1Mazuwa gala Wafilisti nawakungajiza vilundo vya wamizi wa hewo nawaluta kitowa na wanhu wa Isilaeli. Akishi nakamlonjela Daudi, “Uvizele kota hegwe na wanhu wa hegwe molawa kuli kambi hamwe na heni kitowa ngondo.”
2Daudi nakamwidichila Akishi, “Goya. Kovizela choyalingugana kudita chitumagwa wa hegwe.” Akishi nakamlonjela Daudi, “Heni ndokudita hegwe unyamile mazuwa geng'ha.”
3Mhela loyabagame Samweli, Waisilaeli weng'ha nawalombocheza kwa kubagama kwa Samweli, nawamtila ako Lama kouwele muji wa heye yuye. Sauli nakawabilimisa walaguzi na wahawi kuli isi ya heye.
4Wafilisti naweting'hana na kuwika kambi ako Shunemu. Sauli nakawakungajiza Waisilaeli weng'ha na kuwika kambi za hewo ako kuli chidunda cha Gilibowa.
5Sauli loyawawene wamizi wa Wafilisti nakaluka kudumba na nhumbula ya heye nayali na lunhwinhwi lukami.
6Ila Sauli loyalandile kutanzigwa na Mkulu Nguluwi, Mkulu Nguluwi nahamwidichile kwa kulota ne kulonga kwa Ulimu ne kwa nzila ya waloli.
7Sauli nakawalonjela vitumagwa wa heye, “Mmhalile mdala mlaguzi wa kunhanza.” Vitumagwa wa heye nawamwidichila, “Ulole, hana mdala yumwe mlaguzi ako Eni-doli.”
8Lelo Sauli nakegalusa kwa kuvala mivalo jinji, heye na wanhu weli wa heye nawaluta hamwe na heye ako kwa ayo mdala nechilo na kumlonjela, “Dedede ndolele, ngalile hano ihoka lya yoneche yondikulonjela.”
9Yula mdala nakamlonjela, “Ulole, hegwe nakuvizela vyoyaditile Sauli, vyoyawabilimise kuli isi ya Isilaeli, walaguzi na wahawi. Lekachoni kwangumbichila idiwa leka mbagame?”
10Sauli nakelaha na kulonga, “Kota Mkulu Nguluwi vyoyawele mkomu ndangilaha, hugazigwa hebu kwa chiwalo cha mbuli ayi.”
11Yula mdala nakamuuza, “Ndaze, ndimigale whaani?” Sauli nakamwidichila, “Ngalile ihoka lya Samweli.”
12Yula mdala loyaliwene ihoka lya Samweli nakatowa iyowe kwa kulonga, “Lekachoni nakudeta? Hegwe ndo Sauli.”
13Mndewa nakamlonjela, “Uleche kudumba! Kwangona choni?” Yula mdala nakamwidichila Sauli, “Ndangulyona ihoka lyangulawa kuli misanga.”
14Sauli nakamuuza yula mdala, “Wa kota ulajilo wa choni?” Yula mdala nakedichila, “Wa kota sekulu kangukwina kuchanya, nakegubika ikanzu.” Aho Sauli nakavizela kota ayo ka heye yuye Samweli. Sauli nakenamiza na kufugama.
15Lelo Samweli nakamlonjela Sauli, “Lekachoni kwangunhunya na kundigala kuchanya?” Sauli nakedichila, “Heni ngazika lukami kwa vila Wafilisti wangitowa ngondo na heni na Nguluwi nakandeka, hanyhidichile kahi kwa nzila ya waloli ne kwa kulota. Lelo nandikuchema undonjele chinhu cha kudita.”
16Samweli nakalonga, “Lekachoni kwangumbuza? Ama kwa vila Mkulu Nguluwi nakakuleka, nakawa mng'honyo wa hegwe?
17Mkulu Nguluwi nakakuditila kota vyoyalonjile kwa nzila ya mlomo wa heni. Mkulu Nguluwi nakaudadula undewa kulawa mmoko mwa hegwe, nakamha Daudi yawele Muisilaeli myago.
18Kwa vila hegwe hauhulichize lizi lya Mkulu Nguluwi na hambe ulajile ng'halazi ya heye kwa Waamaleki. Kwa chiwalo acho ndo mina Mkulu Nguluwi kangukuditila mbuli ayi lehano.
19Mzidi wa ago, Mkulu Nguluwi kowawika mmoko mwa Wafilisti, mitondo hegwe na wanago walume mowa hamwe na heni. Mkulu Nguluwi kowawika wamizi wa Isilaeli mmoko mwa Wafilisti.”
20Baho du Sauli nakagwa na kigolola yawele yamemile lunhwinhwi kwa chiwalo cha ulonzi wa Samweli. Mong'ho wa heye naupungula kwa vila hadile chinhu choneche kwa mhela wa zuwa limwe.
21Yula mdala nakaluta kwa Sauli, nakamona Sauli nayali yodumba lukami, nakamlonjela, “Lole, heni chitumagwa wa hegwe, nyhulika lizi lya hegwe nangana kwajiliza ukomu wa heni kwa kudita choundonjele.
22Lelo dedede uhulichize lizi lya chitumagwa wa hegwe, ndokuwichila mibumunda michefu ulye uwe na mong'ho leka ulutilile na majendo ga hegwe.”
23Ila Sauli nakalema na kulonga, “Ndema kulya.” Wala vitumagwa wa heye na yula mdala nawamdedeza yalye, hamba nakakunda. Lelo nakenuka kulawa hasi na kikalisa mchinhanda.
24Yula mdala nayali na ilogota linojile haluga ha heye, nakadita himahima kulidumula singo lila ilogota, nakahola utimbo na kugongomanya ibumunda lilihela usaso.
25Mdala nakawika chilyo chila hali Sauli hamwe na vitumagwa wa heye, nawalya. Hamba nechilo hihila nawenuka, nawoka.