1Kuli mwaka wa saba wa ulongozi wa Yehu, mndewa wa Isilaeli, Yoashi nakaluka kulongoza Yuda ako Yelusalemu. Nakalongoza kwa miyaka makumi gane ako Yelusalemu. Mayake nayali yochemigwa Sibiya, kulawa Beeli-sheba.
2Yoashi nakadita ganojile hali Mkulu Nguluwi kwa miyaka jeng'ha, kwa vila mtambika Yehoyada nayali yomlangusa.
3Hala honhu ha kufugamila milungu hahosigwe. Wanhu nawali wolutilila kulavya nhambiko na kufunyiza ubani ako.
4Yoashi nakawalonjela watambika, “Mkungajize sendi zeng'ha ziwele zogaligwa kota nhambiko zelile hali ng'handa ya Mkulu Nguluwi, ziwele ndo sendi zikungajizwe kota kodi na sendi zibochelwe kulawa kwa wanhu walavile kwa vilaho vya wanhu na sendi zigaligwe kwa kunuwila kuli ng'handa ya Nguluwi.
5Chila mtambika yabochele sendi kulawa kwa yumwe wa walolela ng'hano leka kuzenga honhu honeche hawifigwe kuli ng'handa ya Nguluwi.”
6Ila mbaka loufichile mwaka wa makumi meli na jidatu wa ulongozi wa mndewa Yoashi, watambika nawali wang'hali kuzenga kahi ng'handa ya Nguluwi.
7Ahyo mndewa Yoashi nakamchema mtambika Yehoyada na watambika wanji, nakawauza, “Lekachoni hamlinguzenga kahi ng'handa ya Nguluwi hala habomoche? Mleche kuhola sendi mzidi kulawa kwa walolela ng'hano wa hemwe kwa chiwalo cha hemwe. Kwaluchila sambi sendi zeng'ha ziwe kwa chiwalo cha ng'handa ya Nguluwi.”
8Watambika nawakunda kota hawohola kahi sendi kulawa kwa wanhu na hawozenga kahi ng'handa ya Mkulu Nguluwi.
9Mtambika Yehoyada nakahola isanduku na kulitubula kuli chigubiko. Nakaliwika hafungo ha honhu ha kulavila nhambiko kuli ubanzi wa kudilo houkwinjila kuli ng'handa ya Mkulu Nguluwi. Watambika wawele nawali wokwamila lwizi nawawika mgati mwa isanduku sendi zeng'ha ziwele nazigaligwa kuli ng'handa ya Nguluwi.
10Chila lowawene hana sendi nyinji kuli isanduku alyo, yalingwandika wa mndewa na mtambika mkulu nawoya na kuziwaza sendi azo zigaligwe kuli ng'handa ya Mkulu Nguluwi na kuziwika kuli vihako.
11Lowasindile kuziwaza nawawapa wanhu wawele nawahaguligwa kulolela mijito ja ng'handa ya Mkulu Nguluwi. Kwa sendi azo nawawalipa wala wanhu wakolile mijito kuli ng'handa ya Nguluwi, wawele ndo walinguhongola na walinguzenga
12na watema maganga. Nawagula mbawo na maganga ga kuhongoligwa kwa chiwalo cha kuzenjela kahi ng'handa ya Mkulu Nguluwi na kwa chiwalo cha mijito jinji jeng'ha ja kuzenga.
13Ila sendi zozigaligwe kuli ng'handa ya Nguluwi hazitumiche kugongomanyila nyhelo za sendi ne mikasi ja kudumulila goya tambi ne visaye vya kumizila ne mhalamhanda ne vinhu viyage vyoneche vya zahabu ama sendi kwa chiwalo cha ng'handa ya Mkulu Nguluwi.
14Sendi zeng'ha nazihilikwa kwa wakola mijito wawele nawapegwa sendi azo kwa chiwalo cha kuzenga kahi ng'handa ya Mkulu Nguluwi.
15Wakola mijito wawele nawali wololela mijito aji nawali wa kukundigwa ng'hatu, ahyo hawaganigwe kulajila ndaze vyowatumiye sendi azo.
16Sendi zilawile kuli nhambiko ya nongwa na nhambiko za gehile, hazigaligwe kuli ng'handa ya Mkulu Nguluwi, sendi azo nazali za mtambika.
17Mhela awo Hasaeli, mndewa wa Alamu, nakaluta kuutowa muji wa Gati na kuuhola. Hamba nakagaluka leka yaitowe Yelusalemu.
18Ila Yoashi, mndewa wa Yuda, nakavihola vinhu vyeng'ha vyelile vya wasekulu wa heye, viwele viwichigwe chiuyeng'ha na Yehoshafati na Yeholamu na Ahasiya, wawele ndo wandewa wa Yuda. Kahi nakahola ndolendole ziwele heye yuye nayali yaziwichile chiuyeng'ha hamwe na zahabu yeng'ha ifichigwe kuli ng'hano za ng'handa ya Mkulu Nguluwi na kuli ng'handa ya chiundewa, nakazihilika kwa Hasaeli, mndewa wa Alamu. Hamba heye Hasaeli nakoka Yelusalemu.
19Mbuli zinji za ulongozi wa Yoashi na geng'ha goyaditile, nagandichigwa kuli chitabu cha kukumbuchila kwa wandewa wa Yuda.
20Vilongozi wa heye nawali wochijesa kumditila vibi, ahyo nawamkopola Yoashi ako Milo kuli nzila ilingulutila Sila.
21Vilongozi wawele nawamkopola, nawali Yosabadi, mwana wa Shimeati na Yehosabadi, mwana wa Shomeli. Hamba nawamtila kuli vilaga vya chiundewa kuli muji wa Daudi. Amasiya mwanage, nakawa mndewa honhu ha heye.