa kahi wanhu wa Isilaeli na wa Yuda uwalongoze. Kota nagali mado hela kwa hegwe ndigana ndikupe mala keli kusinda ago.
9Lekachoni lelo nakulemwela kuhulichiza ulonzi wa heni Mkulu Nguluwi, nakudita wihe awu hali heni? Nakulajiza Uliya Mhiti, yakopoligwe kwa ipanga na kumhola mche wake kuwa mche wako. Nakwambuza Waamoni wamkopole Uliya kuli ngondo.
10Lelo kwa vila nakumbeza na kumhola mche wa Uliya, Mhiti na kuwa mchewako, kubagama kwa ipanga kwa wang'holozo kolutilila mazuwa gose.’
11Uhulichize, Mkulu Nguluwi kangulonga, ‘Lole, ndochigala wihe kwa hegwe kulawa kuli ivyazi lya hegwe. Ndowahola wache wa hegwe hali meho ga hegwe na kumha munhu wa behi na hegwe, naye kowasa na hewo honhu hazelu.
12Hegwe nakudita mbuli ayi kwa uviso, ila heni ndogadita aga hali Waisilaeli weng'ha hazelu.’ ”
13Lelo Daudi nakamlonjela Natani, “Nandimditila gehile Mkulu Nguluwi.” Natani nakamlonjela, “Mkulu Nguluwi nakosa gehile ga hegwe, nagwe haubagama hebu.
14Ila kwa vila nakumbeza ng'hatu Mkulu Nguluwi, mwana hoyopondigwa sambi, kobagama.”
15Hamba Natani nakahiluka haluga hake.
16Daudi nakamlanda Nguluwi kwa chiwalo cha mwana wa heye. Nakesela kulya na nakawa yowasa hasi nechilo yeng'ha.
17Vilongozi wa heye nawema hafungo ha heye na kujeza kumwinula, ila henuche ne kulya.
18Kuli zuwa lya saba, mwana ayo nakabagama, ila vitumagwa wa Daudi nawadumba kumlonjela. Nawelonjela hewo kwa hewo, nawalonga, “Mwana loyawele yang'hali mkomu, Daudi hatuhuliche hetwe. Ndaze, tomlonjela heye kota mwanage kabagama? Hanji kochilumiza!”
19Daudi nakawona vitumagwa wa heye wopwepwa, nakavizela kota mwanage nakabagama. Ahyo nakawauza, “Ndaze, mwana nakabagama?” Nawo wamwidichila, “Ena, nakabagama.”
20Daudi nakenuka na kuluta koga na kuwika goya mnvili na kuvala. Nakaluta kuli ihema lya Mkulu Nguluwi na kumfugamila. Loyahiluche haluga hake, nakalanda chinhu cha kulya. Vitumagwa lowamigalile chilyo, nakalya.
21Vitumagwa wa heye nawalonga, “Kwangukola choni? Nakuluta ne kulya na kumlilila mwanago vyoyawele mkomu! Ila sambi nakabagama, nakwinuka na kulya.”
22Daudi nakedichila, “Loyawele yang'hali mkomu nyesela kulya na kulila kwa vila nandijesa, hanji Mkulu Nguluwi kowa na isungu na heni na kumleka mwana wa heni yawe mkomu.”
23Ila sambi nakabagama lekachoni nyesele kulya? Siweza kumhilusa kahi! Zuwa linji ndochilumba naye kuli wabagame, ila hohiluka kwa heni kahi!
24Daudi nakamhembuliza mchewake Batisheba na kuwasa naye. Hamba nakaponda mwana yunji msongolo, nakamchema Solomoni. Mkulu Nguluwi nakamgana Solomoni,
25nakamlajiza mloli Natani kumlonjela Daudi yamcheme mwana ayo Yedidiya12:25 Yedidiya Kwa Chiebulaniya ulonzi awu una mana ya mganwa wa Mkulu Nguluwi. kwa vila Mkulu Nguluwi nakamgana.
26Mhela Yoabu loyawele kuli isi ya Waamoni, nakauvaba muji wa Laba na kuihola ngome ya undewa.
27Nakalajiza usenga kumlonjela Daudi, “Nandiuvaba muji na kuihola ngome ilingwamila honhu halingulavya mazi.
28Uwakungajize wamizi hamwe hamba uzungulute muji na kuuhola. Wone haiwele ahyo, londiuhola ndotogolwa kwa kuuhola muji awo.”
29Daudi nakakungajiza wamizi hamwe na kuuvaba muji wa Laba na kuuhola
30na kuhola kofia ya mndewa kulawa kuli limalukolo lya mlungu wa hewo Milikomu12:30 mlungu wa hewo Milikomu Kwa Chiebulaniya ulonzi awu, kota vyowandichigwe, woweza kuwa “mndewa wa hewo” ama “Milikomu.”. Kofia ayo naigongomanyigwa kwa kilo makumi gadatu na zine za zahabu, nakwali na libwe lya sendi nyinji kwa chiwalo cha kunoliga, kuchanya mwa kofia ayo. Daudi nakawika libwe alyo lya sendi nyinji kuli kofia ya heye. Hamba wamizi wa Daudi nawahola vinhu viyage vya sendi nyinji.
31Daudi nakawalavya wanhu wawele amo, nakawawika wakole mijito kwa misumeno na sululu za chuma na miwago, hamba nakawawika hewo wakole mijito ja kugongomanya mitufali. Nakadita hihyo kwa miji jeng'ha ja Waamoni. Hamba Daudi na wanhu wa heye weng'ha, nawahiluka Yelusalemu.