2 Kings 2

¹Mkulu Nguluwi loyawele habehi kumhola Eliya na kumhilika kilanga kwa chivuluvumbi, Eliya na Elisha nawali mnzila wolawa Giligali.

²Eliya nakamlonjela Elisha, “Wikalise hano, Mkulu Nguluwi nakandajiza ndute Beteli.”

³Chilundo cha waloli wawele ako Beteli, nachiluta kwa Elisha na kumuuza, “Ndaze, kwanguvizela kota Mkulu Nguluwi komhola mkulu wa hegwe lehano?” Elisha nakawedichila, “Ena, ndanguvizela, ila mleche kulonga kuwala mbuli ayo.”

⁴Hamba Eliya nakamlonjela Elisha, “Wikale hano, Mkulu Nguluwi nakandajiza ndute Yeliko.” Elisha nakedichila, “Ndangilaha kota Mkulu Nguluwi vyoyalingikala na kota hegwe vyoulingikala, sikuleka.” Ahyo nawaluta hamwe mbaka Yeliko.

⁵Chilundo cha waloli chiwele ako Yeliko, nachiluta kwa Elisha na kumuuza, “Ndaze, kwanguvizela kota Mkulu Nguluwi komhola mkulu wa hegwe lehano?” Elisha nakawedichila, “Ena, ndanguvizela, ila mleche kulonga kuwala mbuli ayo.”

⁶Hamba Eliya nakamlonjela Elisha, “Wikale hano, Mkulu Nguluwi nakandajiza ndute kuli lwanda lwa Yolodani.” Elisha nakedichila, “Ndangilaha kota Mkulu Nguluwi vyoyalingikala na kota hegwe vyoulingikala, sikuleka.” Ahyo nawaluta hamwe.

⁷Waloli makumi gahano wawawinzile Eliya na Elisha kulawa Yeliko, nawema kutali na kuwalola Eliya na Elisha vyowawele woluta kuli lwanda lwa Yolodani.

⁸Eliya nakavula ivalo lya heye, nakalibota na kugatowa mazi. Mazi nagebagula kuli honhu heli, kumoso na kudilo, Eliya na Elisha nawaloka kuli honhu hakalile.

⁹Lowafichile kumwambu, Eliya nakamuuza Elisha, “Ndonjele, ndikuditile choni nding'hali kusigwa kulawa kwa hegwe?” Elisha nakamwidichila, “Ndangulanda kuhalila muhe kota woupegwe.”

¹⁰Eliya nakedichila, “Nakulanda mbuli ing'ang'ale. Ila wone kombona mhela londiwa ndikusigwa kulawa kwa hegwe, kopegwa. Wone haiwa ahyo, huweza kupegwa.”

¹¹Lowawele wojenda hamwe na kulongasa, baho du naulawila mutuka wa chiluli na falasi wa chiluli, navilawila na kuwabagula, Eliya nakakwina na kuluta kilanga kuli chivuluvumbi.

¹²Elisha nakayona mbuli ayo, nakatowa iyowe, “Mhaza wa heni! Mhaza wa heni! Mituka ja Isilaeli na wakwina falasi wa heye.” Lelo, Elisha hamuwene kahi Eliya. Hamba kwa masinzo Elisha nakebata mivalo ja heye nakajidadula kuli vihande vili.

¹³Hamba nakalokota ikoti lya Eliya ligwile, nakahiluka na kwima hafungo ha lwanda lwa Yolodani.

¹⁴Nakagatowa mazi kwa lila ikoti lya Eliya youza, “Kakohi lelo Mkulu Nguluwi, Nguluwi wa Eliya?” Elisha loyagatowile mazi, gala mazi nagebagula kumoso na kudilo, naye nakaloka.

¹⁵Wala waloli makumi gahano kulawa Yeliko lowamuwene, nawalonga, “Muhe wa Eliya wa kwa Elisha.” Lelo nawaluta kumbochela, nawafugama na kinamiza mbaka hanyi hali heye.

¹⁶Nawamlonjela, “Hetwe vitumagwa wa hegwe twanawo wanhu makumi gahano wawele na mong'ho. Wakundize walute kumpala mkulu wa hegwe. Hanji muhe wa Mkulu Nguluwi naumhola na kumuwika kuli chidunda chimwenga ama kuli ibindi limwenga.” Elisha nakedichila, “Hebu, mleche kuwalajiza.”

¹⁷Ila nawalutilila kumlonjela mbaka nakona soni kuwalemela. Ahyo nakawalonjela, “Muwalajize.” Ahyo nawawalajiza wanhu makumi gahano, nawampala chila honhu kwa mazuwa gadatu, ila hawampatile.

¹⁸Lowahiluche kwa Elisha, yawele nayali yochikala ako Yeliko, Elisha nakawauza, “Ndaze, siwalonjele mleche kuluta?”

¹⁹Hamba wanhu wa muji wa Yeliko nawaluta kwa Elisha na kumlonjela, “Ulole mkulu wa hetwe, honhu hawele muji awu nauzenjigwa ndo hanojile kota vyoulingona, ila mazi gake ndo geha na isi yahela mboto.”

²⁰Elisha nakawalonjela, “Mngalile chisaye chinyale na muwiche mwino mgati mwake.” Ahyo nawamhilichila.

²¹Hamba Elisha nakaluta kuli nzasa ya mazi na kuutoza awo mwino mgati mwake na kulonga, “Mkulu Nguluwi kangulonga hino, ‘Nandigadita mazi aga gawe ganojile. Hagoweza kuwambuza wanhu kubagama ne isi kuleka kuwa na mboto.’ ”

²²Mazi ago nagawa ganojile kulawa mhela wula, kwa kiwhana na ulonzi wa Elisha.

²³Kulawa ako Yeliko, Elisha nakaluta Beteli. Loyawele mnzila, wasongolo wamwenga nawalawa mujini nawaluka kumzomela wolonga, “Wuche hegwe uwele na chibuje! Wuche hegwe uwele na chibuje!”

²⁴Elisha nakagalamka, nakawalola na kuwapanjila kwa itagwa lya Mkulu Nguluwi. Hamba midubu mili midala najilawa kisolo na kuwadadula wasongolo makumi gane na weli hali hewo.

²⁵Elisha nakalutilila na majendo ga heye mbaka kuli chidunda cha Kalimeli na kulawa ako nakahiluka Samaliya.